Inatsisinik, pisortat inatsisaat

Inatsisinik, pisortat inatsisaat

Kalaallit Nunaanni inuiaqatigiit eqqartuussiveqarfiuput ineriartulertorfiusut.

Inatsisit malittarisassiallu ulluinnatsinnik, aqutsisoqarfitsinnik inuiaqatigiinnillu akuuffigisatsinnik aqutsippullusooq, taamaattumillu pingaaruteqarpoq ineriartornermi tamanut iluaqutaasussamik malittarisassianik taakkuninnga erseqqissaasinnaasunik ingerlatitseqqiisinnaasunillu inatsisileritooqarnissarput.

Pisortat inatsisaanni Inatsisilerinermi bachelorinngorniarneq inatsisitigut tamatigoortumik ilinniarfiuvoq pisortatigoortumik – aamma Nunatsinni -inatsisilerinerpiaq sammineqarnerulluni, pisortat inatsisaanerpiaq suliaqarlutit Namminersorlutik Oqartussani kommuniniluunniit inatsisilerituutut pisariaqartinneqartunik pisinnaasaqalissutissannik.

Ilinniagaq faginik paasisimasalinnit malinnaavigineqassaaq ilinniakkannik naammassinnereeruit pitsaanerpaanik atugassaqarnissat qulakkeerniarlugu.

GUX-imit soraarummeersimanissaq imaluunniit naligisaanik ilinniarnertuunngorsimanissaq agguaqatigiissillugu C-mik karaktereqarluni, kalaallisut danskisullu fagini minnerpaamik B-mik karaktereqarluni angusisimaneq, aamma tuluttut matematikkimilu minnerpaamik B-mik qaffasissusilimmik angusisimaneq.

Tamatuma saniatigut kalaallisut danskisullu oqalussinnaallutillu allassinnaassaatit oqaatsini taakkunani marlunni allatassanik ingerlaavartumik suliassiisoqartassammat.

Tiguneqarnissamut piumasaqaataasumik soraarummeeruteqarsimanatik qinnuteqartut qulaani allassimasunik naleqqiusseqquneqarput, imaassinnaavorli inatsisitigut sullissinermi assigisaanilluunniit misilittagaqarluartut immikkut akuerisaallutik tiguneqarsinnaasut.

Ilinniaqqissutaasumik faginik ataasiakkaanik ilinniartussatut tiguneqarsimasut oqaatsitigut piumasaqaatinut tunngatillugu immikkut pineqarnissamik qinnuteqarsinnaapput.

Malugiuk fagit ilaannaat ataasiakkaatut ilinniagarineqarsinnaammata.

Semesterit siullianni aappaannilu inatsisilerinermi periuseq, eqqartuussisutigut oqaluttuarisaanermik qimerluuineq ullumikkullu inuiaqatigiinni inatsisilerinermik inissiineq sammineqassapput.

Semesterit aappaanni pisortat inatsisaannut tunngatillugu inatsisilerineq sammineqangaatsialeriissaaq.

Semesterit pingajuanni sisamaannilu Nunatsinni, innuttaasut pisinnaatitaaffiini, Nunatta nunanut tamalaanut pisussaaffiini, pillaariaatsini, aammalu inatsisini ingerlatsinermut tunngasuni inatsisinilu atorfinitsitsisinnaanermut tunngasuni inatsisinik atueriaaseq inatsisilioriaatsillu sammineqassapput.

Semesterit sisamaanni aamma fagi eqqartuussisutigoortitsineq sammineqassaaq.

Ilinniakkap semesteriisa tallimaanni arfernannilu inatsisinut pisortatigoortunut tunngatillugu bachelorinngorniut nalinginnaasoq naammassissavat, ilaatigut praktikkerlutit – imaluunniit piginnittussaanermik sammisaqarnerit Europami kandidatinngorniutissannut masterinngorniutissannulluunniit piareersaatissat naammassissavat.

Naatsorsuutigissavat ilinniarninni ilungersussallutit, sammineqartulli soqutiginartuupput soraarummeerutissarpassuaqassallutillu suliakkiissutinillu amerlaqisunik tunniussaqartassallutit.

Pisortat inatsisaannik inatsisilerituunngoruit ilisimatusarfimmi fuldmægtigitut imaluunniit Namminersorlutik Oqartussani kommuniniluunniit siunnersortitut atorfinissinnaavutit.

Aamma qularnanngilaq suliffeqarfinnit pisortanit pigineqartunit soqutigineqassasutit.

Europamilu kandidatinngorniarlutit masterinngorniarlutilluunnit ilinniaqqinnissamut periarfissaqarsinnaavutit.

Ilinniagaq pillugu paasisaqarnerorusukkuit ilinniartunik siunnersuineq attavigissavat iml.:

 

Morten Nornild
Lektori avataaneersoq
Inuiaqatigiilerinermik, Aningaasaqarnermik Tusagassiornermillu Ilisimatusarfik
Isumaginninnermut Immikkoortortaq
Ilimmarfik, Manutooq 1 
Postboksi 1061 
3900 Nuuk
Ulloq qinnuteqarfissap killinga 01.03.2018
Aallaqqaat Septembari
Sumiiffik Ilimmarfik
Qinnuteqarneq Atuagaaraq Siunnersuineq