Ilisimatusarfiup rektorertaava Gitte Adler Reimer nalliuttorsiualaarnermi atorfittaaminut pisortatigoortumik ivertinneqarpoq

Ilisimatusarfiup rektorertaava Gitte Adler Reimer nalliuttorsiualaarnermi atorfittaaminut pisortatigoortumik ivertinneqarpoq

05.12.2017

Officiel tiltrædelse af ny
rektor Gitte Adler Reimer

Ilisimatusarfiup rektorertaava Gitte Adler Reimer decembarip 4-anni nalliuttorsiualaarnermi atorfittaaminut pisortatigoortumik ivertinneqarpoq, rektorillu ujamianik prorektorimit Suzanne Møllerimit ujamilerneqarluni.

Pisortatigoortumik ivertitsinerup kingorna rektorinngortoq oqalugiarpoq, ivertitsinerlu ilasseqatigiinnermik naggaserneqarpoq.

Rektorertaatta oqalugiaataa uani atuarsinnaavat:

 

Asasakka ilisimatusarfiup siulersuisui, asasara rektoriugallartoq, asasakka suleqatit, asasakka ilinniartut qaaqqusallu;

Ilisimatusarfimmut tikilluaritsi qujanarlu ullumi maani ilasseqatigiinnermut peqataasinnaagassi. Siullermik Ilisimatusarfiup siulersuisui uummammik pisumik qujaffigerusuppakka tatigalunga ilisimatusarfiup rektorissaatut toqqarsimagassiga.

Ilisimatusarfiup rektoritut suliassara ataqqigaarlugu ingerlatissavara – suliassat aamma pilersaarutit anguniagassallu naammassisassat annertupput. Rektoritut pingaartippara Ilisimatusarfimmi sulisut ilinniartullu suleqatiginissai peqataatinnissaallu, aammattaarlu aalajagiinernut assigiinngitsunut ammasumik paasissutissiiffigisarnissaat pingaarluinnartutut isigivara. Ilisimatusarfimmimi sulisut ilinniartullu pingaaruteqarluinnaqinnaartuupput anguniakkat ajunnginnerpaat inuiaqatigiinnullu iluaqutaaluartut angussagutsigit. Taamaammat pingaaruteqarluinnaqqinnaartuuvoq ilinniartitsinerup ilisimatusarnerullu ajunnginnerpaamik qaffasinnerpaamillu aqqutissiornissaat.

Ilisimatusarfimmi ilinniartut pingaaruteqarluinnaqqinnaarput ilinniagaqarfimmut nunattalu siunnissaanut. Ilisimatusarfik sinnerlugu oqarsinnaavunga ilinniartuutigut tulluusimaarutigilluinnaratsigit. Ilinniartuutivut ilinniarlutillu Ilisimatusarfimmi naammassisartut inuiaqatigiinni suliffeqarfinnilu assigiinngitsuni piumaneqarluinnarneri atorfissaqartitaanerallu nuannaarutigeqaarput. Taamaakkaluartoq illorrisimaarluta uniinnassanngilagut tassami sulissutigiuartariaqarparput Ilisimatusarfimmi ilinniarfiit qaffassartuarnissaat. Pingaaruteqarluinnartuuvoq ilinniartuutitta ilinniartuutsigisimasatta ilisimatusarfimmi ilinniartuunertik ilinniakkaminnillu naammassisimanertik iluatsitutut, nuannaralugu, tulluusimaarutigalugulu misigisimanissaat. Taanna anguniagassaq ilinniartitsisut, ilisimatusarfimmilu sulisut pikkorittut tunniusimaartullu kisimik kivissanngilaat iluatsissappammi ilisimatusartut kattuffiat Ili Ili suleqatigineqartariaqarpoq. Ukiuni kingullerni Ili Ili aallarteqqinneqarnera uummarillutillu sulinerat Ilisimatusarfimmut inuiaqatigiinnullumi annertuumik iluaqutaasimavoq.  

Suliassama ilagivaa ilinniartitsisunngorniarluni ilinniagaqarfiup pitsanngorsarnissaa, isumaqarpunga pingaaruteqarluinnaqqinnaartoq Ilinniarfissuarmi ilinniartitseqqiisarneq pikkorissaasarnerlu sukumiinerusumik ingerlannissaa – Ilinniarfissuarmi kisimi taama pisariaqartitsinngillat Ilisimatusarfiip immikkoortortaqarfiani tamani pikkorissaaneq pingaaruteqarpoq. Ilinniartitsisunngorniarluni ilinniagaqarfiup ilisimatusarnikkut siuarsarnissaa aamma pilersaarutaavoq taanna ilaatigut anguneqassaaq ilisimatusarfiup ilisimatuui, professorii qallunaat nunaanni nunanilu allani ilisimatusarfiit suli annertunerusumik suleqatsigineranik. 

Ilisimatusarneq, ilisimatuut ph.d.-gorniartullu pisariaqartinneqarput ilisimatusarneq aallavigalugu ilinniartitsineq ingerlanneqassappat. Ilisimatusarnerup suli annertunerusumik pitsanngorsaraanni aamma ilinniartitsineq ilisimatusarnerlu qaffassarneqassapput.

Anguniakkakka ineriartornermullu eqqarsaasersuutikka ilinniartitsisunngorniat immikkoortortaqarfianut kisiat pingaarutilittut isiginngilara kisiannili faginik tamanik Ilisimatusarfimmilu ilinniakkanik assigiinngitsunik assigisaanik pingaartitsivunga. Kisianni qaffasinnerpaaq ajunnginnerpaarlu angussagaanni ilinniartitsinermi ilisimatusarnermilu pingaaruteqarluinnaqqinnaartuuvoq Ilisimatusarfiup inissisimanermini illutaalu ataatsimuulernissaat. Ilisimatusarfiup illutai ataatsimoortsileraanni iluaqutissarpassuaqarpoq ilinniartitsinermut ilisimatusarnermullu kisimi iluaqutaanavianngilaq – campusip ataatsimoortup Ilisimatusarfik issittumi ilisimatusarnermi ilinniartitsinermilu qitsiusumik nunarsuarmiuqatigiinni internationalimilumi inississavaa.

Ilisimatusarfimmut pingaaruteqarluinnaqqinnaartuuvoq avammut suleqateqarnissaq – anguniarutsigullumi nammineq annertuumik suliniuteqarlutalu iliuseqartariaqarpugut suleqatissarsiornitsinni. Aamma isumaqarpunga Ilisimatusarfiup inuiaqatigiinnik kalaallinik, nunanillu assigiitsunik ataatsimiisitsisarnini, seminarertitsisarnini ingerlatiinnassagai. Tassami taamatut katserisimaartitsisarnerit Ilisimatusarfiup pingaaruteqassutsini takutissavaa, minnerunngitsumik naqissuserneqassaaq ilisimatusarfik Kalaallit Nunaanni issuttumilumi ilisimatusarnermi siuttuusoq. Ilisimatusarfiup taamatut siuttuunerminik naqissusiinera kalaallit inuiaqatigiit misigilersissavai nunatta ilinniagaqarfiit annerpaartaanik piginneqataallutik– Ilisimatusarfiup matui ammapput suleqatiginnikkusuppugullu. 

Ilisimatusarfiup rektoriata siulliup professorip Robert Petersenip ataqqingaartup ilinniartitsisukuma rektorinngorninni allaffigivaanga pilluaqqullunga – aallakkaminilu allappoq neriuutigalugu Ilisimatusarfik rektoritut ingerlalluarumaaringa. Robab kissaataa iluunngarlunga uummammillu pisumik anguniarsariumaarpara – neriullunga anguniagaq Ilisimatusarfiup siulittaasuisa, sulisut, ilinniartut, Kalaallillu Nunaanni inuiaqatigiit peqatigalunga kivitseqatsigiumaaraannga. Sunaluunniimmi iluatsillugu kivinniaraanni ataatsimoorluni iliuuseqarluni iluatsinnerpaasarmat.

Naggataagut rektoriugallarsimasup Suzanne Møllerip rektoritut inissisimanermini suliaanut annertuumut qutsavigerusuppara. Suusaat kusanarnerpaamik ajunngitsumillu Ilisimatusarfik piffissami aqqutsinerni ingerlassimavat – ilinniartut uagullu suleqatitit aqqutsinerit ajunngitsoq pissarsiffigilluarsimavarput. Qilanaarpunga prorektoritut sulileqqikkuit siunissami suleqatigiilluarnissatsinnut.

Suusaat qujanarujussuaq.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk