Ilinniartitsinermik Ilisimatusarfik pikkorissarneq

Ilinniartitsinermik Ilisimatusarfik pikkorissarneq

Ilinniarnermik Ilisimatusarfiup Ilinniartitaanermullu Aqutsisoqarfiup pikkorissaaneri

Nunatsinni Meeqqat Atuarfianni ilinniartitsisunut atuarfiillu pisortaannut pikkorissaanerit

Ilinniarnermut Institutip Ilinniartitaanermullu Aqutsisoqarfiup ataatsimoorlutik ukiumi atuarfiusumut 2017/18-mut pikkorissaanissamut neqeroorutit matumuuna saqqummiuppaat.

Pikkorissaanissamut piviusunngortitsinissamut aallaaviusarpoq pikkorissaanissamut neqeroorummut aaliangersimasumut qinnuteqartut qassiineri, kiisalu atuarfimmi aaliangersimasumi pikkorissarnissat allat qanoq amerlatigisut qinuteqarfigineqarsimanersut.

Pikorissaanerit ilaat illoqarfigisami atuarfimmi ingerlaneqartarput, pikkorissaasut ornigunnerisigut. Taamaalilluta atuarfiit ornittassavagut, ilinniartitsisullu suliffiannut avatangiisaanullu sunngiusimasaannut tikillugit pikkorissartassallugit. Pikkorissaanerit allat nunap immikkoortuini ingerlanneqassapput kiisalu ilaat nuna tamakkerlugu pikkorissaanerussallutik, taakkunanilu aaqqissuussani pikkorissartussat amerlassusaat naapertorlugit ataatsimoortinneqartassallutik.

Ukiumut atuarfiusussamut tulliuttumut tunngatillugu pikkorissaanissat ikittuinnaat neqeroorutigineqarput, siunissaq eqqarsaatigalugu pikkorissaanissat pillugit atuarfiit kommunellu ataasiakkaat ingerlaavartumik oqaloqatiginerisigut piffinnut naleqqussakkanik pikkorissaanerit aaqqissuuttarsinnaaneri kissaatigigatsigu. 

Tassunga tunngatillugu maluginiaqqunarpoq ”Pisariaqartitsineq tunngavigalugu pikkorissaaneq” pillugu neqeroorut. Pikkorissarnermi tassannga qinnuteqaatit aaliangersimasumik killilerneqanngillat - Ukiup atuarfiusup ingerlanerani qaqugukkulluunniit qinnuteqartoqarsinnaavoq. 

Erseqqissaatigineqassaaq tassani pikkorissarnermik aaliangersimasumik qinnuteqartoqartassanngimmat, kisiannili atuarfiup pisariaqartitaa/unammillernartut allaaserineqarlutik Ilinniarnermut Institutimut Ilinniartitaanermullu Aqutsisoqarfimmut nassiunneqartassammata, tamatumalu kingunerisaanik qinnuteqartoq oqaloqatigineqartassaaq, pisariaqartitamut naapertuuttumik ilusiliinissaq imaqartitsinissarlu naammassiniassallugit.

Pikkorissarnissamut qinnuteqaatit Atuafiup pisortaanit ingerlatsivimmiillu akuerineqarsimasut kingusinnerpaamik 15. marts 2017 nassiunneqassapput una aqqutigalugu: https://inerisaavik.miniup.gl/kl.

Pikkorissarnissamut qinnuteqartut atuarfikoortillugit akineqassapput kingusinnerpaamik 15. april 2017.

 

Britta Lohmann, Instituttip pisortaa, Ilinniartitsinermik Ilisimatusarfik

Simon Lennert, Pisortaq, Ilinniartitaanermut Aqutsisoqarfik


Ilinniartunik siunnersuineq

Ilinniarninnut tunngasunik siunnersorneqarusuppit?

Atuaruk