Safe Space, Atuarfiup Kilaaseeqqap anitsiartarfiani, Maniitsoq
01.12.2020
Safe Space novembarip 4-anni Maniitsumi ammarpoq. Anorlerluni nittaatsumi atuarfiup silataani pinnguartarfimmi napasuliarsuaq naammassisimavoq inuusuttut assinginik nivinngaassuiffigineqarsimalluni. Inuusuttut assingi Memory Books-imik taasaniittut sapaatip-akunnerani qaangiuttumi Ilisimatusarfiup silataani seqersinneqarputtaaq.
Assit Atuarfik Kilaaseeqqap anitsiartarfiani toqqissisimatitseqataasut aqqutigalugit imminut tatigineq innuttaaqatigiinnilu isumassuineq oqaluttuarineqarsinnaapput. Ilinniaqatigiiffimmik toqqissisimanartumik tusarnaarnissamut pilersitseqatigiinnissamullu piffissaqarfiusumik pilersitsineq aqqutigalugu inuusuttut tamanna sioqqullugu workshoppertinneqarput uku sammillugit:
- Annilaangannginnissamik pisinnaatitaaneq
- Toqqissisimanissamik paarineqarnissamillu pisinnaatitaaneq
- Paareqatigiinnissamik pisinnaatitaaneq
- Eqqaamanninnissamik imminullu oqaluttuarinissamik pisinnaatitaaneq
- Nammineq aalajangiinissamik aalajangeeqataanissamillu pisinnaatitaaneq
- Isumassarsiorsinnaanermik inuunermilu ineriartornissamik pisinnaatitaaneq
Safe Space-mi aallaavigineqarpoq Atuarfik Kilaaseeqqap Qeqqatalu Kommuniata inuusuttut tamarmik nuannersumik peqatigiillutik toqqissisimallutik inuunissaannik ilungersuuteqartuarnerannik. Tamanna aamma pivoq Ilisimatusarfik suleqatigilluarlugu ilisimatuutut misissuinermut ilinniartitsinermullu tunngatillugu.
2017-imiit maannamut ilisimatuutut misissuilluni suliniut Kunst og Sociale Fællesskaber psykologiimi professorimit Peter Berlinerimit siuttuuffigineqartoq Statens Kunstfondimit, Norsk Kulturrådimit suliniummillu Siunissaq-mit aningaasaliiffigineqartoq aallarnerneqarpoq Maniitsumi inuusuttut, Atuarfik Kilaaseeqqami pisortat ilinniartitsisullu, eqqumiitsuliortut, psykologit, sexologit Ilisimatusarfimmilu ilinniartut suleqatigalugit workshoppertitsinikkut.
Maanna Safe Space anitsiartarfimmi ilisarnaataalerpoq meeqqat pisinnaatitaaffii tunngavigalugit. Assilisat ukiorpassuarni tulliuttumi meeqqanut anitsiartunut tamanut nuannaarutaassapput illoqarfimmullu tamarmut takussutissiaassallutik.
Safe Space ukunannga tapersersorneqarpoq: Qeqqata Kommunia, Atuarfik Kilaaseeraq, Ilisimatusarfik, Grønlandsfonden, Verena Merz & Otto Kjærgaards Børnefond, Susi og Peter Robinsohns Fond aamma Siunissaq.
Attavissat:
- Atuarfik Kilaaseeqqami pisortaq Elna Heilmann: elna@kilaas.gl imalt. oq. 81 31 22.
- Psykologiimi professori Peter Berliner, Ilisimatusarfik: pebe@uni.gl imalt. oq. 28 56 34.
