Ilisimatusarfimmi - ujarlerpoq

Nikanarsaalluni tiingaffiginninneq akuerinngilarput

01.11.2020

Ilisimatusarfiup nunatsinni ilinniarfiit qaffasinnersaattut kinguaassiuutitigut kanngunarsaaneq nikanarsaalluniluunniit tiingaffiginninneq akuerinngilaa qaquguluunniillu akuerinaviarnagu. Taama pissusilersorneq Ilisimatusarfiup sulisuminut, ilinniartuutiminut kiisalu nunap iluani avataanilu suleqatinut politikkeqarneranut uniuuppoq.

"Ilisimatusarfittut angisuumik akisussaaffeqartarpugut ilinniartuutivut ilinniarnerminnut atatillugu suliffimmiikkaangata sulisuvulluunniit suliffeqarfinut allanut, nunatta iluanut nunattalu avataanut, suliartorraangata. Naatsorsuutigisarparput ilinniartuutivut sulisuvullu sumulluunniit pigaluaraangamik inoqatinik ataqqinninnermik pingaartitsisunit naapinneqartassasut ileqqorissaartumillu pissusilersorfigineqarlutik", rektori Gitte Adler Reimer erseqqissaavoq.

Kinguaassiuutitigut kanngunarsaaneq nikanarsaallunilu tiingaffiginninneq pillugit ulluni makkunani oqallinneq Ilisimatusarfimmi arajutsisimanngilarput. Ilaatigut Tusagassiuinermi Sulisut Peqatigiiffiannit, TP-mit, saaffigineqarpugut misissuinermikkut paasisimagaat tusagassiortunngorniarlutik ilinniartut suliffinniinnerminni - ullumikkut siusinnerusukkullu -nikanarsagaallutik tiingaffigineqartarsimasut.

"Ilinniartuutivut sulisuvullu maannakkumiit qinnuigisalerpagut inuttut kanngunarsagaanerit suulluunniit nalunaarutigisaleqqullugit. Taama kanngunarsagaanerit ilatsinnut ilungersunartunik kinguneqarsinnaapput, taamalu pissusilersorfigineqarneq kialuunniit suliffimmiinnermini naammagiinnassanngilaa".

Gitte Adler Reimerip Ilisimatusarfimmi ilisimatusarfiit immikkoortuilu tamaasa saaffigereerpai ilinniartut ilinniarnerminnut atatillugu suliffinnukannginnerini erseqqissumik paasitittassagaat kanngunarsagaanermik nikanarsagaallutilluunniit tiingaffigineqarnermik misigisaqarunik qanoq iliornissaannik, suliffinneereeraangatalu naliliinermi tamakku oqaluuserineqartassasut.

"Ilisimatusarfik universitetiuvoq pissuserissaarnermik, ataqqeqatigiinnermik, qujaniarnermik nersugaanermillu pingaartitsisoq. Taamaattumik naatsorsuutigaarput suliffeqarfiit allat aamma taama pissusilersorfiussasut, taamaalilluni nuna ilinniarsimasunik amigaateqaqisoq angusarissaarnerulersinnaaqqullugu".



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk