Ilisimatusarfik anguniakkat 2015-2020

Ilisimatusarfik anguniakkat 2015-2020

Siulequt

Ilisimatusarfik – Kalaallit Nunaata universitetia - issittumi universitetiuvoq akuerisaq issittumi kulturinik, oqaatsinik, peqqinnermik inuiaqatigiilerinermillu ilisimatusarfiusoq ilinniarfiusorlu. 1984-imiilli universitetip piorsarsimavai ilisimatusarnikkut ilinniartitaanikkullu periarfissarpassuit pilerigineqartut, inerisittarlugillu ilinniartut angusarissaarnermikkut atorfininnissamut ajornartorsiunngitsut. Issittup qeqqani inissisimanermigut Ilisimatusarfik universitetiuvoq issittumi pissutsinut inuiaqatigiinnut, peqqinnermut kulturimulluunniit sammisuuppata ineriartortitsiviullunilu nutaaliorfiusoq, piffissami inuiaqatigiit ilinniarsimassuseq ilisimatusarnerlu atorlugit ungasissoq eqqarsaatigalugu ineriartortitsinissamut pisariaqartitsileruttorfianni. Ilisimatusarnikkut ilinniarsimassutsikkullu pitsaassuseq Ilisimatusarfiup tunuliaqutsigaa tassaassaaq inuiaqatigiit pisariaqartitaannut tulluuttooq nunallu unammilligassaanut iluaqutaasoq, pilersinneqartussarlu inuiaqatigiit attavigilluarnerisigut suleqatigilluarnerisigullu.

Inuiaqatigiit pilertortumik ineriartornerisa apeqqutinik nutaanik akisassaqartuarnera pisariaqartinneqalersippaa. Ilisimatusarfiup anguniagaraa suliaqarfiit annertusiartuinnarlutillu pitsanngoraluttuinnarnissaat, taamaaliornikkut universiteti Kalaallit Nunaanni ilisimatusarnikkut ilinniartitaanikkullu pisariaqartitanut naapertuuttumik tunniussaqartarniassammat. Ilisimatusarfiup anguniakkap tamatuma suliarinerani universiteti campusimut nukittuumut katersorniarpaa.

Ilisimatusarfimmi pikkoriffigineqareersut toqqammavigalugit ukiuni 2015-2020 anguniagassat tallimat nassuiarneqarput:

  1. Ilisimatusarfiup ilinniakkat ingerlareersut pitsaanerulersissavai nutaanillu aallarnisaaneq siuarsarlugu
  2. Ilisimatusarnikkut siunnersuisarneq piorsarneqassaaq kalaallinut issittumilu inuiaqatigiinnut iluaqutaasussanngorlugu
  3. Ilisimatusarfiup iluani suliaqarfiit assigiinngitsut immikkut iluaqutigeqatigiissinnaanerat suleqatigiissinnaanerallu siuarsarneqassaaq
  4. Ilisimatusarfiup ilinniartut atorfillillu nunarsuup sinnerani pissutsinut naleqqussarnissaat siuarsassavaa
  5. Ilisimatusarfiup iluani immikkut piginnaanillit eqqummaariffigineqarnerat qulakkeerneqassaaq 

Anguniagaq 1: Ilisimatusarfiup ilinniakkat ingerlareersut pitsaanerulersissavai nutaanillu aallarnisaaneq siuarsarlugu

Ilisimatusarfimmit allagartartaartartut Kalaallit Nunaanni suliffeqarfinni piumaneqartuupput, suliffigilikkaminnilu nalitunerulersaanermi ilisimasanillu nutaanik tunniussisarput. Ilisimatusarfiup pitsaassuseq nunarsuup sinneranut naleqqersuuttoq qulakkeerumallugu, aammalu inuiaqatigiit sulisoqarnikkut pisariaqartitaannut allagartartaartartut piginnaasaat nallersuussinnaatinniarlugitIlisimatusarfik imaaliussaaq:

  • Pitsaassutsimut politikki akuerineqassaaq atuutsinneqalerlunilu, taamaaliornikkut angujumallugu inuiaqatigiit pisariaqartitaannut piumasaannullu naapertuuttumik ilinniartitaaneq ingerlanneqartoq.
  • Suliffeqarfinnut atorfinitsitsisartunut suleqateqarnerup pisortatigoortumik aaqqissuunnissaa piorsarnissaalu ilaatigut pisortat namminersortullu suliffeqarfiutaannik isumasioqatigiissitsisarnikkut kiisalu ilinniagaqarfiit tamarmik atorfinitsitsisartunut isumaqatigiissuteqarnissaannik qulakkeerinninnissaq.  
  • Ilinniartitsisunngorniartarnerup iluarsaateqqinnissaa taamaaliornikkut angujumallugu atorfinitsisartut inuiaqatigiiillu piumasaat pisariaqartitaallu eqquutsikkumallugit meeqqat atuarfianni angusaasartut malunnaatilimmik qaffatsinneqarnissaat siunertaralugu.
  • Ilinniarnertuunngorniarfiillu suleqatigiiffeqalernissaq tassuunakkut angujumallugu ilinniartut aallartinnerannut atasumik ajornartorsiutaasartut qanoq iliuuseqarfiginissaat, pingaartumillu ilisimasanik aviffigeqatigiittarnissaq, suliniutinillu nutaanik ineriartortitsineq ataqatigiissaarinerlu.
  • Pikkorissartitsinerni workshopinilu ungasianiit ilinniartitsinerup atoruminarsarlugulu piorsarnissaa, ilanngulluguttaaq universitetinik allanik suleqateqarnermut atorneqarnerunissaa.
  • Bacheloritut ilinniarnernut tamanut atasumik kandidatimut tamakkiisumik ilinniartitaasinnaanerup eqqunneqarnissaa, taassumalu ataani issittumi pinngortitap, peqqinnerup inuiaqatigiillu immikkut ilisimatusaatigineqartarnissaat danskit nunallu allat universitetii suleqatigalugit.
  • Inuiaqatigiilerinermi ilisimatusarnernut atasunik inatsisinut tunngasut sammineqartarnissaasa piorsarnissaa.
  • Pinngortitamik ilisimatusarnerup bachelorinngorniutigineqartalernissaata aallartinnissaa.
  • Ilinniartut eqeersimaarnerusumik soqutiginartumillu ilinniartinneqartarnissaat eqqarsaatigalugu ilinniartitsinerup pædagogikikkut ineriartortinneqarnissaa.
  • Ilinniartut ilinniarnermi nalaani piginnaasamikkut qaffassarnissaat eqqarsaatigalugu oqaatsinik amerlanernik piginnaasaqalernissaannut kaammattorneqarnissaat, oqaatsit danskisut, kalaallisut tuluttullu pikkorissaatigineqartarnissaat, kiisalu ilinniarnermi nalaani periaatsinut ilisimatusaatinillu allaaserinninnissamut pikkorissartinneqartarnissaat.

Anguniagaq 2: Ilisimatusarnikkut siunnersuisarneq piorsarneqassaaq kalaallinut issittumilu inuiaqatigiinnut iluaqutaasussanngorlugu

Inuiaqatigiit kalaallit nutaaliornikkut piorsaajuarnissaq pisariaqartippaat nunallu ilisimatusarfigineqarneranik ilisimasaqarnerulerlutik. Ilisimatusarfiup siunertaraa inuiaqatigiit pisariaqartitaannut periarfissarititanullu naapertuuttunik amerlanerujartuinnartunut iluaqutaasumik suliaqartarnissani.

Inuiaqatigiinnut kiffartuussiviit pingaarnersaannut ilaasutut Ilisimatusarfiup ilisimasani atorusuppai, kalaallinut issittumilu inuiaqatigiinnut iluaqutaasumik, attaveqaqatigiinnermut inuiaqatigiinnut kalaallinut, suliffeqarfinnut soqutigisaqaqatigiiffinnullu. Taamattaaq ilisimasat paasititsiniutigineqarneranni oqallinnernilu Ilisimatusarfik annertunerujartuinnartumik nunarsuup sinneranut ilisimasanik tunioraasuussaaq.

Ilisimatusarfiup ilisimatusarnikkut inissisimanini piorsarusuppaa ima iliorluni:

  • Insituttini immikkoortortanilu tamani ilisimatusarnikkut anguniakkanik suliaqarnissaq.
  • Suliffeqarfiit inuiaqatigiinnullu kiffartuussiviit suleqatiginerujumallugit aaqqissuussinissaq.
  • Qulakkeerneqassaaq ilisimatusartut, ilisimatusaatit ilinniartitaanerillu imminnut iluaqutigeqatigiinnerunissaat, ilanngulluguttaaq inuiaqatigiinni suliassaqarfinnut atorfinitsitsisartunullu attaveqarnerunissaq.
  • Qulakkeerneqassaaq ilinniartitaanerit tamarmik naammattunik ilisimatuutut ilinniarsimasunik atorfeqartitsinissaat, taamaaliornikkut qulakkeerumallugu piorsarumallugulu immikkoortortani tamani qaffasissumik ilisimatusarnikkut pitsaassuseqartitsinissaq ph.d.-nngorniartunillu ilinniartoqarnissaat.
  • Issittup nunarsuup sinneraniit eqqummaariffigineqarnerulernerata atorluarnissaa Kalaallit Nunaata universitetillu nunarsuatsinni ilisimatusarfinni allani ilisimaneqarnerulernissaat angujumallugu.
  • Inuiaqatigiinnut attaveqarnerup ilisimasanillu ingerlatitseqqittarnerup piorsarnissaa, taamaaliornikkut angujumallugu universitetip ilisimasaasa iluaqutigineqarnerulernissaat.
  • Kalaallit Nunaata immikkut pingaarutilimmik inissisimanera atorlugu nunat inuiisa pisinnaatitaaffii pillugit nunanik allanik suleqateqarnerup siuarsarnissaa.

Anguniagaq 3: Ilisimatusarfiup iluani suliaqarfiit assigiinngitsut immikkut iluaqutigeqatigiissinnaanerat suleqatigiissinnaanerallu siuarneqassaaq

Inuiaqatigiit ullumikkut siunissamilu unammisassaqarput arlaqartunik pisariusunillu Ilisimatusarfiup aqqutit nutaat eqqarsariaatsillu suliassaqarfiit sungiusimasat akimorlugit ingerlasut atorlugit piorsaanissaanik pisariaqartitsilersut. Iluarsiissutissanik nutaanik nassaarniarnermi pisariaqartinneqarpoq Ilisimatusarfiup pikkoriffiisa atorluarnerisigut suliassaqarfiit akimorlugit suleqatigiinnerup piorsarnissaanut.

Ilisimatusarfiup peqataaffigaa suliassaqarfinnik nutaanik ilisimatusarnikkut ilinniartitaanikkullu pilersitsiortornissaq ima iliornikkut:

  • Suliassaqarfiit akimorlugit ilisimatusarnikkut suliniutit tapersersornissaat IlisimatusarfiupIlisimatusarnermut Siuarsaanermullu Aningaasaateqarfia aqqutigalugu.
  • Ilisimatusarnikkut suliassaqarfiit akimorlugit ingerlatsiviup piviusunngortinnissaa; Meeqqanik, Inuusuttunik Ilaqutariinnillu Ilisimatusarfik.
  • Inuiaqatigiit Aatsitassallu pillugit suliaqarfimmik pilersitsinissaq, taassumalu iluani uuliamut gasimullu tunngasut pillugit professoratimik aallarniinissaq, kiisalu EU-p aningaasalersugaanik ilisimatusarnikkut nutaaliornikkullu suliniutinut peqataanissaq.
  • Suleqatigiinnerup Greenland Perspektivep piviusunngortinnissaa.
  • Ilinniartitaanermut tunngasut ataqatigiissarneri qulakkeerlugit, ilinniartitaanerit ataasiakkaat ilinniakkamut tunngasut siuarsarneqarneri qajassuullugit.
  • Ilinniagartuunngorniarnerup ataatsimoorfiusumik sumiiffeqalernissaanik suliniuteqarneq maannakkut siunissamilu ilisimatusarnerit ilinniartitaanerillu kissaataat pisariaqartitaallu pitsanngorsarniarlugit. Nutaanik sanaartortoqarnissaanut siunertaavoq Ilisimatusarfiup ilinniartitaanerinik atatsimoorluni qanimut katersuuffeqalernissaq, tassunga ilanngullugit ilinniartut illussaat, timersortarfeeraq, ilisimatuut tikeraat unnuisarfissaat il.il. 

Anguniagaq 4: Ilisimatusarfiup ilinniartut atorfillillu nunarsuup sinnerani pissutsinut naleqqussarnissaat siuarsassavaa

Ilisimatusarfik tassaavoq issittumi universiteti nunarsuup sinnerani suleqateqartoq oqalliffinnilu peqataasoq. Ilisimasanik, isumassarsianik iluarsiissutissanillu aviffigeqatigiittarneq universitetip suulluunniit napassutaasa pingaarnerit ilagaat.

Ilisimatusarfiup nunanut allanut ilinniartut atorfillillu attaveqateqarnerat piorsartuarumavaa imatut:

  • Ilinniartut paarlaateqatigiinnikkut periarfissaannik paasissutissiisarnerup ilitsersuinerullu piorsarneratigut.
  • Nunani allani ilinniarfiit ilinniartunik paarlaattarnikkut, ilinniartitaanikkut ilisimatusarnikkullu suleqatiginerisa sukasarlugulu malersoqqittuarnerisigut.
  • Ilinniartut atorfillillu paasisassarsiorlutik ataatsimeersuariarlutillu angalasarnerisa kaammattuutigalugillu tapiissuteqarfigisarnerisigut.
  • Atorfillit atuartitsinertik qimakkallarlugu nunani allani ilisimatusarlutillu ilinniaqqittarnissaannik periarfissiinikkut aammattaaq atorfillit nunani allani ilinniaqqinnikkut suleqateqarnikkullu periarfissaat pillugit oqaloqatigisarnissaat ukiumoortumik atorfilinnik oqaloqateqartarnermut (MUS) atasumik.
  • Universitetit allat suleqatigalugit atorfeqartitanik aviffigeqatigiittarnerup inerisarneratigut.
  • Ilinniarfeqarfiit allat suleqatigalugit Nuummi ilisimatusartut ilinniartullu inissaannik amerlisaanikkut.
  • Ilinniartut nunanit allaneersut Ilisimatusarfimmi ilinniartarnissaannut aporfinnik piiaaqataanikkut.
  • Ilinniartut atorfillillu nunani allani saqqummersitsisarnissaannut kaammattuisarnikkut.

Anguniagaq 5: Ilisimatusarfiup iluani immikkut piginnaanillit eqqummaariffigineqarnerat qulakkeerneqassaaq

Ilisimatusartutut ilinniarnerup pitsaasup inerisarnissaa universitetip ingerlalluarnissaanut tunuliaqutsiissaaq. Ilisimatusarfiup ilinniartut pikkorinnerpaat ilippanaateqarnerpaallu ilinniartuutigalugillu pitsaasumik atorfeqartitsinikkut neqeroorfiginninnikkut nunamut tamarmut issittumilu ilisimatusarnermut iluaqutaasumik kivitseqataasinnaajumavoq.

Ilisimatusarfik pikkorissut ilippanaatillillu siusissukkut ineriartortittarnissaat ima sinaakkuserumavaa:

  • Ilinniartut kalaallit ph.d.-nngorniarumasut amerlisarnerisigut.
  • Ph.d-nngorniarluni ilinniakkat ataatsimoorluni aningaasalersorneqarsinnaasut amerlisarnerisigut.
  • Ph.d.-nngorniarfimmik immikkoortumik aaqqissuussinikkut ph.d.-mut ilinniarnerup siuarsarneratigut.
  • Ilinniartut suliaat inuiaqatigiinnut piukkunnartut siammarneqartarnissaasa qulakkeernerisigut, aammalu ilinniartut nunani allani bachelorinngorniutimik kandidatinngorniutimillu saqqummersittarnissaannut tapersiisarnikkut.
  • Ilinniartitaanerit sulianullu aalajangersimasunut peqataanerit piorsarnerisigut suliffeqarfiit, ilinniarfiit soqutigisaqaqatigiillu suleqatigalugit.

Ilisimatusarfimmi anguniakkat piviusunngortinnissaannut toqqammavissat

Ilisimatusarfik siumukassappat, anguniakkani angusarlugit suliffittut ilinniarfittullu pilerigineqarluni, taava makku tunngaviusumik eqqummaariffigineqassapput:

  • Suliffeqarfittut ineriartornermik pingaartitsinissaq sulisoqarnissarlu pitsaassutsimik anguniagalinnik sulinermikkut ineriartortuarnissamut piumassusilinnik.
  • Aqutsinerup iluarsaanneqarnerata peqataatitsinermik, akisussaaqataanermik ammanermillu toqqammaveqarnissaa.
  • Suleriaatsit ilisimatusarnikkut, ilinniagaqarnikkut ilinniartuunikkullu avatangiisinik kaammattuisut.
  • Ineqarnikkut angallannikkullu avatangiiseqarnissaq pitsaasunik.
  • Kiffartuussinikkut aaqqissuussaanerup ilinniarnikkut pingaartitanut tapertaalluarnissaa.
  • Aalajangiiniarnerit ammasuullutillu isertugaatsuunissaasa sulissutigineqarnissaa.
  • Pigisatigut pisuussutitigullu ilisimaarinnittuunissaq, ineriartuutaasinnaasunut aningaasaliisarnissaq aamma ineriartorneq imminut napatissinnaasoq angujumallugu aningaasaliiumasussarsiortarnissaq sulisussarsiortarnissarlu.

Attavissat

Assigiinngitsut aqqutigalugit attavigisinnaavatsigut

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk