Kalaallit Nunaanni tusagassiuutinik misissuineq

Kalaallit Nunaanni tusagassiuutinik misissuineq

Nunatsinni tusagassiuutit demokrateeqarnissamut pingaaruteqarluinnarput. Tusagassiuutimmi innuttaasunik siammasissumik inissisimasunik paasissutissiinermut aalajangiisuupput ataqatigiissitsissutaallutillu. Taakkuttaaq pissutaagajullutik Kalaallit Nunaanni tusagassiuutit oqallisigineqartarput.

Ilisimatuutut misissuineq ''Tusagassiuutit 2018” aallartinneqarlaaq tusagassiuutinik tusagassiuutillu imarisaannik oqallisiginninnermut tamatumunnga ilapittuutaassaaq. Misissuineq tamanna oqallinnermut iluaqutaassaaq ulluni aalajangersimasuni Nunatsinni tusagassiuuteqarfinni ilanngutassiarineqartunik tamanik katersisoqartassammat akusiuisoqartassallunilu. Taamaalilluni taamatut misissuinikkut ilaatigut erseqqissarneqassapput kikkut oqaaseqartinneqartarnersut kikkullu oqaaseqartinneqartannginnersut, suut tusagassiuutigineqartarnersut suullu ilanngunneqarneq ajornersut.

Taamaaliortoqassaaq tusagassiuutini sammineqartunik annertuumik akusiuinikkut ilisimatusarnermi apeqqut una apeqqutigalugu: 2018-imi Kalaallit Nunaanni tusagassiuutigineqartunut suna ilisarnaataava?

Tamatuma saniatigut Tusagassiuutit 2018-imi aamma sukumiisumik misissorneqassaaq Kalaallit Nunaanni tusagassiuutit qanoq tunuliaqutaqarnersut (tusagassiorfiit suunersut, qanoq annertutiginersut, aningaasaqarnerat qanoq innersoq, kimit pigineqarnersut il.il.). 

Misissuinermi paasissutissat databankimut katersorneqassapput misissuinerni allani, assersuutigalugu kandidatinngorniartut ph.d.-mullu ilinniartut pillugit paasissutissanik katersuinerni, atorneqarsinnaassallutik tusagassiornermillu ilinniarfimmi ilisimatusarnikkut tunngaviliinerusarnissamik iliuuseqarniarnermi ilinniartitsissutitut atorneqassallutik. 

Ukioq allortarlugu taamatut misissuisoqartassaaq, taamaalilluni Kalaallit Nunaanni tusagassiuuteqarneq tusagassiarineqartullu qanoq ineriartornersut ersersinneqarsinnaammat. Misissuinerup inerneri nalunaarusiami atuaruminartumi saqqummiunneqassapput. Nalunaarusiaq siulleq 2018-imi ukiakkut saqqummersinneqassaaq.



Paasisimasalik

Immikkut ilisimasalittavut ajornanngitsumik attavigikkit

Atuaruk

Saqqummersitaq

Ilisimatusartut saqqummiussaanik ujalerit

Atuaruk