Ilisimatusarfimmi - ujarlerpoq

Tusagassiuutinut nalunaarut: Ilisimatusarfiup ukiumoortumik nalliuttorsiornera 2016

23.09.2016

Ilisimatusartut naammassisartut pikkorissut amerlasiartuinnarput - Ilisimatusartutut ilinniarneq pitsaamik ineriartorpoq

Ilisimatusarfiup ukiumoortumik nalliuttorsiornerani 23. september 2016 rektor Tine Pars ph.d-inngortunik marlunnik uppernarsaasiivoq, taakku tassaapput Lars Demant-Poort aamma Anders Øgaard.

Ilisimatusartutut ilinniarneq universitetip ineriartorneranut toqqammaviliisarpoq, taamaaliornikkummi nunatsinni issittumilu pissutsinik ilisimatusartussanik universiteti imminut pilersulersarmat. Nunarsuarmi sumiluunniit universitetit inuiaqatigiit ineriartorneranni, inuussutissarsiornikkut, ilinniartitaanikkut oqartussaaqataanikkullu pingaarutilimmik sunniuteqartarput.

Tine Pars oqarpoq:

"Universiteti ineriartorluarpoq. Universiteti sinnerlugu nuannaarpunga ph.d-inngornermik uppersaammik sulisut ilaat marluk tunisinnaagakkit, aamma nuannaarpunga ukiuni kingullerni ph.d-inngorniartunik amerlasiartuinnartunik ilinniartoqalersimagatta ukiuni aggersuni Ilisimatusarfiup ilisimatusartussaanik ilinniartitsisussaanillu".

Maliina Abelsenip Ilisimatusarfimmi oqalugiarnera: 

Ilisimasasi saqqummiussortuarniarsigit

Maliina Abelsen ukiormanna nalliuttorsiornermi oqalugiartuuvoq. Oqalugiaammini ilisimatusartunut kaammattuivoq Ilisimatusarfimmi ilisimalikkatik tunioraallugillu siammartertuassagaat.

Maliinap ilaatigut oqaatigaa universitetip eqqarsaatigiuassagaa Ilisimatusarfimmi ilisamatusaatit inuiaqatigiinnut iluaqutaanerpaalernissaat siunertaralugu qanoq siammarterluarneqartarnissaat, taamaaliornikkut inuiaqatigiinni ajornartorsiutinik qaangiiniarnermut iluaqutaajumalluni.

Ilisimasaqarneq pisussaaffiliivoq pingaartumik nunami ilinniarnikkut kinguaattooqqaffiusumi.

Ilisimasaqarnermi pisussaaffiliivoq, pingaartumik nunami ilinniarsimassutsikkut amigaateqartumi naligiinnginnermut pissutaasumik:

Taamaattumik ilissi ilaannikkut sapiillisaartariaqartassaasi, akerlilerneqangaatsiartarnissarsimi ilimagisariaqarassiuk. Iluarneruvoq sapiillisaarnissaq akerlilerneqaraluaraanniluunniit ilisimasat toqqorlugit atorneqanngilluinnarneranniit. Ilisimasasi saqqummiussortuarniarsigit ilissinnullu sukasartuarlusi”, taama Ilisimatusarfiup ilisimatusartuinut Maliina Abelsen kajumissaarivoq.

Ilisimatusarfiup ukiumoortumik nalliuttorsiortitsisarnera ileqqunngorsimavoq universitetip aallarnerneqarnerminik nalliussisarnera, ullortaaq taanna eqqorlugu universiteti ph.d-inngornermik uppernarsaatinik ilinniarlutik naammassisunut tunniussisarpoq.   

Universitetip ilinniartuisa atorfillillu saniatigut Namminersorlutik Oqartussaneersut aamma Kommuneqarfik Sermersuumeersut peqataapput, taamattaaq inuutissarsiortut, atorfinitsitsisartut allallu suleqatigisat nalliuttorsiornermi qaaqqusaallutik.

Ilisimatusarfimmi ph.d-inngorniutit uani nassaarisinnaavatit.

 

Sukumiinerusumik paasissutissiisinnaavoq:

Rektori Tine Pars tlf. +299 38 56 02, email tipa@uni.gl



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk