Ilisimatusarfimmi - ujarlerpoq

Ilisimatusarfik sulisuminut ilinniartunullu oqaatsinut politikeqarnissaq pillugu workshopeqartitsivoq

17.09.2019

Tusagassiorfinnut nalunaarut

Ilisimatusarfik sulisuminut ilinniartunullu oqaatsinut politikeqarnissaq pillugu workshopeqartitsivoq

Ilisimatusarfik nunaqavissunut nunattalu avataaneersunit ilinniarfiullunilu suliffeqarfiuvoq. Ilisimatusarfimmi ulluinnarni ilinniartitsineq ilisimatusarnerlu oqaatsit assigiinngitsut atorlugit ingerlanneqartarpoq, tassa kalaallisut, qallunaatut, nunani avannarlerni oqaatsit allat tuluttullu. Avammut atassuteqartarnermi aamma Ilisimatusarfimmit oqaatsit assigiinngitsut allat atorneqartarput, soorlu inuiaqatigiinnut kalaallinut atassuteqarnermi nunallu tamalaat akornanni.

Pissutsit tamakku atuummata, Ilisimatusarfimmi 2010-mi Oqaatsit pillugit Inatsit naapertorlugu oqaatsitigut politiki suliarineqarsimasoq maanna ineriartorteqqinniarlugu nutarteqqinniarlugulu suliniuteqalerpoq. Sapaatip akunnerani uani marlunngornermi, pingasunngornermi sisamanngornermilu Qassimi Ilisimatusarfimmi ilinniartut sulisullu oqaatsitigut politiki pillugu workshopeqartinneqarput.

Workshopeqartitsineq Ilisimatusarfimmi Oqaatsit pillugit politikeqarneq pillugu suleqatigiissitamit ingerlanneqarpoq, tassanilu suleqatigineqarpoq Københavnip Universitetiani Center for Internationalisering og Parallelsprogethedimi lektoriusoq, Janus Mortensen. Janus Mortensen sapaatip akunnera naallugu Nuummiissaaq workshopeqartitsilluni.

Ilisimatusarfiup Ilisimatusarfik pillugu inatsimmi nutaami §2, immik. 1 naapertorlugu ilaatigut suliassaraa ilisimatusarnermik aallutaqarnissaq ilisimatusarnerlu tunngavigalugu ilinniartitsinissaq nunat tamalaat akornanni piumasaqaatit qaffasinnerpaat uuttuutigalugit, aammattaaq ilisimatusarneq, ineriartorneq ilinniartitsinerlu naligiissumik sunneeqatigiinnissaat qulakkeerneqassasoq, Ilisimatusarfik qitiusumik ilisimasaqassutsikkut kulturimillu attassissutut ilisimasat piginnaatsillu pillugit inuiaqatigiit iluanni paarlaasseqateqartartussaavoq, tamanna tunuliaqutigalugu oqaatsit Kalaallit Nunaanni atorneqartut aallaavigalugit oqaatsitigut politikissaq ilusilersorneqassaaq, tassa kalaallisut, qallunaatut tuluttullu.

Ilisimatusarfiup suliassani pitsaanerpaamik piviusunngortissagunigit nutaamik oqaatsitigut politikiliornissap siunertarissavaa Ilisimatusarfimmi sulisut ilinniartullu akornanni oqaatsitigut piginnaatsit atorluarlugillu pitsaanerpaamik ineriartorteqqinneqarnissaat. 

Workshopeqartitsinermi ilinniartut sulisullu oqaatsitigut politikissamut ilapittuuteqarnissamut periarfissinneqassapput, qulequttat pingaarnerit pingasut uku pingaartinnerullugit:

  • Ilisimatusarfik ilinniarfissatut avatangiisilik (oqaatsit ilinniartitsinerlu)
  • Ilisimatusarfik suliffeqarfittut (oqaatsit suliassallu)
  • Ilisimatusarfik inuiaqatigiit iluanni ingerlatsivittut (oqaatsit inuiaqatigiillu) 

"Sapaatip akunnerani uani workshopeqartitsinerput aqqutigalugu neriuutigaarput Ilisimatusarfimmi oqaatsitigut politikeqarneq sulisut ilinniartullu akornanni peqatigiilluni suliniuteqarfiussasoq, oqaatsitigullu politikerput siunissaq eqqarsaatigalugu Ilisimatusarfimmi sakkutut uummaarissutut atorneqassasoq pappiaqqatut amusarissap iluanut toqquinnagassaanngitsoq", Ilisimatusarfimmi rekori Gitte Adler Reimer oqarpoq.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk