Ilisimatusarfimmi - ujarlerpoq

Immatrikulationstale 2016

01.09.2016

Rektori Tine Pars' Immatrikulationstale 2016:

"Aasaanerani kiassuaq qaangiutilerpoq, sulinngiffeqarneq qaangiuppoq ukiamullu ikaarsaalerpugut nutaanik nukissanissimalluta. Ilisimatusarfimmi ilinnialertussatut nutaatut, inuunermi kapitali nutaaq aallartilerparsi.

Ukioq manna ilinniartut 165-illusi Ilisimatusarfiup ilinniarfiinut quliusunut aallartippusi.

Ullumi pisussaq tassaavoq ilisimatusarfimmi ilinnialertussatut tiguneqarsimanermut pisortatigoortitsineq.  Tamanna pissaaq, qangaaniilli ileqquusoq naapertorlugu, rektorimit assamminneqarnikkut ilinniagartuut silarsuaannut tikilluaqquneqarnissigut.

Sumununa taava tikilluaqqusaalersusi? – Tassa imaappoq silarsuarmut ilisimatusarnermik tunngaveqartumut  ilinnialernissassinnut. Ilisimatuunit ilisimatusarnermik  aallussaqartunit ilinniartinneqarnissassinnut. Atuakkasi atuagassatullu najoqqutassasi ilisimatuunit allanneqarnikuupput, ilinniartitsissutigineqartut ilisimatusarnermit paasisanit tunngaveqarput ilisimatusarnermilu periutsinik ilinniartinneqassaasi. Amerlanersassi aalajangersimasumik atorfimmik siunertalimmut  bachelorinngorniarfik  toqqarsimavaaat, taakkuullusi aamma atorfimmut toqqakkassinnut piareersartussaavusi. Kisianni ilinniartitaanernut tamanut atuuttoq tassaavoq atuagarsornerit faginilu periutsit ilikkarnissaat. Tamassinnut neriuutigaara, qaammatini tulliuttuni misigisimajumaartusi ilinniagaq eqqortoq toqqarsimallugu, tamanna ilinniarnerup ingerlanerani nukinnik atuilluarnissamut  tunngaviulluinnartarmat.

Siorna ilinniarnerminnik naammassitippagut bachelorit 81-it kandidatillu aqqanillit. Kisitsisit taakku ukiumut aallartittartunut sanilliukkaanni takuneqarsinnaavoq  ilinniartut amerlasuut ilinniarnerup ingerlanerani taamaatiinnartartut amerlangaatsiartut. Affangajai!

Kisitsisit taakku immaqa ullumi  Ilisimatusarfimmut ilanngunneqarnissi malunnartinneqarnerani saqqummiuttariaqanngikkaluarpakka. Kisianni taamaaliorpunga pissutigalugu ilissinnut anngukkusukkakku, ukiut pingasut qaangiuppata allagartartaassasi tigorusukkussigit, ilinniarnissarsi nukinnik annertuunik atuinermik ilinniarnermillu qitiutitsilluni aallussilluarnermik pisariaqartitsimmat.

  • pisariaqarpoq oqaatsit ilinniartitsinermi atorneqartut ilisimaarinissaat tassalu qallunaatut, tuluttut aamma kalaallisut
  • pisariaqarpoq atuagassatut najoqqutassap imartuup atuarsinnaanera paasisimanissaalu
  • pisariaqarpoq ilinniartitsinermi  peqataalluartarnissaq  misilitsittarnissarlu
  • pisariaqarpoq qanimut suleqatigiissinnaaneq kaammattoqatigiissinnaanerlu – fagini, inuttullu, kiisalu pisariaqarluni ilinniarnermi atukkat pitsaasuunissaannut akisussaaqataanissaq

Ilisimatusarfimmit qitiutinneqarpoq tapersersorneqarnissarsi. Qallunaatut piginnaasaminnik qaffassaarusuttunut pikkorissarnerit qallunaatut allattariarsorneq qaffasissoq aallaavigalugu ingerlattarpagut, ilinniartitsisut atorfilittavut  ilinniartitsinissaminnut siunnersuinissaminnullu piareersimapput, ilinniartunullu sullissivik apeqquterpassuarnut akissutissarserusutassinnut ikiuunnissaminnut piareersimapput. Ilinniartunut siunnersorteqarpugut ikorfartorneqarnissamillu periarfissaqarluni inuttut ataasiakkaatut unammillingassat pillugit oqaloqateqarnissamik pisariaqartitsisunut. Kisianni piumassuseq nikallujaassuserlu angusassap angunissaanut – tamanna ilissi nammineq akisussaaffigaarsi! Ataatsimoorfiusunut akuunissarsi isumagisiuk immissinnullu pisussaaffileritsi atuakkerinermi suleqatigiinnissassinnut, kiisalu immissinnut tapersersoqatigiillusi ataqqeqatigiinnissamut!

Atuagassiatsinni nutaami (profilmagasinami) atuarsinnaavarsi ilinniartut nunani allani paarlaasseqatigiinnikkut ilinniariarsimasut ilaat. Ilinniartuutivut amerlingaluttuinnartut nunanut allanukartalernikuupput, paarlaasseqatigiinnikkullu ilinniartunik nunanit allaneersunik amerlingaluttuinnartunik ilinniartuuteqartalernikuulluta. Ilisimatusarfimmit pingaartinneqarpoq ilinniartitaanerit maani ingerlanneqartut ilinniartuutivullu nunarsuarmioqatigiittulli qaffasissuseqassasut. Taamaattumik periarfissaq aamma atorsiuk semesteri ataaseq  amerlanerilluunniit ilisimatusarfinni allani ingerlallugit. Ungasinngittumi maani Nunarsuarmiut Ulluat (International Day) ingerlanneqassaaq, taamaattumik aggerniarisi Europami imaluunniit USA-mi imaluunniit nunani allani pissanganartuni periarfissat suunersut paasiniarlugit.

Kalaallit nunaata ineriartornissaanut ilinniartitaaneq pingaarnerpaavoq. Ilisimatusarfimmilu ilinniakkaminnik naammassinnittut suliffeqarfinni piumaneqaqaat.

Suliffeqarfinnit ilisarnaatitut piumasaqaat tassaavoq fagimut pikkorittuunissaq nammineersinnaassuserlu suliakkiissutit naammassineqarnissaannut. Ilinniartitaanerit ingerlatatta taamaattumik qulakkiissavaa pitsaassuseq qulakkeerlugulu fagip qaffasissusaata naammaginartuunissaa. Aappaagu ilinniartitaanernut ingerlatatsinnut tigutinnissamut piumasaqaatit sukateriffigineqassapput, tamatumunngalu pissutaavoq kissaatigigatsigu ilinniartuutissatta nutaat faginut oqaatsinullu suli pitsaanerusumik piginnaaneqarnissaat.

Qinnuteqartut 370-iusimapput, ilissilu taakkuullusi ukioq manna ilinniartussatut toqqangaasimallusi! Oqalugiarnera naggaserusuppara kaammattorlusi ilinniarnermi inissaq paarilluaqqullugu nukisilu ilinniarnissinnut atorluarlungit!

Tikilluakuttooritsi, naapinnissassinnut  qilanaarpugut."



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk