Ilisimatusarfimmi - ujarlerpoq

Kalaallit qimmiat assitaqarluartumik atuakkiatigut nersorneqarpoq

03.03.2020

Tusagassiuutinut
nalunaarut - Qimmeq

"Kalaallit qimmiat uumasuuvoq tupinnartoq takujuminartorlu. Nukittuujuvoq immikkuullarillunilu allanngornernullu naleqqussarsinnaassuseqarluni nalinginnaanngitsumik. Nanorsuaq qaasuttoq immap sikuani nikitsaaliorsimaarsinnarlugu, sorianngitsoq kilometererpassuit qimussinnaasarpoq, qamutit takornarianik imaluunniit neqinik aalisakkanillu inuussutissanik ulikkaartut kalillugit. Sorianngitsorlu aamma suliassani aalluteqqissaarlugu ajugaarusullunilu ukiumoortumik qimussimik sukkaniunnermi peqataasarluni" (atuakkap aallarniutaanit tigulaagaq).

Uumasoq taanna immikkuullarissuusoq nersorneqaatigisartakkaminik pinngortitami assiliillammaasup Carsten Egevangip atuakkami nutaami ilisaritippaa. Carstenip assit qalipaateqanngitsut atorlugit ullumikkut qimmip Kalaallit Nunaanni atorneqarnera taamatullu inuup qimmillu nukittuumik ataqatigiinnerat takutippai. Atuakkiami Qimmeq pillugu Suliniummi ilisimasaqarluartut 14-it allaaserinnittuupput, atuagarlu Kunngissamit Frederimmit siulequtserneqarsimavoq. Aammattaaq Ilisimatusarfimmi PhD-inngorniartup apersuisimaneranit kalaallit qimussertartut oqaaseqartinneqarput.

Atuagaq pillugu uani alakkaagit.

Atuagaq aqqutigalugu Qimmeq pillugu Suliniutip, annertuumik ingerlatsiffiusup ukiunilu sisamani Ilisimatusarfimmiit ingerlanneqarsimasup naammassineqarnera naqissuserneqarpoq. Ilinniartut, ilisimatuut, assiliisut, filmiliortut saqqummiisartullu tunniusimalluartut 25-usut kalaallit qimmiata genetikkianik, peqqissusaanik, pissusaanik, ilinniartinneqartarneranik kulturikkullu oqaluttuassartaanik ilisimatusarlutillu saqqumiisarsimapput. Ingerlassami sammineqartut annertusimapput aallaqqaataaniillu kalaallit inuiaqatigiit akornanni ingerlanneqarsimallutik. Peqatigitillugulu ilisimatusarnikkut paasisat nunarsuatsinni ilisimatusaatinik saqqummiisartut tutsuiginarnerpaat aqqutigalugit saqqummiunneqartarsimapput, assitatiguttaaq saqqummiussineq pitsaasoq isumagineqartarsimalluni. Ingerlassami ingerlaarnerput pikkunarsimaqaaq, takorluukkatsinniillu angusaqarnerusimavugut, naammassisat tassaallutik filmiliat, atuakkat atuartitsinermi atugassiat, saqqummersitsineq angalaartitaq, qimmit pinngorfiannut, piginnaasaannut kulturikkullu oqaluassartaannut paasisat nutaat allarpassuillu. Quppersakkami ullumikkut saqqummersumi Qimmeq pillugu Suliniutip naammassisai siunissamullu pilersaarutai atuarneqarsinnaapput.

Quppersagaq uani alakkaruk.

Kulturimik saqqummiussisartoq Pipaluk Lykke 2019-imi decembarimi Nuummi workshop-ertitsivoq, tassanilu kalaallit qimmiannut kulturip attatiinnarneqarnissaanut ineriartortinnissaanullu inassuteqaasiornissaq siunertarineqarpoq. Tassani Qimmeq pillugu Suliniummi suliaqartut kattuffiillu assigiinngitsut kiisalu pisortat peqataapput. Inassuteqaatit pillugit quppersagaliaq ullumikkut saqqummiunneqassaaq.

Quppersagaq uani aajuk.

Inassuteqaatit 27-isut akornanni uku nassaassaapput:

  • Kalaallit qimmiat pillugu højskolemik pilersitsinissaq
  • Uumasunut nakorsaqarfiup iluani telemedicinimik pilersitsinissaq (ungasianiit katsorsaaneq siunnersuinerlu)
  • Kalaallit qimmiata kulturillu taassuma suli ilisimatusarfigineqarnissaat saqqummiisarnissallu

Upernaaq manna kalaallit qimmiata siunissaa pillugu Inatsisartut aalajangiissapput. Neriuutigaarput aalajangiiniarnerni Qimmeq pillugu Suliniutip ilisimasai Pipaluk Lykkellu workshoppertitsineranit inassuteqaatit politikerinit iluaqutigineqarumaartut.

Atuagaq Københavnimi Kalaallit Illuanni saqqummersinneqassaaq 6/3 nal. 17-19.

Assit tusagassiutinit atorneqarsinnaasut (assinik allanik piniarussi Carsten Egevang attavigisiuk).

Attavigineqarsinnaasut:

  • Atuagaq saqqummersoq pillugu, Carsten Egevang (ce@ghsdk.dk, +4520788099)
  • Inassuteqaatit pillugit, Pipaluk Lykke (natuluk@gmail.com, +4521266767)
  • Qimmeq pillugu Suliniut pillugu, Morten Meldgaard (mome@uni.gl, +299581955)

 

Qimmeq pillugu Suliniut sinnerlugu;

Inussiarnersumik inuulluaqqusillunga

Morten Meldgaard

Professori

Ilisimatusarfik



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk