Ilisimatusarfimmi - ujarlerpoq

ROCKWELL KENTIP TUMAI ATUARLUGIT

30.05.2016

Nuannaarutigalugu nalunaarutigisinnaavarput Amerikkamiup Rockwell Kentimik atillup 1930-kkunni nunatsinniissimaneranik misissuinissamik NSF-mit aningaasaliiffigineqarnerput.

Nunatsinni Ilisimatusarfiup USA-milu ilisimatusarfiit marluusut Rochester Institute of Technologyp kiisalu Binghamton Universityp suleqatigiilluarnerisigut ilisimatusaatigalugu suliaqarnissamik National Science Foundationimit kiisalu Arctic Social Science Programmimit ukiuni marlunni atuuttussamik aningaasaliissutinik akuersissuteqartoqarpoq.

Misissuinissaq qulequtaqartinneqarpoq Rockwell Kent and Early 1930s Greenland: A Comparative View of Environmental, Social and Cultural Change in Comtemporary Greenland. Suleqatigiit tassaapput Jette Rygaard Axel Jeremiassenilu Ilisimatusarfimmeersut kiisalu USA-meersut Denis Defibaugh aamma Susan Vanek.

Piffissami aggersumi Rockwell Kentip nunatsinniinnermini suliarisimasaanik assigiinngittunik katersuineqassaaq, soorlu qalipagarisarsimasaanik, assilisaanik, allagarisarsimasaanik allanillu ilisimatusarnermi atorneqarsinnaasunik katersugaasivinni, allagaateqarfinni toqqorsivinnilu suleqatigiinnikkut misissuisoqassalluni.

Rockwell Kent, 1931-miit 1932 ilanngullugu Illorsuanni ukiisimavoq, assiliinermik suliaqartarluni qalipaasarlunilu. Kingorna nunatsinni ukiinini atuakkiarisimavaa, tamatumalu saniatigut Salamina Legacymik taasaminik aningaasaaateqarfiliorsimalluni nunatsinneersut qinnuteqarfigisinnaasaannik. Illorsuarni, Uummannami, Sisimiuni Nuummilu innuttaasunik maajimi juunimilu tamanut ammasumik ataatsimiisitsisoqartassaaq, taamatullu atuarfeqarfiit ilaannik suleqateqartoqassalluni, apersuisoqarlunilu misissuinertalimmik. Soorlu inuuniarnikkut sunniutaasimasut tamakkulu allanngoriartornerat ataqatigiissuteqarsinnaanerallu sumiiffinni taaneqartuni ilisimatusaatigalugu misissuinikkut suleqatigiissutigineqassallutik.

Meeqqat atuarfiini akullerni atuartut sumiiffinni taaneqartuni suleqatigineqassapput assigiinngitsunik sammisaqartinneqartassallutik, kingornalu suliat ataatsimut katersorneqareerpata nunasiaataanerup nalaani ullumikkullu atugassarititaasunut sanilliunneqassallutik, taamatullu inooriaatsip allanngoriartorneranni pissutsit atuuttut naleqqussarfigineqartarsimanerat ilanngullugu suleqatigiinnit nalunaarsorneqassalluni.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk