Ilisimatusarfimmi - ujarlerpoq

Atagu!

Uuma najoqqutassap ikiussuaatit ilinniartitsisunngorniarnerni. Imaassinnaavoq allatat arlariarlugit atuartariaqaritit – taamaappoq ilinniartuugaanni. Allatanik naatsunik suliaqarnikuuvugut, atorluarneqarsinnaasunik. Allatat atorneqassapput ilinniartitaanerni, suliakkiissutinik suliaqarnerni, suliffimmilu misiliinerni.

Najoqqutassaq videortaqarpoq. Videoliat takutissavaat suliamut paasisimasaqarluartut apersorneqarnerat, nipilersornermik ilinniartitsinermi aammalu atuarfimmi IT. Ilinniarfissuarmi (Institut for Læring) ilisimatuut ilinniartitsisullu suliaqarput periaatsinik ineriartortitsinermik, atuartitsinermut atuarfimmilu sulinernut. Allatat videoliallu ilisimatuunit ilinniartitsisunillu suliarineqarput, taakku malinnaapput ineriartornernut pædagogikkip ilinniartitsinerullu iluani, namminnerlu ineriartornermik pilersitsipput. Najoqqutassaq naammassinngilaq. Immaqa naammassinngisaannassooq, ilisimasammi nutaat saqqummertuartarmata, ilisimatusaatit nutaat, atuarfinniit assersuutit, atuartitseriutsillu nutaat.

Imaassinnaavoq illit najoqqutassamut ilanngussaqarsinnaasutit, ilinniartitsisunngorniarnerni. Ilinniarfissuarminngaanniit najoqqutassaq una atorlugu, ilinniartitsisunngorniat ikiorusuppaat qanoq ilinniartitsisassanersut. Ilinniartitsineq tassaavoq, inuk akisussaaffimmik tigusigaangat ,inoqammut aaliangersimasumik ilinniartitserusulluni. Uagut nammineerluta atuakkamik atuarsinnaavugut imlt.

YouTube-miit isiginnaarluta, qanoq nalliuttumut kaagiliorsinnaanerluta. Taanna atuartitsinerunngilaq. Uagulli anaanatta takutippagu, qanoq kaagiliussanersugut, taanna taaneqarsinnaavoq atuartitsinermik. Tassanimi isumaliutigineqassammat, suut ilikkarneqassanersut, qanorlu pisoqarnersoq.

Allat ilikkartissallugit suligaanni oqittuinnaanngilaq. Ilinniartitsinermi annertooq pisarpoq ilinniartitsisup atuartumut ilisimasaminik ingerlatitseqqinneratigut. Ilisimasaqalernerli aatsaat pisarpoq, pineqartoq, ilitsersuunneqartorlu, nammineerluni perusussuseqarpat ilikkarniakkap tungaanut.

Matematikkimi ilinniartitsisuuniaraanni pikkorissoq, matematikkimik ilisimasaqartariaqarpoq. Tamannali pingaarnerunngilaq. Atuartup ilikkagaqarsinnaanera pingaarneruvoq, ilinniartitsisup takunnissinnaanera atuartut piginnaasaannik, suut sapinngilaat, suullu sapersaatigaat, qanorlu atuartut ilikkagaqarnerunissaminnut ingerlaqqissinnaanersut. Ilinniartitsisoq pikkorissoq suliaminut nukittuujussooq, pikkorissooq, aammali takunnilluartuusinnaasariaqarluni, meeqqat qanoq ilikkartarnerannut.

Inuiaqatigiit siunissaannut ilinniartitsisut pingaaruteqaqaat. Ilinniartitsisummi isumagisassarivaat, inuiaqatigiit ilikkagassaat qulakkiissallugit, inuiaqatigiinnut inunnullu ataasiakkaanut iluaqutaasussamik. Ilinniartitsisuuneq akisussaaffimmik annertuumik pingaarutilimmillu.


Ilinniartunik siunnersuineq

Ilinniarninnut tunngasunik siunnersorneqarusuppit?

Atuaruk

Ilinniartunik siunnersuineq - piffissamik inniminniigit