Ilisimatusarfimmi - ujarlerpoq

Robab 90-liineranut atatillugu kaffillernermi oqalugiaat

17.04.2018

Gitte Adler Reimer,
rektori, Ilisimatusarfik

Robert Petersenip 90-iliinissaanut atatillugu saqqummersitsinitsinnut kaffillernitsinnullu tamassi tikilluangaaritsi, minnerunngitsumillu Roba qujanaq oqarasuaatikkut peqataasinnaagavit.

Roba apriilip 18-iani 1928-mi Maniitsumi inunngorpoq. 1948-mi ilinniarfissuarmi ilinniartitsisunngorpoq, 1953-milu Danmarkimi ilinniartitsisutut allagartartaarluni. Ilinniarnerit ingerlateqqippat, taamalillutillu 1967-imi Københavnip Universitetiani mag.art.-itut soraarummeerlutit. Kingorna, 1975-imi, Københavnip Universitetiani professorinngorputit. Ilisimatusarfiup aallarnisarneqarnera suleqataaffigaat, 1983-milu Ilisimatusarfiup aallarniutaa, Inuit Institutti, pisortaaffigilerlugu. 1987-imiit 1995-ip tungaanut Ilisimatusarfik universitetitut taaguuteqalermat rektoriuvutit soraanninngornissat tikillugu. 2010-mi Ilisimatusarfimmi siullersaallutit ataqqinaammik doktorinngorputit – tamanna pissusisamisoorluinnarpoq, illimmi Ilisimatusarfiup aallarniisorimmatit; professori kalaaleq siulleq, Ilisimatusarfiullu rektoreqqaava. Nersornaatinik arlalinnik tunineqartarsimavutit, suliatillu amerlangaarmata ulloq naallugu taagorsinnaagaluarpakka. Taakkuinnaat ullumi eqqaassavakka.

Suliatit amerlaqaat siamasissupilussuullutillu, tassami piginnaanitit tamatigooqaat. Ukiorpanni antroplogiimi oqaatsinullu tunngasunik inerititaqarluartumik sulisimavutit; tuluttut, qallunaatut kalaallisullu saqqummersitsisarlutit. Nunarsuup sinnerani Kalaallit Nunaanni pissutsini aammalumi inuiaat Inuit pillugit immikkut ittumik ilisimasalittut ataqqineqarputit.

Oqareernittut Ilisimatusarfiup aallarnisarneqarnera siuttuuffigaat – ullumikkullumi Ilisimatusarfimmut pilersaarutit aallartissimasatit suli atuupput, suliniutigisimasavit ilaat nutarterlutillu tulluarsagaasimallutik. Oqarsinnaagunarpugut ilinniakkat ilisimatusarnerillu Ilisimatusarfimmi taamani illit rektoritut pilersitseqataaffigalugillu piviusunngortissimasatit suli ulloq manna tikillugu  annertuumik sinaakkuttatut atorneqarmata – tassalu ilinniartitsineq ilisimatusarnerlu ilinniakkat sammivii assigiinngitsut akimorlugit Ilisimatusarfimmi suli ingerlanneqarmata.

Ilisimatusarfiup ukiut 30-nngormagit atuagassiami allatatit issualaassavakka:

”Qanga Inuit Instittuttip ilusissaa aaqqissuunnialeratsigu nalinginnaasumik isumaqartoqarpoq kalaallit universitetiat pingaarnertut kalaalerpalaartuussasoq aatsaallu tulliullugu universitetiussasoq. Taamani isumaqarpunga kalaalerpalaartuunissaa pinngitsoorneqarsinnaanngitsoq aatsaalli universitetinngorsinnaasoq ”narsaannarsuarmi universitetimit” qaffasinnerusumik pitsaassuseqarnissaa isumagigutsigu. Suliassaq sivisussagaluarpalluunniit naammassiniartariaqarparput. Pitsaassuseq siulliullugu, taavalu kalaalerpalaarneq .. Pingaarnerpaatut uanga isumaqarpunga nunani avannarlerni universitetit pitsaassusaattut issasoq, tamatumalu kingorna kalaallinut ilisimatusaatit qaffasinnerpaamiissasut, sulisussanik kalaallinik ilinniagartuunik ilinniartitsiviussasoq, tamatumalu kingorna Kalaallit Nunaanni innuttaasut universiteti taanna tulluusimaarutigissagaat namminneq pigisamittut”.

Isumaqarpunga taamatut siunertaqarsimanerit kingorna rektoriusarsimasut tapersorlugulu malissimagaat, soorlu aamma ullumikkut uanga taamaaliortunga. Oqarsinnaavugummi siunertaq aallartissimasat ullumi iluatsilluartumik anguneqarsimasoq.

Roba, Ilisimatusarfimmi ilinniarninni ukiorpanni ilinniartitsisorisimavakkit, ilinniarnermalu ingerlanerani ajunnginnerpaamik siunnersortarsimavarma aammattaarlumi inuttut pisariaqartitsigaangama ikiortarsimallunga. Rektorerigallarakkit matuit tamanut ammajuaannarnera nuannaartorisimavara, maannalu nammineq rektoritut periaaseq taanna malinniarsaraara - sutigummi tamatigut illit uannut, ilinniartunut, ilisimatusartunut, inuppassuarnummi sumiuugaluartunut maligassiuisimavutit, nunatsinni ilinniartitaanerup ilisimatusarnerullu ineriartorneranut pingaaruteqarluinnarsimallutit. Roba qujanarujussuaq, neriuppungalu pingasunngorpat 90-iliillutit inuuissioruit ullorsiorluarumaartut.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk