Ilisimatusarfimmi - ujarlerpoq

Atuagaq nutaaq: "Collaboration, Dialogue & Trust"

02.12.2019

Novembarip 21-anni 2019-imi atuagaq nutaaq una Ilisimatusarfimmi saqqummersinneqarpoq: "Collaboration, Dialogue & Trust" - Tina Enghoffimit Peter Berlinerimillu allagaasoq.

Atuakkami sammineqarpoq Kalaallit Nunaanni eqqumiitsuliornermik, filosofiimi periaatsit psyko-socialiusut ilisimatuutullu misissuinermik ataqatigiissitsineq. Ukiut sisamat ingerlaneranni suliniut “Siunissaq” inuusuttunit 600-nit amerlanerusut suleqatigalugit Tasiilami, Nanortalimmi, Maniitsumi, Atammimmi Kangerluassuarmilu atuarfinni workshoppertitsivoq – taaneqartunilu innuttaasunik suleqateqarluni assigiinngitsunik sammisaqartitsisoqarpoq.

Atuagaq “Siunissaq“ najoqqutassanik periaatsinillu suliniummi ineriartortinneqarsimasunik malittarinniffiuvoq. Oqaloqatigiinnermik tunngaveqartumik suleriaaseqarnermut, tusarnaarnermut, ammaffigeqatigiinnermut allanngueqatigiissinnaanermullu tunngavoq. Tamakku pisarput inuusuttut, ilaqutaat, ilinniartitsisut, isumaginninnermik suliallit eqqumiitsuliortullu ilisimasaminnik avitseqatigiikkaangata, allanngueqatigiikkaangata ataatsimoorlutik demokratii tunngavigalugu sulisunik nukinitsitsigaangata, tamanik peqataatitsilluni, piumassuseqalersitsilluni sapiissuseqalersitsillunilu.

Atuakkiortut marluk suliniummik 2015-imi aallartitseqataapput tamatumalu ineriartorneranut ullumikkumut sunniuteqaqataasimallutik – innuttaasut ataqqillugit oqaloqatigisarlugillu. Atuakkami oqaluttuarineqarput suleqatigiinnerit, ineriartornerit misigisallu atuarfeqarfinni innuttaaqatigiinnilu sammisaqartitsisarnerit Tasiilami, Nanortalimmi, Maniitsumi, Atammimmi Kangerluassuarmilu. Eqqumiitsuliortutut periaatsit psykosocialimillu workshoppertitsinerit “Siunissami” pingaarnersaapput: Isumassarsiorsinnaaneq nalaassimasamik kingunerlutsitsinermut tunngatillugu ammanerulersinnaalluni. Allannguerusussuseq, inoorusussuseq, illoqarfinni nunaqarfinnilu ataatsimoorusserusussuseq innuttaaqatigiinnillu toqqissisimanartunik ingerlalluartunillu pilersitsilluni tamanik peqataatitsiffiusunik siunissamullu ataatsimut anguniagaqarfiusunik.

"Collaboration, Dialogue & Trust" akiuussinnaassuseqalersitsiumalluni periaatsinik nutaanik ineriartortitsinissaq pingaartillugu ilisimasaqarluarfiginngisamut angalanermik oqaluttuatut atuarneqarsinnaavoq. Pilersitseqatigiinneq inuunermut ammalluni pissinnertullusooq ippoq, qulakkeerilluni kikkut tamarmik tusarneqarlutillu takuneqarnissaat, inuttut pisinnaatitaaffiit eqqortinneqarnissaat, demokratii tunngavigalugu ingerlatsisoqarnissaat kikkullu tamarmik pimoorunneqarnissaat ataqqinnittumillu pineqarnissaat. Periaatsit eqqarsaatillu atuakkami allaaserineqartut sammivimmut nutaamut aqqutissiuussipput tamanik peqataatitsineq tamanullu naligiimmik pisinnaatitaaffeqartitsineq pingaartinneqarlutik inoqatiminnik soqutiginnittunik tamanik isumassarsisitsisinnaasut oqallissaarisinnaasullu.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk