Ilisimatusarfimmi Isumaginninnermi siunnersortit ulluat
24.04.2017
Ilisimatusarfiup Isumaginninnermut siunnersortinngornianut immikkoortortaani Isumaginninnermi siunnersortit ulluannik taallugu aaqqissuussipput tallimanngornermi apriilip 21-anni.
Ulloq sammisaqarfiuvoq qitiutillugit isumaginninnermi suliassanik paasisimasaqarneq, isumaginninnermut politikki, isumaginninnermi pisortatigut ingerlatsineq kiisalu isumaginninnermi suliassanut piginnaanngorsaaneq. Isumaginninnermut siunnersortit inuiaqatigiinni kalaallini pingaaruteqarluinnassusiata sammineqarnerunissaa upernaaq manna pingaartissimavarput – kiisalu Ilisimatusarfimmi ilisimatusarnikkut sulinerup pitsaanerusumik paasissutissiissutigineqartarnissaa.
Inuiaqatigiit atugarissaarnerannut ineriartornerannullu isumaginninnermi suliaqarneq isumaginninnermilu ilisimatusarneq pingaaruteqarluinnarput – soorlu saqqummiisunit peqataasullu oqallinnerisigut ersersinneqartoq.
Ulloq suliamut tunngasunik saqqummiisoqarluni nuannersumik ingerlanneqarpoq peqataallutik Isumaginninnermut Aqutsiveqarfimmeersut, isumaginninnermi siunnersortit peqatigiiffiannit NIISIP-imeesut, ilisimatuut, ilinniartitsisut kiisalu nunanit allaneersut. Saqqummiunneqartut ilaatigut makkuupput:
- Isumaginninnermi siunnersortinngorniarnerup siunertaa
- Isumaginninnermut Aqutsiveqarfik nutaaq
- Dislocation - ”claiming our place” - indigenous women & natural ressource development in Canada’s North
- Isumaginninnermi qitiusumik allaffissorneq ukiuni 50-ini & isumaginninnermi suliassanik paasisimasaqarneq
- Peqatigiiffiup NIISIP pingaaruteqassusia
- “Community perspektivimi” isumaginninnermi pinaveersaartitsinermik suliaqarneq
Ilisimatusarfiup YouTube-kanalia atorlugu saqqummiinerit tamarmik toqqaannartumik aallakaatinneqarput –aaqqissuussarlu tamakkerlugu nittartakkatsinni takoqqinneqarsinnaavoq.
Naatsorsuutigineqartumit amerlanerusut, tassalu 50-it sinneqartut, aaqqissuussami peqataapput. Isumaginninnermi siunnersortit ulluat ukiumoortumik pisartussatut kissaatigineqarpoq.
Ullormi pisumit assit takusinnaavatit Facebookimi quppernitsinni.