Ilisimatusarfimmi - ujarlerpoq

Ilinniartitseriaatsimi, Kulturit naapinneranni, allanngoriartornermilu masteri

2022-mi septembarimi ilinniagaq Ilinniartitseriaatsit, Kulturit naapeqatigiinnerat Allanngoriartornerillu atuutileqqaassaaq.

Ilinniartitseriaatsini, Kulturit naapeqatigiinnerini Allanngoriartornernilu masterinngorniarsinnaavutit ilinniartitsisuuguit nangitsiviusumillu ilinniagaqarusullutit taakkualu saniatigut suliffeqarfimmi suliffigisanni ineriartortitseqataarusullutit.

Ilinniagaq tamanna ilinniartitsisunit suleriaatsiminnik suliffigisaminnillu ineriartortitserusuttunit piffissap ilaani ilinniagarineqarsinnaavoq. Ilinniakkami pingaaruteqarluinnarpoq ilinniartunik allanik sungiusaqateqarnissaq ilinniaqatinullu qanittumik attaveqarlualernissaq.

Ilinniakkami siunertarineqarpoq ilisimatuutut misissuinermi paasisanik nutaanerpaanik ilinniartullu suleriaasiinik suliffeqarfiinillu aallaaveqarlutik ilinniarfinnik ineriartortitseqataasinnaasunik masterinngortitsinissaq. Ilinniartut ilinniarnerminni ilinniartitseriaatsinik kulturikkullu ajornartorsiutinik misissuinermi periaatsinik ineriartortitsissapput ilinniarfimmilu suliffigisaminni ineriartortitsinermik aallarniissallutik.

Ilinniagaq tamaat ilinniagarineqarsinnaavoq modulimilluunniit ataatsimik, soorlu 2022-mi ukiaanerani modul 1-imik, toqqaalluni ilinniartoqarsinnaalluni. Modulimik ataatsimik toqqaagaanni kingusinnerusukkut modulinut allanut ingerlaqqittoqarsinnaavoq masterinngorniarfinnulluunniit allanut qinnuteqartoqarsinnaalluni.

 

Ilinniakkap sannaa

Masteritut ilinniagaq ukiunik marlunnik sivisussuseqarpoq, sisamanik moduleqarluni semesterimilu ataatsimi 15-inik ECTS-eqarluni.

Moduli 1

Moduli tamanna ilinniartitsinermut ilinniarnermullu tunngavoq, ilinniartitsisut atuartullu akornanni atuartuinnaallu akornanni pisartut tamarmik sammineqartassallutik. Illoqarfinni, nuna tamakkerlugu nunarsuarmilu tamarmi ajornartorsiutaasartut, ilaatigut atuartut kulturikkut atugarisaat kinaassusiallu kiisalu ilinniartitsisut atuartullu atuartuinnaallu akornanni oqaatsitigut naapeqatigiinnerit, ingerlaavartumik sammineqartassapput. Aammattaaq ilinniartitsisup inissisimaffia attaveqatigiinnissamillu suliniuteqarneq klassimi kulturimut piumassutsimullu immikkut pingaaruteqarnerat ilinniartitsissutigineqartassaaq.

Moduli 2

Modulimi matumani ineriartornerit allanngoriartornerillu sammineqassapput, ingammik aktionslæringimik (akuunikkut ilinniarnermik) aktionsforskningimillu (akuunikkut ilisimatuutut misissuinermik) atuilluni. Ilinniagaqarnerup silarsuaani pissutsit ullumikkut qangalu atuuttut aallaavigalugit professionsteori (sulianik ingerlatsineq pillugu teorii) aamma organisationsteori (aaqqissuussamik ingerlatsineq pillugu teorii) atorlugit sulisoqartassaaq allanngoriartortitsinissaq siunertaralugu. Ilinniagaqarnermi killiffiit assigiinngitsut akornanni nooriarnerit ilanngunneqassapput.

Moduli 3

Moduli tamanna sammisat sisamat ukua arlaannik ukkataqarnissamut periarfissaavoq: faginik ilinniartitseriaaseq, nutaaliorneq, atortut digitaliusut atorlugit qaammaasaqassuseq imaluunniit IT kiisalu ilitsoqqussarinagit oqaasilinnut ilinniartitseriaaseq.

Moduli 4

Moduli tamanna ilinniakkami sammisami ataatsimi sammisaniluunniit arlalinni masterinngorniummik suliarinniffiussaaq.

Ilinniakkap ingerlannerani ilinniartut namminneq suliarisaminnik suliffeqarfinnilu qanoq atorneqarnerannik misissuinissamut periarfissaqassapput. Periaatsit nammineq ilinniartitsinermut atassuteqarluinnartut tamatumalu saniatigut ilisimatuussutsikkut atorsinnaalluartut atorneqassapput.

Ilinniartitsisoqartassaaq oqalugiarnikkut, sungiusartitsinikkut, utimut tunniussisarnikkut siunnersuinikkullu.

 

Ilinniartitsisut 

Ilinniakkami pisortaavoq lektori, ph.d. Steen Beck, Ilinniartitsinermik Ilisimatusarfimmi Pædagogikkimi ilinniartitsinermilu ineriartortitsivimmi pisortaasoq. Ilinniakkamut atassuteqarputtaaq ilisimatusarfimmi lektoriusoq, ph.d. Anders Øgaard, ilinniarnertuunngorniarfimmi lektori Per Lykke Søndergaard ilinniartitsisorpaaluillu allat.

 

Ilinniarfissaq

Ilinniagaq aaqqissuunneqassaaq Nuummi modulimi ataatsimi ullunik tallimanik sivisussusilimmik aamma ingerlaavartumik internetikkut ilinniartitsisarnikkut, ilisimatusaqatigiinnikkut illoqarfimmilu najukkami siunnersuisoqarluni ataatsimeeqatigiinnikkut.

 

Akia

Masterinngorniarfimmi semesteri ataaseq 15.000 kr.-inik akeqarpoq, tassa katillugit 60.000 kr. Taakkua saniatigut ilinniariarnermut atatillugu angalanernut, illusimmavinnut atuakkanut aningaasartuuteqarpoq ilinniartup nammineq sulisitsisuataluunniit akiligassaanik. Aammattaaq piffissaq ilinniartinneqarnermut, piareersarnermut, suleqatigiinnermut suliassiissutinullu atorneqartussat eqqarsaatigineqassapput.

 

Akuerisaanissamut piumasaqaatit

Matuminnga ilinniagaqarnissamik qinnuteqartut piumasaqaatit uku tunngavigalugit akuerisaasassapput:

  • Bacheloritut, atorfinissutissamik bacheloritut, ilinniaqqiffinni inuussutissarsiornermiluunniit atuartitsissuteqarsinnaanermi ilinniartutut ingerlaqqiffiusumik ilinniakkami angusisimaneq.
  • Minnerpaamik ukiuni marlunni suliamut tamatumunnga attuumassutilimmik misilittagaqarneq.

Qinnuteqartut akuerisaanissamut piumasaqaatinik eqqortitsinngitsut qinnuteqarnerminnut pissutaasumik kakkiussisinnaapput Ilinniartitsinermik Ilisimatusarfimmi/immikkoortortami pisortamik oqaloqateqarnermik malitseqarsinnaasumik.

Naatsorsuutigineqarpoq ilinniartoq suliaq pillugu atuakkianik danskisuunik tuluttuunillu atuarlutillu atuisinnaassasut.

 

Akuerisaanissamut qinnuteqarneq

Quppernerup matuma talerpiatungaani internetikkut immersugassaq aqqutigalugu akuerisaanissamut qinnuteqartoqarsinnaavoq.

Meeqqalli atuarfianni angajullernik ilinniartitsisut qinnuigineqassapput Ilinniaqqinneq aqqutigalugu qinnuteqaqqullugit.

Qinnuteqarnissamut killigitinneqarpoq marsip 1-iat 2022.

 

Ilinniakkap atuutilerfissaa

Septembarip 1-iat 2022.

Moduli 1 Nuummi Ilisimatusarfimmi ingerlanneqassaaq septembarip 5-9, 2022.

Moduli 2 Nuummi ingerlanneqassaaq 2023-mi februaarip qaammataani. Qassinganni ingerlanneqassanersoq qanittukkut nalunaarutigineqarumaarpoq.

 

Paasissutissat

Ilinniakkap aaqqissugaanerani ilinniagaq pillugu paasisaqarnerugit quppernermi matumani tuugassaq talerpiatungaaniittoq toorlugu.

Paasisaqarnerujumaguit attavigiuk Steen Beck, Pædagogikkimi ilinniartitsinermilu ineriartortitsivimmi pisortaq: stbe@uni.gl.

Ulloq qinnuteqarfissap killinga 01.03.2022
Aallartissaaq Moduli 1: 5 - 9 septembari 2022
Sumiiffik Ilisimatusarfik, Nuuk
Studieordning