Ilisimatusarfimmi - ujarlerpoq

Tusagassiuutinut nalunaarut

05.04.2019

Statens Kunstfond aamma det Norske Kulturråd Ilisimatusarfimmut 1.000.000,- koruuninik pisassaqartitsipput eqqumiitsuliornerup ataatsimoorfinni nutaanik isiginnittaaseqalernerit, ilinniagaqarnerit innuttaaqatigiinnilu nutaanik pingaartitaqalernerit aqqutigalugit Kalaallit Nunaanni illoqarfinni nunaqarfinnilu uummaarissunik atasinnaasunillu ataatsimoorfeqalersitsisarneranik misissuinermik naammassinninnissamut atugassanik.

Ilisimatuutut misissuinermi suliniut Ilisimatusarfimmi Peter Berlinerimit, community psykologiimi isumaginnittoqarnermilu suliaqarnermi professoriusumit – aamma Meeqqanik, Inuusuttunik Ilaqutariinnermillu Qitiusumik Ilisimatusarfimmi pisortaasumit – ingerlanneqassaaq. Tamanna pissaaq assiliisoq assilialiortartorlu Tina Enghoff peqatigalugu, assilisaminut saqqummersitaminullu tunngatillugu apeqqutinik isumaginninnermut tunngasunik suliaqartartoq. Tina Enghoff nunani tamalaani katersugaasivinni saqqummersitsivinnilu saqqummersitsisarsimavoq ukiunilu kingullerni Kalaallit Nunaanni suliniutinik ’outreach’-inik suliaqarsimalluni. 

Ilisimatuutut misissuineq tamanna ukiunit qulinit amerlanerusuni kingullerni suliniutini Paamiut Asasara-mi aamma Siunissaq uagut pigaarput-mi – suliniutini marlunni Bikubenfondenimit aningaasaateqarfinnillu allanit taperserneqarluni naammassineqartuni – misilittagarilerneqarsimasunik ingerlatitseqqiineruvoq. 

Suliniutip qulequtaraa EQQUMIITSULIORNEQ ATAATSIMOORFIILLU – TAKUSSAANEQ, NAKIMAASSUSEQ, PAASISIMASAQARNEQ, suliniutaavorlu ukiuni marlunni ingerlanneqareersoq tamatumanilu misissorneqassalluni eqqumiitsuliornerup illoqarfinni nunaqarfinnilu ataatsimoorfinnik atasinnaasunik innuttaaqatigiinnilu akiuuffiusinnaasunik pilersitsinermi pingaaruteqarluinnassusia. Misissorneqassaaq eqqumiitsuliorneq qanoq eqqarsalersitsisinnaasoq isiginnittaatsinullu nutaanut qanoq ammaasinnaasoq taamaalillunilu ataatsimoorfinnik ataqatigiinnermillu, innuttaaqatigiinni mikinerni kissaatigineqartunik, siuarsaanissamik tigussaasunik takorluugassiilluni. Ilisimatuutut misissuineq malittarinnilluni misissuinerussaaq pisimasunut assilisanik tunngavilinnut atatillugu, assillu illoqarfinni sumiiffinnik ammasunik tamanillu atorneqarsinnaasunik innuttaaqatigiinnilu atasinnaasunik inuiaqatigiinnit kalaallinit aallaaveqartunik pilersitsinermut atorneqassallutik. Misissuisoqassaaq ilisimatuutut misissueriaaseq allanik peqataatitsisoq aallaavigalugu, illoqarfimmiut nunaqarfimmiullu piumasut tamarmik ilisimatuutut misissuinerup immikkoortuini tamani peqataatinneqarlutik paasisimasaqarluartutut aalajangeeqataasussatullu. 

Ilisimatuutut misissuinermik suliniut malinnaavigineqassaaq ataatsimiititaliamit ukunannga ilaasortaaffigineqartumit: rektori Gitte Adler Reimer, Ilisimatusarfik; Mette Sandbye, professori ilisimatusarfimmilu pisortaasoq, Institut for Kunst- og Kulturvidenskab, Københavns Universitet; Louise Wolthers, eqqumiitsuliat oqaluttuarisaaneranni ph.d., nakkulliisuullunilu assilisat kusanassusiinik ilisimatooq Hasselbladstiftelsenimi, Göteborg; ilisimatusarfimmi pisortaasoq Gestur Hovgaard, Inuiaqatigiilerinermik, Aningaasaqarnermik Tusagassiornermillu Ilisimatusarfik.

Paasissutissat amerlanerusut: attavigiuk Peter Berliner e-mailikkut: pebe@uni.gl imlt. tlf. +299285634.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk