Ilisimatusaatinik saqqummiussinermik pikkorissarneq

Ilisimatusaatinik saqqummiussinermik pikkorissarneq

Ilisimatusarfimmi ilinniartutut, suliffeqarfinni namminersortuni sulisutut imaluunniit pisortat suliffeqarfiutaanni sulisutut suliamut aalajangersimasumut tunngasunik nunatsinni innuttaasut ilisimasaqarfiginngisaannik ilisimasarpassuaqarputit. Ilisimasatit immaqa nunami naalakkersuinikkut aaqqissuussinerit ullutsinni inuiaqatigiinnut oqaluttuarisaanikkut pingaaruteqassusiannut, puisit sumiiffiisa allanngorarnerannut meeqqalluunniit atuartitaanerannit kisitsisinngorlugit nalunaarsuinernut tunngapput.

Tamakkua tamarmik innuttaasunut nalinginnaasunut soqutiginaateqassapput – ilisimatusarnikkulli suliat, pivottabelit nalinginnaasumik agguakkanik kisitsisitallit oqaluttuarisaanikkulluunniit misissuinerit tuluttut allatat ilittulli paasiuminartitsiginavianngilaat. Allatut iliorluni ingerlateqqittariaqarput. Nunatsinni innuttaasunut nalinginnaasunut paasiuminartumik paasissutissiinissaq ilinniaruk.

Pikkorissarninni ilisimatuutut misissukkat pillugit paasissutissiineq nammineq misilerassavat, soraarummeerutigissavallu tusagassiornikkut podcastiliat sammisamut ilisimatuussutsimut/ilisimatuutut misissuinermut illit nammineq toqqakkannut tunngasoq.

Pikkorissartup pikkorissareeruni makku pisinnaasarilissavai:

  • ilisimatuussutsikkut paasissutissiinermik tusagassiornikkullu paasissutissiinermik immikkoortitsisinnaaneq
  • ilisimatuutut misissukkat pillugit pitsaasumik paasissutisseeriaaseqarsinnaaneq
  • saaffigisassanik aalajangiiniarnermik saaffiginiakkallu aalajangersimasut angujumallugit tusagassioriaatsinik sunik atuisinnaanermik paasinninneq
  • nammineq paasissutissiissutigisanni nunatsinni tusagassiuutit nunatsinnilu innuttaasut saaffigisat pillugit ilisimasanik atuineq
  • allakkani ilisimatuussutsimut tunngasuni oqaluttuassarsisinnaaneq taakkuninngalu sammiviliillunilu paasissutissiisinnaaneq
  • ilisimatuussutsikkut ilisimasanik nunatsinni innuttaasunut tusagassiuutini assigiinngitsuni paasiuminarsaanermut tusagassiuutitigut sakkunik tusagassioriaatsinillu atuisinnaaneq
  • ilisimatuutut misissukkat pillugit paasissutissiornermi tusagassiornikkut toqqakkanik toqqanngisanillu tunngavilersuisinnaaneq
  • nammineq podcastiliorsinnaaneq
  1. Tusagassiuutini ilisimatuutut misissuineq: Ilisimatuutut misissukkat pillugit paasissutissiiffiulluarsimasut takullugillu atuarlugillu tusarnaassavavut taamatullu paasissutissiillammaat periaasii misissorlugit
  2. Kalaallit Nunaanni tusagassiuutit sullitallu. Nunatsinni tusagassiorfinnut pulaarneq
  3. Paasissutissiineq, oqaatsitigut sakkut, tusagasseeriaatsit ilisimatuutullu misissukkat pillugit paasissutissiineq
  4. Ilisimatuutut misissukkat pillugit paasissutissiineq, pingaartumik kalaallisut. Oqaatsinik radiomi atorneqartunik, oqaatsitigut unammillernartunik oqaatsinillu eqqortumik atuinermik sammisaqarneq
  5. Nalunaarusiat pikkunaatsut allaaserisallu ilisimatuussutsimut tunngasut pissanganartortaat nassaarikkit
  6. Ilisimatuutut misissuinermi reportage ilanngutassioriartornerlu
  7. Radiokkut aallakaatitassioriaatsit podcastilioriaatsillu
  8. Soraarummeerut: Matumani tusagassiuutitigut paasissutissiinermik ilisimasatit nutaat tamaasa atorlugit nammineq podcastiliussaatit sammisamut ilisimatuussutsimut/ilisimatuutut misissuinermut illit nammineq toqqakkannut tunngasumik. KNR-ip immiussisarfiani immiussisinnaavutit. Ilitsersuunneqarumaarputit
  9. Oqaatsit pillugit suleqatigiinneq

Pikkorissarnermi ilinniartitsisorpaaloqassaaq, tamarmillu immikkut pikkoriffigisaminni ilinniartitsissapput. Ilinniartitsisoq pingaarneq tassaassaaq: Charlotte Koldbye, ilisimatusarnermut tunngasunik tusagassiortoq siornatigullu Experimentarium Medier-mi pisortaasimasoq. Danmarkimi tusagassiuutit naqitat amerlanersaanni allaaserisaqartarsimavoq, ilaatigut DR’s Videnskabens Verden-imi ilisimatusarnermut tunngasumik radiokkut aallakaatitsisarsimalluni kiisalu aningaasaateqarfinni universitetinilu paasissutissiisartuusimalluni.

Taassuma saniatigut naapissavatit: Signe Ravn-Højgaard (pikkorissartitsinermi akisussaasoq), Naja Paulsen aamma Mariia Simonsen Ilisimatusarfimmi Tusagassiornermut Immikkoortortaqarfimmeersuusut. Aamma ilinniartitsisut, aaqqissuisut, tusagassiortut nunatsinni tusagassiortarfinneersut.

Naapitassasi suli allat matumunnga ilanngullugit allattorneqarumaarput.

Ilinniartitsineq aggustip 21-aniit 30-ianut 2017-imi pissaaq, tamatumalu kinguninngua soraarummeerneq aallartissaaq.

Pikkorissarnissaq imarisamigut assoroornassammat ingerlaannarlu sungiusaatissanik ilaqarluni nalunaaquttap-akunneri ilinniartitsiffiusussat amerlassapput.

Ilinniartitsineq Ilisimatusarfimmi pissaaq ilanngutassioriartornerillu Nuummi eqqaanilu pissapput (unnuinertaqassaaq).

Paasissutissiinerujumaarpugut.

Pikkorissarnermi saaffigineqarput Ilisimatusarfimmi ilinniartut assigiinngitsunik ilinniagallit tamatumalu avataanit nunatsinni suliffeqarfinnit namminersortuneersut pisortallu suliffeqarfiutaanneersut.

Pikkorissarneq BA-niveaumi aamma kandidatniveaumi ingerlanneqarsinnaavoq, aamma immikkut ingerlanneqarsinnaavoq. Pikkorissarneq ilinniartunut ilinniartuunngitsunullu ammavoq.

Kalaallisut paasisinnaallunilu oqalussinnaaneq iluaqutaassaaq, piumasaqataanngilarli. Taamatuttaaq danskisut paasisinnaanissaq pisariaqarpoq. Soraarummeerut kalaallisut danskisulluunniit suliarineqarsinnaavoq.

Pikkorissarneq 7,5 ECTS-pointeqassutaassaaq. Tamatuma assigaa nalunaaquttap-akunneri 200-t missiliorlugit suliaqarsimaneq (piareersarneq, ilinniartitsineq soraarummeerummillu suliaqarneq ilanngullugit).
Eqqaamajuk Ilisimatusarfimmi ilinniartutut pikkorissarnermit meriteqarnissat qinnutigissagakku ilinniarninnut ilanngussinnaalerlugu.

(Tamanna tusagassiortunngornianut atuutinngilaq, pikkorissarneq manna taakku ilinniagaannut ilaareermat).

Download:

Pikkorissarnermut ECTS-pointisiumalluni soraarummeernermi angusisimanissaq pisariaqarpoq.

Ilinniartuunngitsut soraarummeernatik ilinniartitsinermi malinnaasinnaapput. Pisunut peqataasimasut pikkorissarnermut uppernarsaammik tunineqarumaarput.

Soraarummeerut tusagassiornikkut suliaavoq (podcasteq/radiokkut aallakaatitaq) illit nammineq ilisimatuutut misissukkannik allalluunniit misissugaannik paasissutissiiffiit. Suliarinera KNR suleqatigalugu pissaaq, immiussisarfimmik atorsinnaassagatta teknikkikkullu atortunut tunngatillugu ikiorneqarsinnaassalluta.

Tamatuma saniatigut suliamut nalunaarusíussaatit, tusagassiornikkut suliannut tunngatillugu tusagassiortutut toqqartuininni tunngavilersuinitit allaaseralugit.

Pikkorissarneq peqataanissamut piumasaqaatinut angummattunut tamanut ammavoq, peqataanerlu akeqanngilaq.

Ulloq nalunaarfissaq kingulleq: Juulip 1-iat 2017.

Taamaappat attavigiinnariuk pikkorissartitsinermi akisussaasoq Signe Ravn-Højgaard uku aqqutigalugit: sirh@uni.gl | +299 38 56 87 | +299 23 29 43.