Nepalimi obstetrikimi praktikkerneq

Nepalimi obstetrikimi praktikkerneq

01.07.2017

Peqqissaasunngorniap Naduk Eriksenip semesterit arfernanniittup allataa

Inuiaat allat piorsarsimassutsikkut inooriaasaat pissanganartittuaannarnikuugakku Kalaallit Nunaat qimallugu praktikkernissara soqutigilernikuuara, qujanaqisumillu Nepalimi obstetrikkimi (obstetrik napparsimaveqarfimmi sammisassat ilagaat, naartusunik ernisunillu sullissinermik imalik) praktikkernissannut nuannerluinnartumik akuerisaallungalu periarfissarsivunga. 

Global Contact, Mellemfolkeligt Samvirke-mut atasuuvoq, kaannersuarmik piitsuussusermillu akiuiniarnermik suliniarfiusoq, Global Contactilu aqqutigalugu praktikkernissara aaqqissuussimallugu. 

Nepalimukannginnitsinni Københavnimi aallarniutaasumik pikkorissarneqaqqaarallarpugut. Pikkorissarnitsinni ilinniartorpassuit nunani allanissaaq praktikkertussanik naapitsivugut. Pikkorissarnitsinni nunani ornitassatta kulturiannut suleriaasiannullu tunngasunik piareersarneqarpugut.

Praktikkerneq

Kathmandup mittarfianut pigutta uippakajaarnassasoq siumut ilisimatinneqarpugut. Ilisimatereerneqarpugullu inuit mittarfimmiittut nassatatsinnik ikiuukkumassasut, nassatagulli tigoqqissagutsigit akilersikkumassasut.

Ilimagisatsitut apuukkatta uippakajaarnarpoq, angutilli marluk praktikkerfissatsinneersut mittarfimmut aavaatigut.

Nepalimiut inuiaajupput eqqasuuteqanngitsut eqqissisimaartullu, najugaqarfissatsinnullu ingerlaartilluta neriniartarfeeqqap silataani nalunaaquttap-akunnerata affaata missani napparsimaviup tunngaviliisua utaqqivarput, napparsimaviummi tunngaviliisua ataatsimeereerluni ilaassamaarmat angerlarluni. 

Filmimiittuusinarpoq Kathmandumiilluni, biilit motorcykelillu imminnut siggaqattaattut tupinnaqaallu angallannermik malittarisassat Europamisut inngitsut. Motorcykeleeraq ataaseq inunnik pingasunik ilaasoqarsinnaasarpoq, ilaasullu saniatigut puussiat angerlaassassat sinaani nivingasinnaasarput.

Silaannap tikka allaaneroqaaq, igaarsunnik, ikuallassunnik igitaninngaanneersunik biilillu pujorsunneqaluni. Maluginiagassarpassuit amerlangaarmata aalajangeruminaappoq qiianarnersoq kiannersorluunniit.

Suliartoqqaarama ernisarfimmiippunga. Ernisarfik utaqqiisaasumik pingasunik ernisuttunut nallisitsisunullu siniffeqarpoq, taakkunani ernisuttut nakkutigineqarsinnaapput, taamaasillutik ernisuttut qanimut malinnaavigineqarsinnaallutik. Taakkua siniffiit pingasut saniatigut allanik 18-inik siniffeqarpoq ineeqqani pingasuni inissisimasuni.

Nepalimi illut tamarmik napparsimavillu, kiffiuteqartinnagit sanaajupput, taamaattumik illup iluaniilluni ulloq unnuarlu qiianartorujussuusarpoq.

Napparsimavimmi ineeqqat nalinginnaasut kiassaateqanngillat, ineeqqamili ataatsimi ineeqqanit allanik akisunerulaartumi kiassaateqarpoq. Taamatuttaaq ernisarfimmi kiassaateqarpoq, taannalu ernisuttoq aatsaat singuleraangat ikinneqartarpoq. 

Uninngasunik paaqqutarinninneq annertunerusumik ilaqutaasunik aallunneqartarpoq, peqqissaasup suliassarikkajunnerusarpai fysiologiskiunerusut, tassaasut; tillernisiuinerit naartusumi meeraaqqamilu aamalu aap qaffasissusaanik uuttuineq, minnerunngitsumillu ernisitsineq. Arnaq ernereeraangat inoorlaaq ilaqutaasunut paaritinneqakkajuttarpoq, anaanaasup ernereernermini qasuersaarluarniassammat.

Nakorsartinnerit, suliaritinnerit oqaloqatiginninnerillu tamarmik akeqarput. Akit assigiinngiiaarput, assersuutigalugu ernineq Nepalimiut Rupeeutaannik 3500-nik akeqartarpoq, danskit kronii naapertorlugit 230-nik naleqarluni. Nakorsiat atortussatik nammineq pisiarisarpaat, soorlu aaqqatit sterilit, kapuutit, nipittartut, taratsersuutit nakorsaatillu, nukinginnartoqartilluguli ernisarfimmi uninngavinnilu atortussaqartuaannarpoq. Tamatuma kingorna ilaqutaasut nakorsaataarniarfimmi atortussanik piseriarlutik atorsimasatik napparsimavimmiik uninngavinnut utertittarpaat. Nepalimi uiusoq pilersuisuusarpoq, aamma taannaasarpoq napparsimavimmi uninnganermi naammattunik atortoqarnissanik pingaarnertut isumaginnittuusussaq.

Nepalimiut assut sipaallaqqippasipput. Innaallagissamik, imermik, kiassarnermik atortussaminnillu sipaallaqqipput.

Sipaallaqqinnerummi iluaqutissartaraa avatangiisimik mianerinninnerulerneq, aammalu ilaqutariit aningaasatigut killigisaat eqqumaffiginarneri pikkoriffigeqaat. Ajoqutissartaali tassaavoq tunilaassuinissamut aarlerinartoqarnerunera, assersuutigalugu kapuutit atoqqeqattaartarpaat, nakorsaatilerinermi taratsersuinermilu.

Kulturi

Nepalimiut inoroorsaallaqqivissorsuupput, ernisarfimmilu ikiuunnissaq ajornangajappoq. Issialluta isiginnaartitaasarpugut ilungersunnginniassagatta. Ikiuukkumagaluaraanni qujaannartarput, immaqa tikeraartutik suliaqassappata ataqqinninnginnertut isigigamikku.

Nutaanilli ilinniartitseqataarusuttarput assut. Naggataatigut nakorsat peqqissaasullu aperisalerpakka aalajangersimasunik misiliisinnaanersunga ilikkagaqarniassagama.

Soorlu eqqaareeriga, Nepalimiut eqqasuuteqaratik eqqissisimasuusut. Napparsimmavimmilu oqaaseq ”stress” atorneqanngilaq, suliassat tamaasa eqqissiivillutik suliarisarpaat angumerisinnaasatillu naammagisarlugit. Nalunaaqutalersorpallaaratik angumersiniaasarput, namminnerlu taasarpaat ”nepali-time”.

Ullaakkorsiutissatut neqeroorutigisarpaat cornflakesit kissartumik immulikkat omeletiluunniit. Nepalimiut ullaakkorsiorneq ajorput, tiitulaaginnartarput kaagerartulaaginnarlutillu. Ulloqeqqasiutigalugillu unnukkorsiutigisarpaat ilisimaneqarluartut Dal Bhat, qaqorteqqasulik, naatitalik linsenillu suppalianik miseqqigaq. Nepalimiorpassuit neqitorneq ajorput, illoqarfimmili neriniartarfinni neqinik inniminniisoqarsinnaavoq mianersorlunili, atugaat minguttuugajuttarmata.

2015-imi Nepalimi nuna sajorujussuarmat illuminnik annaasaqarnikut amerlaqaat, sanaqqiisullu suli takussaaqalutik, illorpassuit naalaffippassuillu suli sanaqqillugit naammassineqanngitsut ullumikkumut suli amerlaqalutik.

Nepalimiut piitsuugaluaqalutik nukittoqalutillu qajannaatsuupput. Qajannaatsuuneri tamatta ilinniarfigilluarsinnaavarput, maluginiarnerpaavaralu inuk inuunermini artornartorsioraluaqaluni qanoq nukittutigisinnaatiginera.

Nepalimi praktikkerninni ilikkagarpassuaqarpunga; oqaatsit atunngikkaluarlugit timi atorlugu atuaasinnaanngornerusutut misigisimavunga; sakkortuunik nalaataqarnerup nalaani misigissutsima aqunnerusinnaaneri ilikkagaqarfigeqaara minnerunngitsumillu naammagittarsinnaaneruleqalunga. Praktikkernera ataatsimut isigalugu ilikkagaqarfigilluarpara, allanullu kajumissaarutigisinnaaqaara. Tuluttut pikkorissuunissaq pisariaqanngilaq, oqaatsit atunngikkaluarlugit timi atorlugu attaveqatigiittaratta annertuumik – uninngasunut suleqatinullu.



Kommunikationskontor

Kom nemt i kontakt med vores kommunikationskontor

Læs mere

Nutaarsiassat

Ilisimatusarfik pillugu nutaarsiassat

Atuaruk

Tusagassiuutit

Ilisimatusarfik tusagassiuutini

Atuaruk