Suliffissat ingerlariaqqiffissallu

Suliffissat ingerlariaqqiffissallu

Ilisimatusarfik - suliffissat ingerlariaqqiffissallu.

Ilisimatusarfik (Kalaallit Nunatsinni Ilisimatusarfik) rektorissarsiorpoq ulloq 1. januar 2018 imaluunniit isumaqatigiissuteqarnikkut sulilertussamik. Atorfik tunngaviusumik ukiunik tallimanik killissaleriikkamik sivitsuinissamulli periarfissaqartumik inuttalerneqassaaq.

Kalaallit Nunaanni ilinniartitaaneq ilisimatusarnerlu pingaarnertut ilippanarnersaapput. Ilisimatusarfik 750-it miss. Ilinniartuutilik 100-llu miss. sulisulik Kalaallit Nunaanni ilinniarfiit- ilisimatusarfiillu annersaraat.  Ilisimatusarfimmit neqeroorutigineqarput ilinniartitaanerit aalajangersimasumik sammivillit kiisalu akademiskiusut- bacheloritut, kandidatitullu, ph.d.-mik ilisimatusarneq aamma ilisimatusarneq tunngavigalugu ilinniartitsineq qaffasissoq nunarsuarmioqatigiinnut nallersuussinnaasoq. Taamaattumik Ilisimatusarfimmi rektorip Kalaallit Nunaanni inuiaqatigiinni suliffeqarfiit pingaarnersaannik akisussaasuussaaq. Siulersuisut pissarsiorput sulisussamik, Kalaallit Nunaanni inuiaqatigiinni pitsaasumik ineriartortitsisussamik akisussaaffimmillu kivitsisinnaasumik Ilisimatusarfimmik nukittorsaaneq aqqutigalugu. 

Ilisimatusarfik suliffeqarfiorusuppoq pilerinartoq akademiskiusoq. Ilisimatusarfimmit kajumilersinneqassapput ineriartortinneqarlutillu ilinniartut sulisullu pikkorinnerpaat nunarsuarmioqatigiinnut nallersuussinnaasunik ilinniartitaanernik- aamma ilisimatusarnernik avatangiiseqartut kalaallinik aamma issittumik tunuliaqutaqartut. Pitsaassuseq kiisalu ilinniartitsinerup ilisimatusarnerullu siammasissusaa suli ukkatarineqassapput. Angusat pilersinneqassapput Ilisimatusarfiup ilinniartuisa, ilinniartitsisuisa, sulisut allat inuiaqatigiillu ataatsimoornerisigut. Siulersuisunit sinaakkusiussat iluani rektori aqutsissaaq, isummersuissaaq aamma siunnerfilersuissaaq.

Ukiuni tulliuttuni Ilisimatusarfiup siulersuisui marlunnik immikkut ukkassiniarpoq: Ilinniartitsisunngorniarnermik ilinniaqqiffinnillu nukittorsaaneq ilisimatusarfiullu ingerlataanik tamanik ataatsimoortitsineq campus immikkoortortaqarfittut.

Aammattaaq ilisimatusarfiup Kalaallit Nunaanni avataanilu soqutigisaqaqatigiivinik suleqateqarnerup ineriartortinneqarnissaanik rektori suliniuteqassaaq.

Rektorinngortussaq ilinniagartuujussaaq, akuerisaasumik ilisimatuujusinnaavoq, ingammik Ilisimatusarfiup ukkataasa pingaarnerit iluani: humaniora, inuiaqatigiit pillugit ilisimasat aamma peqqinnissaq pillugu ilisimasat. Tamatuma saniatigut sulisussamik aqutsinermik misilittagalimmik ammasumik, oqaloqatiginnilluarsinnaalluni nikerartumillu aqutseriaasilimmik aqutsisuulluartumillu pissarsiorpugut. Siulersuisunit rektorimik pissarsiorpugut Ilisimatusarfiup ineriartortinnissaanut nukittorsarnissaanullu soqutiginnilluartumik, aqutsisutullu suliamut tunngatillugu aalajangikkanik tunngavilersuilluarsinnaasumik pitsaasumillu suleqatigiinnermik attassiinnarsinnaasumik illup iluani avataanilu. Ilisimatusarfimmi rektorinngortussamit paasineqarsimassaaq Ilisimatusarfiup immikkut ittumik periarfissai unammilligassaalu pillugit ilisimatusarfiaqqatut inuiaqatigiinnilu inukittunnguami sukkasuumik ineriartorfiusumi. 

Kalaallit oqaasiinik ilisimasaqarneq pitsaaquteqassaaq, kisianni piumasaqaataanngilaq. Siulersuisunilli pingaartinneqarpoq, ilisimatusarfiup ersarissarneqarnissaa rektorimit suleqataaffigineqassasoq kalaallit ilisimatusarfiattut nammineq oqaasilik namminerlu kulturilik ilisimatusarfiup nunarsuatsinnut ilisarnaataanut naapeqatigiissutiginianngikkaluarlugit.

Akissarsiat- atorfininnermilu atugassarititaasut

Atorfik maannakkut inissisimavoq LR 39. Aningaasarsiat LR 39-mi tapit aalajangersimasut ilanngullugit: 1. april 2017    65.671,52 kr.-upput qaammammut ukiumullu 788.058,24 kr.-upput.

Isumaqatigiissutit naapertorlugit atorfinitsitsineq tunngaviusumik pissaaq, kisianni qinnuteqartoq tjenestemand’itut atorfeqareersimappat Kalaallit Nunaanni pisortat suliffeqarfiini tjenestemand’it inatsisai naapertorlugit, tjenesmand’inut atugassarititaasut naapertorlugit atorfinitsitsisoqarsinnaavoq.

Atorfik tunngaviusumik ukiunik tallimanik killissaleriikkamik sivitsuinissamulli periarfissaqartumik inuttalerneqassaaq.

Akissarsiat- aamma atorfininnermut atugassarititaasut, kiisalu atorfininnermut atatillugu aamma suliffimmit tunuarnermut atatillugu angalanerit kiisalu pisattat nassiunnerinut tunngasut aaqqiivigineqassapput Namminersorlutik Oqartussat aamma kattuffiup isumaqatiginninniarfigisap akornanni isumaqatigiissut naapertorlugu.

Tunngaviusumik sapaatip akunneranut akunnerit 40-t suliffiuvoq. Atorfimmut atuuppoq, akunnerit annerpaaffissaannik aalajangersagaqanngimmat kiisalu sulinerusimanermut ajunngitsorsiaqarnissamut aalajangersakkat aamma ullunik sulinngiffeqarnissaraluanik annaasaqarnermut aalajangersakkat atuutinngillat. 

Naalagaaffimmi tjenestemandit aamma AC-isumaqatigiissutit assigiinngitsut naapertorlugit atorfillit, ilaatigut DJØF’ip finansministeriallu akornanni isumaqatigiissutit, Namminersorlutik Oqartussat ataani atorfininnermut atatillugu aningaasarsiaqaatiginagu sulinngiffeqarsinnaatitaapput. Taamatuttaaq Indenrigsministeriaqarfimmit kommunit aamma nunap ilaani immikkoortortaqarfiit piumaffigai, Namminersorlutik Oqartussat ataani atorfinittut aningaasarsiaqaratik sulinngiffeqarnissamik qinnuteqartunut akuersaartaqqullugit. Sulinngiffeqarnissamik aalajangersakkat inuup pineqartup Namminersorlutik Oqartussat ataani atorfinittup aappaanut aamma atuuppoq.

Suliffik Nuummiippoq.

Atorfimmut atasumik sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqareersimaguni sulisutut ineqarsinnaatitaanini tigummiinnarsinnaavaa. Inigisaq atorfimmut atavoq qimanneqassallunilu atorfimmit tunuarnermut atatillugu.

Atorfik pillugu paasissutissanik annerusumik pissarsisoqarsinnaavoq siulersuisut siulittaasuanut Minik Rosing-imut saaffiginninnikkut minik@snm.ku.dk

Atorfinitsitsinermi periusissaq

Ilisimatusarfiup siulersuisuinit atorfinitsitsinermut ataatsimiititaliamit qinnuteqartut piginnaasaat nalilersorneqassapput kiisalu qinnuteqartunik piukkussanik oqaloqatiginnissallutik. Oqaloqatiginninneq ingerlanneqassaaq sap. ak. 36-37. 

Atorfik pillugu paasissutissanik annerusumik pissarsisoqarsinnaavoq siulersuisut siulittaasuanut Minik Rosing-imut saaffiginninnikkut minik@snm.ku.dk. Ilisimatusarfik pillugu annerusumik atuarsinnaavat www.uni.gl.

Qinnuteqarnissamut killissarititaasoq il.il. 

Soqutiginnilluni qinnuteqaat, ukiuni tulliuttuni Ilisimatusarfik qanoq ineriartortinneqarnissaanik qinnuteqartumit takorluuinertalik, tamatumalu saniatigut ilinniarsimanermut, siusinnerusukkut suliffigisimasanik paasissutissartalik, soraarummeersimanermut uppernarsaatit kiisalu ilisimatusarnermut- ilinniartitsinermullu uppernarsaatitalik aamma aqutsinermik piginnaasalik ilalik nassiunneqassaaq.

Qinnuteqaat nassiunneqassaaq kingusinnerpaamik ulloq 25. august nal. 12.00 uunga job@uni.gl imaluunniit Namminersorlutik Oqartussat nittartagaanut uunga http://naalakkersuisut.gl/da/Naalakkersuisut/Job/Ledige-stillinger.

 


Attavissat

Assigiinngitsut aqqutigalugit attavigisinnaavatsigut

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk