Ilisimatusarfimmi - ujarlerpoq

Filmi naatsuliaq "Piniartoq" toqqaruk

01.09.2021

Kalaallit qimmii pillugit suliniut Qimmermik taaneqartoq Ilisimatusarfiup Statens Naturhistoriske Museumillu suleqatigiissutigisaat filminik naatsulianik tallimanik kalaallit qimussersut malinnaaviginniffiusunik pilersitsiffiuvoq. Filmit naatsuliat taakku USA-mi (Seattlemi Montanamilu) aamma Odensemi (OFF2019) filmfestivalini ataqqisaalluareerput.

Maanna inuussutissarsiutigalugu piniartup Ittoqqortoormiineersup Martin Madsenip qimmiisalu malinnaavigineqarnerat filmiliarilluarneqarsimammat soqutigineqaqqilerpoq. EKKO atuagassiaavoq Danmarkimi atuagassiat filminut tunngasut pingaarnersaat, nunanilu tamalaani kritikerinit filmiliornermillu suliaqartartunit ilisimasaqarluartunit atuarneqartarpoq.

Tassa EKKO Danmarkimi filmiliornermik suliaqarfimmi pingaaruteqarpoq ukiunilu qulikkuutaani arlalinni nunani tamalaani tusaamasaalluarsimalluni, maannalu filmiliarput danskinut piginnaaneqarluarnerpaanut ilaatinneqartussatut innersuussutigineqarpoq. Tamanna filmimik ataqqinninneruinnarani aammali Martin Madsenimik Kalaallillu Nunaanni qimussertarnermik ataqqinninneruvoq.

Aamma suliniummi Qimmermi suliaqaqataasunut nuannerpoq takullugu Ittoqqortoormiini filmiliarput nersorneqarmat. Ukiualuit matuma siorna suliniummi filmiliortut marsimi assaalerlutik sulimmata tamanna takorloorsimanngikkaluarparput.

Filmi naatsuliaq inunnit toqqagaalluarpat sulilu sapaatip-akunnerini qulini top-20-miiginnarpat Ekko Shortfilm Awardsimi qinigassatut siunnersuutigineqarsinnaavoq, nersornaasiinermi tamatumani novembarimi pisussami danskit filmiliaat naatsut nalliuttorsiutigineqassammata.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk