Ilisimatusarfimmi - ujarlerpoq

Collaboration, Dialogue and Trust

05.06.2020

Download "Collaboration,
Dialogue and Trust"

Eqqumiitsuliornerup, isummat inuunermi najoqqutarisat (filosofiip) kiisalu tarnikkut ajornartorsiutit inuuniarnermut sunniutaasa suliarineranni ilisimatusaatigineqarnerannilu periaatsit Kalaallit Nunaanni qanoq kattunneqarsinnaanerat atuakkami nutaami sammineqarpoq. Ukiut sisamat ingerlaneranni suliniut Siunissaq inuusuttut 600-t sinnerlugit suleqatigalugit Tasiilami, Nanortalimmi, Atammimmi Kangerlussuarmilu atuarfinni workshopperutaavoq, illoqarfinni nunaqarfinnilu pineqartuni innuttaasunik akuutitsinermik ilaqarluni.

Suliniutip taaguutaa Siunissaq immini takussutissaareerpoq, atuakkamilu alakkarterneqarput tunngaviit periaatsillu suliniutip ingerlanneqarnerani ineriartortinneqartut. Tamatumani pineqarput oqaloqatiginninnermik tunngaveqarluni suleriaaseqarneq, tassaalluni tusarnaarneq, ammaffigeqatiginneq ataatsimoorlunilu allannguineq.

Tamakku timitalerneqarput inuusuttut ilaquttatik, ilinniartitsisutik, inunnik isumaginninnermi sulisut kiisalu eqqumiitsuliortut ilagalugit ilisimasaminnik avitseqatigiinnerisigut, allannguinerisigut ataatsimoorlutillu pikialaartitsinermik pilersitsinerisigut - tamanut inissaqartitsisumik, piumassusermik inuunermullu isumalluarnermik pilersitsisumik.

Atuakkiortut marluullutik suliniut Siunissaq 2015-imi aallarneeqataaffigaat suliniutillu ineriartortinneqarnerani ulloq manna tikillugu suleqataallutik – innuttaasut ataqqillugit peqatigalugillu. Atuakkami saqqummersinneqarput najukkani pineqartuni suleqatigiinneq, ineriartorneq ataatsimoorlunilu misigisat aqqutigalugit inerititat ilaat, tamakkulu atuarfinni najukkanilu innuttaasut peqatigalugit ilaatigut eqqumiitsuliornikkut inerititaallutik. Tassalu suliniummi Siunissami periaaseq qitiusoq: Tarnikkut/inuuniarnikkut ajornartorsiutit pillugit workshoppernerit eqqumiitsuliornerullu ataatsimoortinneqarnerat.

Taamaaliornikkut isumassarsiullaqqinneq aqqutigalugu tarnikkut ajoqusernerit kingunerluutaat ammasumik oqaloqatigiissutigineqarsinnaalertarput: Allannguerusunneq, inoorusunneq, inooqatigiinni inooqataarusunneq namminerlu peqataanikkut inooqatigiit toqqissisimanissaat ingerlalluarnissaallu anguniarlugu suliniuteqarneq, innuttaasut tamaasa akuutillugit siunissamullu ataatsimik anguniagaqarluni.

Atuagaq qulequtaqartoq Collaboration, Dialogue and Trust atuarneqarsinnaavoq angalanilersaarutitut; nuna nalusaq tikikkiartorlugu periaatsinik akiuussinnaassuseqalersitsisinnaasunik nassaarsiornissamik siunertalik. Ataatsimoorluni pilersitsineq tassaavoq ammasumik eqqarsartaaseqarluni inuunermut pulammaannerlusooq, kikkut tamarmik tusaaneqarnissaat takuneqarnissaallu qulakkeerlugu, inuit pisinnaatitaaffiisa ataqqineqarnissaat qulakkeerlugu, oqartussaaqataaneq tunngavigalugu peqataasullu tamaasa ataqqillugit tusaaniarlugillu.

Periaatsit eqqarsaatillu atuakkami eqqartorneqartut nutaamut tikkuussipput - peqataatitsineq inuillu tamarmik assigiimmik pisinnaatitaaffeqarnerat tunngaviullutik. Atuagaq inoqatiminnik soqutiginnittunut isumassarsititsillunilu oqallinnermut tunngaviusinnaalluarpoq.

Atuakkiortut pillugit

Peter Berliner, Tasiilami inunngortoq, Ilisimatusarfimmi Community Psykologiimi professori, Meeqqanik, Inuusuttunik Ilaqutariinnermillu qitiusumik Ilisimatusarfimmi aqutsisoq. Ilisimatuutut allaaserinninnerit atuakkallu allannikuuai, issittumi nunarsuarlu tamakkerlugu inuiaqatigiit tarnikkut misigissusaannut tunngasut.

Tina Enghoff, assiliisartoq assilialiortorlu, politikkimi inuiaqatigiinnilu tunngasunik sammisaqartoq. Atuakkat arlallit saqqummersinnikuuai, katersugaasivinni eqqumiitsuliornermilu ataatsimoorfinni saqqummersitsisarsimavoq. Enghoff assit videollu atortarpai, ukiullu kingulliit Kalaallit Nunaanni, Norgemi Danmarkimilu suliniuteqarnermigut suliat oqaloqatigiinnermut tunngavillit pilersissimallugit.

Atuagaq saqqummersinneqarpoq Ilisimatusarfimmit aammalu Siunissaq-mit, Ilisimatusarfimmit Bikubenfondimillu taperserneqarluni.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk