Ilisimatusarfimmi - ujarlerpoq

Tusagassiortunut ilinniarfeqarneq ukiuni 35-ni

29.09.2017

Ilisimatusarfiup ukioq manna malunnartinniarpaa nunatsinni tusagassiortut ilinniarfeqarnerata ukiuni 35-ni atasimanera, ukiuni kingullerni qulini Ilisimatusarfimmut atalluni.

Nalliuttorsiorneq malunnartinniarlugu Ilisimatusarfimmi Tusagassiornermut Immikkoortortaq ilinniartitaanerup oqaluttuarisaanera pillugu atuakkiamik saqqummersitsivoq: ”Tusagassiornermik ilinniartitsineq 1982-2017 – Journalistuddannelsen i Grønland 1982-2017”.

Atuakkiami 112-inik qupperneqartumi oqaluttuarineqarpoq nunatsinni sooq qanorlu ililluni tusagassiornermik ilinniarfeqalersimanersoq. Ukiut 35-t ingerlaneranni, sioqqutilaarlugulu, pisimasut inunnit akuusimasunit soqutiginartumik oqaluttuarineqarpoq, ineriartornera allanngoriartorneralu oqaluttuarineqarlutik, soorlu ilinniarfiup 2008-mi Ilisimatusarfimmut ilanngutsitaanera oqaluttuarineqarluni. Ilinniarfimmi pisortaasimasut ilinniartuusimasullu ukiut ingerlaneranni pissutsinik ilungersunartunik namminnerlu misigisaminnik soqutiginartunik, nuannersunik quianartunillu oqaluttuarput. Tusagassiornermi ilinniarfiup tusagassiortorpaalussuit ukiut ingerlaneranni naammassitippai, suli amerliartorput.

Ilinniarfik mikisunnguuvoq, ukiullumi ingerlaneranni ”toqoriarneqartarsimagaluarpoq”, qujanartumik suli iluatsinngitsumik. Ilinniarfik siunissamut piukkunnarsarluni ilisimatuussutsikkut paasisat tunngavigalugit ilinniartitsinermut piareersarpoq, ilinniarnerullu qaffasinnerusumik anggusaqarfiusinnaalernissaa anguniarlugu suliniutit aallartereerput. Taama ineriartorneq ilinniarfimmut ilinniakkamullu mikisunnguamut pingaaruteqartorujussuuvoq.

Atuakkamut ilanngussisuni ilaatigut makku taaneqarsinnaapput: Aqqaluk Lynge, Ole Ramlau-Hansen, Svend Møller, Rie Rasmussen, Ole Marquardt, Sofia Geisler, Naimah Hussain, Malînánguaq Marcussen-Mølgaard, Noah Mølgaard aamma Tungutaq Larsen. Atuakkap naggataani tusagassiornermik ilinniarfimmi/immikkoortortami naammassisimasut tamarmik assingi isiginnaarneqarsinnaapput.

Atuagaq kalaallisut qallunaatullu allagaavoq, tuluttullu imaqarniliugaalluni.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk