Kalaallit Nunaani imarsiorneq suliap suussusaa apeqqutaalluni assigiinngiiaartumik ineriartorsimavoq. Soorlu ilaasortaatini, assartuutini, aalisarnerullu iluani pissutsi allanngorpallaarsimanngillat ukiuni kingullerni. Ukiunili qulini kingullerni allanngortoqarsimavoq uuliasiornermi, takornarianillu ilaasortaatini.

• Uuliasiornermi imarsiorneq ersarissumik qaffannikuuvoq 2009- miit 2013- ip tungaanut, siornatigummi uuliasiornermut umiarsuit ukiumut takkuttartut 2-3 missaaniit umiartornerillu ukiumut 8-9 missaaniik, qaffangaatsiarsimapput umiarsuit 21- inut umiartornerillu ukiumut 97- nngorlutik. Taamaakkaluartorli 2013- imi uuliasiornermi imarsiornerit assut appaqqissimallutik soorlu 2009- imitut, sulilu ulloq manna tikillugu appariartuinnarlutik.
• Takornariaqarnermili angallassineq allatut ineriartorsimavoq. Takornariartaassuit anginerit 500 sinnerlugit ilaasoqarsinnaasut nunatsinnut tikittartut ukiumut apparsimapput, taamaakkaluartorli umiarsuit mikinerusut, 200 ataallugit ilaasoqarsinnaasut, tikittartut qaffassimallutik. 2011- imi umiarsuit ukiup ataatsip ingerlanerani 60- iupput, 2014-imilu qaffassimallutik umiarsuit 90- inngormata, sulilu amerliartuinnarlutik.

Kalaallit Nunaata imartaani silaannap allanngoriartornerani misissueqqissaarnermut ilimagisaq ilaatiguinaq eqquuppoq, tassalu imarsiornermi suliaqarnerit qaffassasut.

Nunatta imartaani annaasiniaanerit qaffakkiartuaarsimapput, angallatillu annanniarneqartut amerlanerit umiatsiaaraallutik 30 fod ataallugu angissusillit.

• Annaanneqarsimasut agguaqatigiissikkaanni ukiuni kingullerni tallimani 93,3% aamma 98,1% missaani annaanneqarsimapput. Kisitsisit taakkua marluk ataatsimoortikkaanni annaassiniaanerit iluatsittut nunatsinni 94%- iupput. Soorunami pitsaanerpaassagaluarpoq 100% annaaneqartartuuppata, kisianni piviusorsiussagaanni taamaattoqanngisaannarnera pillugu 94% qaffasissutut nalilerneqarpoq.
• Navianartoq anerpaaq tassaavoq takornariartaatinik angisuunik ajutoortoqassagaluarpat. Tamanna pissutaaavoq isumalluutit annertoorujussuit annaassiniaanermi atorneqartariaqassammata, isumalluutillu ilaasa amigarneri pillugit ajoqusertut, ajunaartullu amerlasinnaallutik.

Taakkartorneqartuni pissutaapput immikkuullarimmat Arktis- imi silap issinnera, inoqarfiit sinerissami siammasimanerat, nunap anginerata, atortorissaarutillu killeqarnerat aammalu isumalluutit annaassiniarnermut atungassat killeqarnerat.

Kalaallit Nunaani sillimaniarneq marloqiusamik naalagaaffimmik kaalaallillu nunaani, pisortanit nakkutigineqarpoq. Suleqatigiilluassagaanni pisariaqarpoq suliassat ersarissumik agguataassallugit, ataqatigiissaartumillu suleqatigiissinnaaneq.

Suliat amerlanerit isumagineqartarput Kalaallit Nunaata politi- aniit aamma Arktis Kommando- miit. Sakkutuut sakkutooqarfimmut tunngasunik suliaqartarput aammalu suliassat inuiaqatigiinnut tunngasut isumagisarlugit, soorlu makkua, upalungaarsimaneq aammalu annaassiniarneq, inooqatigiinnerup iluani isumannaallisaanermut pingaaruteqaqisumik.

• Ajornartorsuit ilaat annaassiniaanermi tassaapput inoqarfiit siammasinnerat silallu allanngoriataartarnera, qisuariarsinnaaneq killilersimaartaraat. Upalungaarsimasullu Nuummi, kitaanilu eqikkarsimaneri ajornartorsiut millisinngilaat.
• Assersuutitullu atorsinnaavoq aggustimi 2015- imi uuliamik mingutitsinermik pasitsaassaq, Danmarksstræde Kalaallit Nunaata Island- illu akornani misissuiartorfigineqartussanngormat.

Ajutoorfiup ungasinnera silarluneralu pisuulluni Arktisk Kommando- p umiarsuaataa qaninnerpaaq aatsaat ullut tallimat qaangiummata apuuppoq.

Annerusumik anguniagaq eqqarsaatigissagaanni, kisitsisit takutippaat ulluinnarni ujaasinermut annaassiniaanernullu isumalluutit naammaginartut.

• Ajornartorsiut ernumanarneq tassaavoq annerusumik takornariartaassuarni ajunaartoqassappat. Aasaq 2016 aamma 2017-imi takornariartaassuaq Crystal Serenity- mik atilik 1700- inik ilaasulik Vancouver- iminngaanniit Nordvestpassage- koorluni Ilulissanut ingerlaarsimavoq. Kingornalu nutatta kitaata sineriaa sinerlugu Nuummukarsimalluni, tassanngaanniillu New York- imukarluni.
• Sillimaniarnermut pisortaqarfik malillugu nunatta periarfissaqartitai tunniussinnaasaalu naammassimanavianngillat Crystal Serenty ajutoorsimasuuppat, tassa taakkunani umiarsuarni annerusuni ajutoortoqassagaluarpat Danmark- imiit ikiorsiisussat kingusinaarsimassangaluaramik.

Misissunerup takutippaa pissutsini eqqaariikkani annaassiniarnerit iluatissappata, nunani tamalaani, nunamilu piffimmi suleqatigiinnermik pitsaasumik pilersitsisariaqartoq.