Ilisimatusarfimmi - ujarlerpoq

Ilisimatusarfimmi Isumaginninnermut siunnersortinngorniarneq suliamut tunngaviit misissuiffigeqqaarnagit Naalakkersuisumit matuneqalerpoq

01.04.2017

Uannga: Steven Arnfjord, Sara Abelsen, Martha Lund Olsen, MarieKathrine Poppel, Peter Berliner, Jeanette Sandy Shalmi

Isumaginninnikkut suliamut piginnaasallit aalajaatsut atorfissaqaleruttorfiisa nalaani, isumaginninnermullu siunnersortinngorniarnerup- ilisimatusarnerullu pisariaqaleruttorfiisa nalaani, Doris Jakobsen pineqartunut nalorninartorsiortitserusuppoq. Taamatut misigisimanarpoq Naalakkersuisoq TV-kkut isiginnaareerlugu kiisalu Ilisimatusarfimmi isumaginninnermut siunnersortinngorniarneq matuniarlugu pilersaarutini attatiinnarniarlugu Sermitsiaq nr. 12-mi aalajangiusimammagu.

Sermitsiaq nr. 10-mi allaatigisatta siulliup matumalu akissutip akornanni Isumaginninnermut Naalakkersuisoq tusagassiuutiniippoq isumaginninnermut siunnersortit inuiaqatigiinnut pingaaruteqarluinnartumik suliaqartut oqaatigalugu. Isumaginninnermut siunnersortit 80-it miss. amigaatigineqartut Isumaginninnermut Naalakkersuisumit oqaatigineqarpoq – aamma isumaginninnermut tunngasunut piginnaasat qaffasissut annertumik pisariaqartinneqartut allaatigineqarpoq.

Doris Jakobsen oqarpoq, Nuup avataani isumaginninnermut siunnersortit aamma sulisussaasut. Tamanna pisussaavoq. Aviisimi allaatigisatsinni siusinnerusukkut erseqqissaatigivarput, illoqarfiup pingaarnersaata illoqarfiillu allat akornanni saqitsaannerunngitsoq. Immaqami oqallinnerup tassunga sangutinneqarnissaa Naalakkersuisumit kissaatigineqarpoq. Tassunga sangutillugu oqallittoqarnissaa kissaatiginngilarput. Illuutit, illoqarfik pingaarneq, illoqarfiit minnerit, nuunnissarlu pineqanngillat. Isumaliutersuutigineqartulliuna kingunerisinnaasai, isumaginninnermut siunnersortinngorniarluni ilinniartut nunarsuarmioqatigiinnut nallersuunneqarsinnaasumik ilinniartitaanerisa iluatsileruttortup ajalusoornissaa pineqartoq. Ilisimatusarfimmi sulisut immikkut ilinniagallit piginnaasaat atorluarlugit piffissami aalajangersimasumi avataaniit ilinniartunik avataaniillu ilinniartitsisunik soqutiginnilersitsisimavugut.

Nuup-ilinniartitaanerinngilaa – uani pisumi taamaattoqanngilluinnarpoq. Kisianni uani ilinniartitaaneq pineqartoq tassaavoq, suliamut ilinniarluarsimasunik avatangiiseqarluni ingerlanneqartariaqartoq. Psykologiimut saatsinniarneqassanngilaq, taannaammat perorsaasut suliaminnut piginnaasaat. Katsorsaasuussanngilagut. Isumaginninnermut siunnersuinermi pineqartarput inuiaqatigiit inuit ataasiakkaat avataatigut, inuiaqatigiit sumiiffinniittut, ilaqutariit peqqissuunissaat, suliamut piginnaasallit akimorlugit attaveqaatinut aqqutissiueqataasutut isumaginninnermut siunnersortitut inissisimanerup pingaaruteqassusaanik paasinninneq pilersitsinerlu.

Suliamut piginnaasat aamma pitsaassuseq pineqarput.

Taaguutit immaqa inuit ilaannut pingaaruteqarpallaanngillat, kisianni uani pineqarput innuttaasut ingerlalluarnissaat siunissamilu nukissaqarluarnissaat. Qitiusorlu tassaavoq: ilinniartittarpavut pitsaalluinnartumik sullissisussat kiisalu ilinniartitaanermik ineriartortitsinikuuvugut ilisimatusarnikkut tunngavilimmik inuiaqatigiinnullu iluaqutaasussamik. Isumaginninnermut siunnersortit ilinniartittarpavut, innuttaasunik ikiorneqarnissaminnik pisariaqartitsisunut tappissuunissaannut – soorlu meeraq ajornartorsiortoq, arnaq persuttagaasartoq, angerlarsimaffeqanngitsoq imaluunniit innarluutilik takusinnaallugulu suliamut piginnaasat tunngavigalugit piaartumik iliuuseqarsinnaasoq. Isumaginninnermut siunnersortinngorniat massakkorpiaq suliassanik suliaqarsinnaasunngorlugit ilinniartittarpavut.

Sulianik taama ittunik matusineq allamilu assinganik pilersitsiniarsarineq suliamut piginnaasanut kinguneqassaaq.

Nuna tamakkerlugu isumaginninnikkut sullissisoqarnissaanik pisariaqartitsisoqarnera ilisimalluinnarparput. Tamannalu pillugu ilinniartut oqaluttuuttarpavut. Kisianni sungiusarneq ilinniarluarsimasunik sulisoqartumi atortorissaarfiusumilu inissisimasariaqarpoq. Tassalu Ilisimatusarfimmi.

Suliffimmik sungiusarfiit qanittumiittariaqarput, isumaginninnermut siunnersortitut ilinniarsimasunik suliffimmik sungiusarlutik ilinniartunut siunnersorteqarfiusumi. Ukiut sisamat kingulliit ataasiinnarmik peqarpugut,  ATAASEQ Ilulissani suliffimmik sungiusarfissatut pitsaassutsimik naammassinnittoq, tassalu taanna siunissami ilinniartitaanerup nuuffissaatut Doris Jakobsen-ip pilersaaruteqarfigisaa.

Nuup avataani ilinniartuutivut sulerusuttarput, sutigullu tamatigut tapersersorneqartarput, attaveqaatigullu neqeroorutigisarpavut. Oqartarpugut: ”Aallarsinnaasut: angerlaritsi piginnaasassinnillu avitseqatiginnigitsi. Pisariaqartinneqarpusi”.

Kisianni aatsaat tamanna pisinnaavoq pitsaasumik ilinniartinneqareernerup kingorna – Ilisimatusarfimmilu tamanna tunniussinnaavarput.

Ilinniartitaanerit aalajangersimasumik sammivillit ilinniartitsisuisa qaffasissumik ilinniarsimasut aamma ilisimatuut ph.d.-mik tunuliaqutaqarlutillu saqqummersitsisimasut Ilisimatusarfiup avataani sumi allami pigineqarpat? Piginnaanerit taama ittut aatsaat ukiorpassuit ingerlanerini pilersinneqarsinnaasarput. Pigineri nuannaarutissaapput.

Naalakkersuisupakissutaani arajutsineqarsinnaanngilaq, Ilisimatusarfimmi suliamut ilisimasalinnik avatangiiseqartumik isatsitserinissamik kissaateqarnini pillugu suliamut tunngavilersuummik immikkuullarissumik taasaqanngimmat.  Naalakkersuisoqtakorluugaqarpoq inornartumik, tassalu ukiut ikittuinnaat qaangiuppata Ilulissani immikkut ilinniarluarsimasunik nunarsuarmioqatigiinnullu nallersuussinnaasunik ilinniartitaanernik- ilisimatusarnermillu pilersitsisoqarsinnaasoq.

Naalakkersuisup akissutaata paasinissaanut ikiorneqartariaqarpugut. Allaatigisarput siulleq pillugu ilinniartitaanermut naalakkersuisoqarfimmit akiniaasaarneqarsimavugut. Suliamunngooq piginnaasat qulakkeerneqarusupput ... Kisiannimi qanoq?

Mianerinnissuseqartumik: Naalakkersuisup akissutaa ajornanngititsivallaarpoq, oqittorsiortitsivallaarpoq piviusorsiunngippallaarlunilu.

Allaatigisatsinni inatsit pisoqaq innersuukkatsigu ilumoorpoq – tamatumunnga perorsaasunngorniarluni ilinniarfiup SPS ilinniartitaanerup aaqqissugaanerani namminneerlutik inatsit taanna atormassuk pissutaavoq. Naalakkersuisup immaqa takusinnaavaa sumiiffiit ilaanni pissutsinut malinnaasoqartoq.

Naalakkersuisup akissutaa paatsuugassaanngitsumik ilinniartitaanermut tunngavoq, ilisimatusarnermullu tunngasunik akineqarnissarput amigaatigaarput.

Naalakkersuisumit isumaginninnermut tunngasunik ilisimatusarneq qanoq inissisimatinneqarpa, taannami akisussaaffiata aamma iluaniippoq?

Ilisimatusarfimmi isumaginninnermut tunngasunik ilisimatusarneq imaassimanerpa aamma taanna matuniaraa?

Tassa imaannerluni, Naalakkersuisumit kissaatigineqartoq isumaginninnermut siunnersortinngornianik ilinniartitsinermi tunngavissanik kalaallinut tunngasunik ilisimatusarneq unitsinneqassasoq – piffissamut kinguariarluni? Isumaginninnermut siunnersortit, innuttaasunik kalaallinik sullissisut, nunap avataani isumaginninnikkut ilisimasat allagartalersuinnakkat kisiisa atussavaat?

Inatsisartut inatsisaat nr. 6, 6. Juni 2016-imeersoq innersuussutigineqartoq, atuaraanni pineqartoq qanoq qaangerneqassanersoq allaqqasoqanngilaq. Isumaginninnermut siunnersortinngorniarneq Ilisimatusarfik pillugu Inatsisartut inatsisaat nr. 19, 19 november 2007-imeersup ataaniikkunnaassappat, siunissamilu Inatsisartut inatsisaat nr. 6, 6. Juni 2016-imeersup ataaniilerluni, taava isumaginninnermut siunnersortinngorniarnerup pitsaassusaata appartinneqarneranik kinguneqassaaq.

Siunissami qulequtassaq immaqa imaassaaq: ”Suliamut tunngatillugu pitsaassuseq Doris Jakobsenimit qulakkeerneqanngilaq”.

Aamma akissutigineqarpoq: "Aalajangersimasumik sammivillit bacheloritut ilinniartitaanerit ilisimatusarfimmi bacheloritut ilinniartitaanernut piffissap ingerlanerani sanilliunneqarsinnaalissapput.”

Isumaginninnermut siunnersortinngorniat ilisimatusarfimmi bacheloritut qaffasissusilimmik maannakkut ilinniartinneqartarnerat Naalakkersuisumit ilisimaneqarnerluni – 2007-imiilli aallartippugut?  

Tassa imaappa: kingumut ineriartortoqarnissaa Naalakkersuisumit kissaatigineqartoq?

Suliamut piginnaasanut tunngavilersuutit itisilernerunissai Naalakkersuisup akissutaani takussallugu naatsorsuutiginaraluarpoq. Pissutsit imaannaanngitsut Isumaginninnermut tunngasut, ilinniartunut tunngasut, siunissami isumaginninnermut siunnersortinngortussanut tunngasut, isumaginninnermut tunngasunik ilisimatusarneq kiisalu inuiaqatigiit sullinneqartussanut tunngasut uani pineqarput.

Tusarneqarnissamut tunngaviusumik pisinnaatitaaffik maannakkut FN-ip nalaani oqallisaasorujussuuvoq. Pingaarluinnarpoq, ingammik inuiaqatigiinni minnerni. Isiginnittuusugut Naalakkersuisup tungaaniit – demokratiimut naleqqutinngitsumik aalajangeereerluni iliuuseqarneruvoq, aalajangiinerup kinguneranik sunnerneqartussat akuutinneqaratik. 

Aammattaaq ilinniartitaanermut ilisimatusarnermullu ullut tamaasa ilinniartullu suliavut nersorneqanngillat.

Naalakkersuit taakku marluk akornanni attaveqatigiinneq ajalusoorsimagunarpoq. 

Isumaginninnermut Naalakkersuisoq (IA), oqarpoq isumaginninneq qitiutillugu isumaginninnermut siunnersortinik ilinniartitsisoqartariaqartoq. Kommunimut qineqqusaarnermi IA-mit tamanna qitiutinneqarpoq.

Ilinniartitaanermut ilisimatusarnermullu Naalakkersuisup nipaa tassunga sammisoq sumiippa, ammasumik oqaaseqarnermi Ilisimatusarfimmi suliamut piginnaasallit ataqatigiissut isaterniarlugit kiisalu isumaginninnermut tunngatillugu ilinniartitaaneq ilisimatusarnerlu nukillaartinniarlugit oqaatigimmagu?

Pisariitsunnguamik siunnersuutissaqarpugut: kaffisoqatigiigitsi – aggerumaarpugut.

Maaniissinnaavusi - Tikilluaqqusaajuaannarpusi!

Usi: eqqaamallugu aggerniarisi Isumaginninnermut siunnersortit ulluanni ulloq 21. april.

Isumaginninnermut siunnersortit ulluanni sulerisarnersugut takusinnaavasi – kiisalu ilinniartitaanermut piviusumik pisariaqartitat aamma ilinniartitaanerup ilisimatusarnerullu.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk