Issittumi uuliamik gassimillu imm.

Issittumi uuliamik gassimillu imm.

Issittumi uuliamik gassimillu imm., uagut

Ilisimatusarfimmi issittumi uuliamik gasimillu misissuinermut immikkoortortaqarfik martsip 16-anni 2016 ammarneqarpoq. Aqutsisoralugit Professor Anne Merrild Hansen aamma Professor Rachael Lorna Johnstone. Immikkoortortaqarfik inuiaqatigiilerinermik, aningaasaqarnermik tusagassiuteqarnermillu ilisimatusarfimmut atatinneqarpoq.

Immikkoortortaqarfiup siunertaraa issittumi uuliamik gasimillu misissuinerit aningaasaqarnikkut inuiaqatigiinnullu kingunerisassat eqqumaffigalugit ingerlanneqarnissaat, tassani Kalaallit Nunaat immikkut isiginiarumallugu; tassa Kalaallit Nunaannut attuumassuteqartunik sammisamut ilisimasaleqatigiinnik pilersitsinissaq; taavalu sammisamut tunngasunik ilisimasanik attuumasutilinnillu ingerlateqqiisarnissaq sumiiffimmut, NGO-nut aalajangiisartunullu pilersaarusiornermi, toqqaaniarnermi, ilusilersuinermi projektinillu inerisaanermi iluaqusersuisussanik. Immikoortortaqarfiup misissuinermi inerniliunneqartut saqqummiuttassavaat pisarnertut ilisimatuut saqqummiuttagaat aamma nittartakkakkut ilisimatusartunermut tunngasunik paasissutissartalimmik tuluttut, qallunaatut kalaallisullu immikkoortortaqarfiup suliniutai inerniliussaallu pingaarnerit imaralugit.

Aningaasaliisarneq

Immikkoortortaqarfiup pisortaasa aningaasarsiaat aallarniutitut Aatsitassanut ikummatissanullu aqutsisoqarfimmiit ukiuni pingasuni aningaasaliineraneerput. Aningaasaliineq Ilisimatusarfimmit aqunneqarpoq. Suliffeqarfiit Kalaallit Nunaanni uuliamik gasimillu misissuinernut atuinernullu kisermaassillutik pisinnaatitsissummik peqartut Kalaallit Nunaanni uuliamik gasimillu pilersuinermut ineriartortitsinermut tapiisarnissamut pisussaatitaapput, taakkunanngalu aningaasalersuineq pivoq.

Immikkoortortaqarfiup pisortai misissuisartuilu aatsitassanut aqutsisoqarfimmut uuliaasiorfiutilinnut attuumassuteqanngivillutik sulerusupput. Aatsissanut ikummatissanullu aqutsisoqarfik uuliaasiorfiillu misissuinermi  pingaarnersiuinerit toqqaannartumik sunniuteqarfigisinnaanngilaat, misissuinernilu inernerit assigisaallu akuereqqaartariaqarnagit. Immikkoortortaqarfik suliffeqarfinnut assigiinngitsunut suliniutiminut ingerlatsinissamut ineriartortitsinissamullu saniatigut aningaasaliisinnaasunik pissarsiotarnini ingerlatiinnassavaa. 

Immikkoortortaqarfiup aaqqissuussaanera

Immikkoortortaqarfiup aqutsisuisa issittumi uuliamik gasimillu misissuinermut immikkoortortaqarfiani pilersaarusiorneq ingerlatissavaat, suliniutillu ingerlatsisuuffigalugillu ataqatigiissaarisuullutik. Suliniutit nutaat pilersinniarpaat aningaasartassarsiorlugillu, immikkoortortaqarfimmullu ilaasortat peqatigalugit pilersaarusiortarniarlutik. Ilisimatusarnikkut attuumassuteqanngitsut peqataatinniarpaat, taakkualu misissuilluni suliniuteqarnermut ilanngukkusutaat paasiniarlugit. Peqataatinneqartussat makkuussapput: suliffeqarfinnit, najugaqartunit, NGO-nit allanillu politikkimik suliaqartuniit sinniisaasut. Immikkoortortaqarfinni aqutsisut aamma PhD’llit, masterinngorniat ilinniartitsiullu ilinniarfinni pioreersuni aqqutissiuunniarpaat, Ilisimatusarfiup curriculumiata ineriartornissaanut ilaartuisussat.

Immikkoortortaqarfimmut ilaasortat Ilisimatusarfimmit Kalaallit Nunatsinnilu suliffeqarfiit attaviusuneersuupput. Immikkoortortarfimmut ilaasortat PhD-nngorniartuusinnaapput misissuisussanngortitalluunniit. Taakkua immikkoortortaqarfiup aqutsisui peqatigalugit immikkoortortaqarfiup pilersaarusiorneranut, misissuinermilu pingaarnersiuinernut peqataasassapput, misissuinermi projektinut, fondinut qinnuteqarnernut, aaqqissuusseqataanernut, immikkoortortaqarfiup ataatsimeersuarnerinut suliniutinullu allanut peqataasassapput.

Misissueqataasut suliffeqarfiillu peqataasut Issittumi uuliamik gasimillu misissuisarfiup immikkoortortaqarfianut atatinneqassapput. Taamatut qanimut suleqatigiinneq aalajangerneqarpoq issittumi misissuinerit tamatumunngalu attuumassutillit ilanngussisarnerat tunngavigalugu. Taakkua immikkoortortaqarfiup suliniutaanut peqataallutillu ilanngussisassapput soorlu suleqatigiinnikkut misissuinermi projektit, projektinut qinnuteqarnerit, ataatsimeersuarnerit, isumasioqatigiinnerit imaluunniit saqqummiussassanut saqqummiusseqataanerit atuakkanillu saqqummersitsinissanut suleqataallutik. Taakku aamma PhD-nik siunnersuinernut ilaatinneqarsinnaapput atuartitsinerniluunniit ingerlatsisinnaallutik. Suliffeqarfiit peqataasut immikkoortortaqarfimmut iluaqutaasussanik suliniutinik tapiisinnaapput, misissuinermilu projektinut aningaasalisuusinnaallutik.

Issittumi uuliamik gasimillu ilisimasalinnik nunanit assigiinngitsuneersunik attaveqataasussanik immikkoortortaqarfik aallartitsissaaq ingerlatassaminik.  Tassaniissappullu ilisimatuut soqutiginnittut aningaasaqarnermik, issittumi uuliap gasillu inuiaqatigiinnullu kingunerisassaat pillugit suliaqartut. Taakkunaniissapput ilisimatuut qaffasissutsinik assigiinngitsuneersut, PhD-nit misissuisussanngortitanut misissuinerup iluani qaffasinnerpaanut, soorlu misissuinermi immikkoortortaqarfik aningaasaqarnermut, nalaagaaffiit pissusaannik ilisimatuunut aamma politologimut, antropologimut, inatsisinik ilisimatusarnermut, internationale relationermut nunalerinermullu.