Tallimanngorneq februaarip 28-at 2020 Ilisimatusarfimmi nalliuttorsiorfiuvoq 31-nik bachelorinngortoqarlunilu 15-inillu kandidatinngortoqarmat.

Bacheloritut allagartartaartut immikkoortortani ukunanngaanneerput: 

• Aningaasaqarnermik Inuussutissarsiornermillu Ilisimatusarnermut Immikkoortortaq: bachelorit 3
• Inuiaat Kulturiannut Oqaluttuarisaanerannullu Immikkoortortaq: bachelorit 10
• Nutserinermut Oqaluttaanermullu Immikkoortortaq: bachelorit 3
• Inuiaqatigiilerinermut Immikkoortortaq: bachelorit 3
• Isumaginninnermut Immikkoortortaq: bachelorit 4
• Oqaasilerinermut, Atuakkialerinermut Tusagassiuutilerinermullu Immikkoortortaq: bachelori 1
• Teologiimut Immikkoortortaq: bachelori 1
• Peqqissaanermik Ilisimatusarfik: bachelori 1
• Ilinniartitsinermik Ilisimatusarfik: bachelorit 5

Kandidatitut allagartartaartut immikkoortortani ukunanngaanneerput:

• Inuiaat Kulturiannut Oqaluttuarisaanerannullu Immikkoortortaq: kandidatit 4
• Oqaasilerinermut, Atuakkialerinermut Tusagassiuutilerinermullu Immikkoortortaq: kandidatit 7
• Inuiaqatigiilerinermut Immikkoortortaq: kandidatit 4

Allagartartaartitsinerup nalaani Per Rosing bachelorinngortuni angusarissaarnerpaatut KNI-mit akissarsitinneqarpoq – aamma Camilla Kleemann-Andersen kandidatinngortuni angusarissaarnerpaaq Sulisitsisunit akissarsitinneqarpoq.

Allagartartaartortavut tamaasa ilinniagaqarnerminnik naammassinninnerannik pilluaqqungaarpagut.

Facebookitsinni allagartartaartoqarnerani assit alutornartorpassuit qimerloorsinnaavatit.

Nunarpassuarni nerisaqarnikkut mumisitsinerup (’Diet Revolution’) nunatsinni qanoq unamminartoqartitsinera pillugu adjunktip Aviaja Lyberth Hauptmannip podcatsiliaa soqutiginartoq tusarnaaruk.

Podcastimi Aviajap ilaatigut eqqartorpai nunatsinni nereriaatsip allanngornerujussuaq kalaalimernillu uumasuaqqat tappiorannartut.

Podcasti ilisimasassanik alutornartunik ulikkaarpoq – eqqarsalernarporlu peqqissuseq inunnut nunarsuarmullu qanoq pingaaruteqartiginersoq, taakkulu qanoq imminnut atassuserneqarsinnaanersut atassuserneqarsinnaannginnersullu.

Aviajap podcastiliaa uani tusarnaarsinnaavat:

• Nordic Foodtechip nittartagaa
  
• Apple Podcastit
• Spotify

Asasavut Kalaallit Nunaanni suliffeqarfiit, peqatigiiffiit & atorfeqarfiillu;

Ilisimatusarfik iluatsilluareersumik misileeqqikkusuppoq - taamaattumik nuannaarutigaarput qaaqqusinnaagassi Ilisimatusarfimmi 2020-imi Atorfinnik Nittarsaassinermut.

Atorfinnik nittarsaassisoqassaaq Ilisimatusarfiup kantiinaani tallimanngornermi apriilip 03-ianni 2020-imi, nal. 12.00 - 16.00 (nalunaarfissaq kingulleq: Marsip 13-iat 2020).

Atorfinnik nittarsaassinerup siunertaraa ilinniartut nunatsinnilu suliffeqarfiit attaveqatigiillualernissaat – taamaattumillu atorfinnik nittarsaassinermi ilissi suliffeqarfittut / peqatigiiffittut / atorfeqarfittut periarfissaqarluarpusi ilinniartorpassuarnut nittarsaannissassinnut.

Atorfinnimmi nittarsaassinissamut qaaqquneqarput Ilisimatusarfimmi ilinniartut tamarmik – Nuummilu inuusuttut ilinniarfiini ilinniartut tamarmik.

Allatut oqaatigalugu: Atorfinnik nittarsaassinermi ilinniartorpassuarnik siunissamilu sulisussassinnik naapitaqarsinnaavusi.

Atorfinnik nittarsaassineq aamma tamanut ammasuussaaq – taamaattumik Nuummi innuttaasut soqutiginnittut tamarmik tikilluaqqusaapput.

Nalunaarfissaq kingulleq: Marsip 13-iat 2020.

2020-miit 2022 ilanngullugu suliffeqarfiit Kalaallit Nunaanniittut Savalimmiuniittullu inuussutissarsiornermi ph.d.-nngorniuteqarnissamik qinnuteqarsinnaassapput.

Ph.d.-nngorniutit ingerlanneqassapput universiteti, kandidatinngorniamut akisussaasuusoq, suleqatigalugu. Universiteti nunami sumiusinnaavorluunniit.

Innovationsfondi qinnuteqarnissamut killigitinneqartoq apriilip 30-at 2020 sapaatip-akunnerinik arfinilinnik sioqqullugu qinnuteqaatinik tigusisinnaalissaaq.

Ph.d.-nngorniutit inuussutissarsiornermi ph.d.-nngornianut malittarisassianut naapertuutissapput, immikkut akuerisaassalluni suliffeqarfiup Danmarkimiinnani Kalaallit Nunaanniinnissaa Savalimmiuniinnissaaluunniit.

Katillugit DKK 5,1 mio. ph.d.-nngorniutinut taakkununnga immikkoortinneqarput – ukiumi ataatsimi ph.d.-nngorniutissamut akuersissutigineqartut nalingannut.

Ilisimatusarfiup Volunteer Programmia ilinniartunut periarfissiissaaq ilinniakkaminnik inuiaqatigiinnut attassusiinissamut - ilinniarnerminnilu piginnaasarilikkaminnik iluaqutaasussatut ineriartortitsillutillu atuinissaannut.

Peqatigiiffinni najukkaniittuni namminneq piumassutsiminnik sulinikkut ilinniartuvut eqqarsaatinik nutaanik nutaaliornermillu tapiissuteqassapput piujuartitsiffiusumik siunissaqarnissamut pisariaqartunik illoqarfinnilu silarsuarmillu tamarmik pitsanngorsaasussanik.

Ilinniartuvut peqatigiiffiillu suleqataasartut inuiaqatigiinnik nukittunerulersitsinissaminnik ilungersuutiginninnerminni pingaaruteqarluinnartunik misilittagaqalissapput – aammattaaq universiteteqarnerup inuussutissarsiornermut pisortaqarfinnullu atassuseqalernissaanik Ilisimatusarfiup anguniagaanik angusinissamut ikiuissallutik.

Ilissi peqatigiiffissinni Ilisimatusarfimmeersumik nammineq piumassutsiminik sulisumik sulisoqarnissaq soqutigineqarpat - immersugassaq matuma ataatungaaniittoq immersuinnassavarsi.

Paasissutissat immersukkassinniittut tunngavigalugit ilinniartunik ilissinnut tulluartunik peqatigiiffissinni nammineq piumassutsiminik sulisuusinnaasumik sapinngisatsinnik toqqaassaagut.

Immaqaluunniit specialit aallartingajalerpiuk / naammasserusuppiuk?

Inaarsaavimmut ilaaniarit!

Kandidatinngornianut tamanut specialiliaminnik aallartisalersunut, ingerlatsisunut ingerlatsisimasunullu tamanut neqeroorutaavoq.

Inaarsaavimmi immitsinnut kajumissisaassaagut.

Ataatsimoorluta nuannersumik ajornanngitsumillu specialelioqatigiissaagut.

Neriuppugut peqataarusussasutit!

Februarip 27-iani aallartilerpugut. Nal. 10, Uddannelsesbygning qernertoq Ilisimatusarfiup sanianiittumi. Aamma nal. 16.30 ingerlaqqinneqassaaq 10-nut piffissaqanngikkuit. Kaffi, tii aamma kaageqassaaq.

Aaqqissuussaq Aviaaja Lyberth Hauptmannimit juulip tungaanut ingerlanneqassaaq.

Peqataanissannut nalunaarit Aviaaja attavigalugu uunga: alha@uni.gl.

Aammattaaq apeqqutissaqaruit mailimut tassunga allallutit apeqquteqarsinnaavutit.

Nunatsinni ilinniagaqalernissamut qinnuteqarnissamut killigitinneqarpoq marsip 1-at 2020.

2020-mi septembarimi ilinnialerniarlutik Ilisimatusarfimmut qinnuteqarsimasorpassuit tamaasa misissorlugit qanittukkut aallartissaagut.

Qinnuteqarsimasut tamaasa nalunaarfiginissaannut qilanaarpugut – sulilu qilanaarineruarput ilinnialersussat aasami atuanngiffeqarnerup kingorna naapinnissaat.

Nalunngiliuk ilinnialernissamut akuerisaassarsimasut nalunaarsorneqarnerat nittartakkatsinni takusinnaagakku?

Ilisimatusarfik nunani assigiinngitsuni suleqatigissaarlunilu attavigisartagarissaarpoq uatsinni ilinniartut arlaqaqisut ilinniarnermi ilaani nunanut allanukarlutik ilinniariartartut iluaqutigingaartagaannik.

Nittartakkatsinni infogramimi takusinnaavat ilinniartut nunanut sorlernut ilinniariartarnersut.

Suleqatigisartakkatta attavigisartakkattalu nalunaarsorsimaffiat nittartakkatsinni takusinnaagakkit nalunngiliuk?

Ilinniarniartunik nunanit allamiunik Ilisimatusarfimmut ilinniarnermik ilaanik semesterimik ataatsimik atuartortunik tikeraartoqallattaartarpugut – ukiunilu kingullerni suleqatigisartakkavut nunanilu tamalaani attavigisartakkavut aqqutigalugit ilinniartorisartakkavut amerligaluttuinnarput.

Nittartakkatsinni ilinniartutsinnik tikeraanik infogramiliaq takusinnaavat.

Nalunngiliuk ilinniartut tikeraat Ilisimatusarfimmi ilinniarnerminni misigisaat nittartakkatsinni atuarsinnaagakkit?

Atuisutta nittartakkatsinni website periarfissaq nutaaq takusinnaavaat: ilisimatuut saqqummersitaannik ujarlertoqarsinnaavoq.

Atuakkiortoq, qulequtaq, imarisaa il.il. ujarneqarsinnaapput.

Saqqummersitanut quppernerput nutarterneqartuarpoq - taamaattumik suliamut tunngasunut isumassarsiornissamut alakkaagit.

Soorlu qaammatini kingullerni nutaarsiassani eqqaaneqareersoq, saqqummersitatta merchandise-iutittalu ilarpassui internetikkut pisiniarfitsinni pisiarisinnaavatit - aamma nutaarluinnarnik pisiassaqarpoq.

Internetikkut pisiniarfipput soorunami kalaallisuujullunilu qallunaatuujullunilu tuluttuujuvoq - aamma soorunami silarsuarmi sumiikkaluartunulluunniit nassiussisarpugut.