Tusagassiornermik masteri
18.09.2020
Deadline
16.11.2020
Ukiortaami januaarip naalerneraniit Ilisimatusarfimmi ilinniagassaq nutaaq aallartissaaq taaguuteqartoq tusagassiornermik masteri. Ilinniakkamik nutaamik neqerooruteqartuupput Tusagassiornermut Immikkoortortaq.
"Naak inuiaqatigiinni tusagassiortunik marluinnik oqaasilinnik amigaateqarneq atuukkaluartoq ukiuni kingullerni tusagassiortunngorniarlutik qinnuteqartartut ikittuinnaasarput. Taamaattumik neqeroorut nutaaq tusagassiortoqarlualernissamut iluaqutaasinnaammat ilinniakkamik nutaamik aallartitsinissarput piviusunngortinnialerparput".
Ilinniagaq piginnaasanik qaffassarfiusoq ukiunik marlunnik sivisussuseqartussaq suliffigisaq pigiinnarlugu ilinniarneqarsinnaavoq. Masterinngorniarnissamut piumasaqaataavoq allamik ilinniakkamik ingerlaqqiffiusumik ilinniagaqareersimasuunissaq, soorlu bachelorinngorsimasuunissaq, assersuutigalugu ilinniartitsisutut, perorsaasutut, peqqissaasutut, politiitut, av-teknikeritut allatulluunniit bachelorinngorsimagaanni diplomiugaanniluunniit.
Ilinniartussatut pissarsiarerusunneqarput inersimasut sulinermik misilittagallit naalakkisaarnermillu sungiussisimalluartut.
"Masterinngorniarfik qaffasinnerusumik ilinniakkanut ilaasussaammat pingaartuuvoq ilinnialerusuttut suliassartaanik malinnaasinnaasuunissaat, ilinniagarmi atuagarsornertalik aamma sungiusaatinik annertuunik imaqartussaavoq atuagassassiissutitaqarluarlunilu".
Ilinnialernissamut piumasaqaatit ilagaat kalaallisut danskisut tuluttullu oqalussinnaanissaq allassinnaanissarlu.
Paasissutissat sukumiinerusut pissarsiarineqarsinnaapput http://uni.gl/ti-master aqqutigalugu imaluunniit naja@uni.gl e-mailikkut allaffigalugu uungaluuniit sianerfigalugu: +299 38 56 00.