Ilinniarnermik aallartitsineq 2018

Ilinniarnermik aallartitsineq 2018

03.09.2018

Ataasinngornermi septembarip 3-ani 2018-imi Ilisimatusarfimmi ilinniakkanik aallartitsisoqarpoq - ilinniartullu nutaat tamaasa tikilluaqqunissaat qilanaarisimaqaarput.

Ukioq manna ilinniartorpassuit nutaat tikilluaqqusinnaasimavavut:


Rektori Gitte Adler Reimer tikilluaqqusilluni oqalugiaammini ilaatigut ima oqarpoq:

"Asasavut ilinnialersut nutaat;

Ullumi ulluuvoq Ilisimatusarfimmut pingaarutilik; tassa ulloq ilissinnik ilinniartunik nutaanik maani ilinnialersussanik tikilluaqqusiffipput. Nalunngilara suut tamarmik amerlanersassinnut nutaajusut – ilisimassavarsili maani Ilisimatusarfimmi ilinniartut kattuffiat suleqatigalugu sapinngisarput tamaat iliorluta Ilisimatusarfimmi ilinniarnissi sulianut ikinngutinullu tunngatillugu sapinngisamik pisuunnguallannarnerpaanissaa sulissutigissagatsigu. Ilisimassavarsi ikiuerusukkatta, ilinniarnissinnilu qaqugukkulluunniit siunnersoqqullusilu ikioqqusinnaagassi.

Ilisimatusarfik ilissinnut piareersimatitaqarpoq faginik, ilisimatuunik, ilinniakkanik, attavigisartakkanik nunanit tamalaaneersunik, aaqqissukkanillu sulianut naapeqatigiinnernullu tunngasunik. Tamakku atorluarnissaat ilissi nammineq akisussaaffigaarsi. Ilinniakkassinnik pimoorussissaasi, Ilisimatusarfiup inuiaqatigiillu kalaallit naatsorsuutigaat. Siorna rektoriugallartup Suzanne Møllerip ilinniartunik nutaanik tikilluaqqusilluni oqalugiaatimini oqariartuut pingaarutilik manna oqaatigaa: "Ilinnialiinnartoqarneq ajorpoq – ilinniarniarluni aalajangertoqartarpoq". Tassa imaappoq, ilissi nammineq peqataaniarlusi maanilu Ilisimatusarfimmi ilinniarnissinnut tunngatillugu akisussaassuseqarlusi iliuuseqassaasi.

Ilisimatusarfimmiinnermut ilaavoq naapeqatigiittarnitsigut oqaloqatigiittarnitsigullu ilisarisimaqatigiilerneq - inuiaqatigiinni ikittunnguuvugut immitsinnullu qanilluta. Taamaattumik ataatsimoornnitta siunertaqarluarnissaa tamatta akisussaaqataaffigaarput. Oqaloqatigiittarnitsigut, oqallinnitsigut aliikkusersoqatigiittarnitsigullu ataatsimoornitsinnik kinaassutsitsinnillu nukittorsaaqatigiissaagut, taamaalillutalu maani Ilisimatusarfimmi pisuunnguallaataasunik misigisaqaqatigiilluta. Tassa nammineq iliuuseqarlusi siulliullusilu iliuuseqarniartarnissigut ataatsimoornitsinnut akisussaaqataassaasi.

Maanna Ilisimatusarfimmi suleqatigisassasi ilisaritissavakka. Immikkoortortat qinnuigissavakka tamarmik immikkut imminnut ilisariteqqullugit: 

  • Kulturimik, Oqaatsinik Oqaluttuarisaanermillu Ilisimatusarfik
  • Inuiaqatigiilerinermik, Aningaasaqarnermik Tusagassiornermillu Ilisimatusarfik
  • Ilinniarnermik Ilisimatusarfik
  • Peqqissaanermik Ilisimatusarfik
  • Allaffimmiut
  • Qaffasissumik Ilinniagaqartut Kattuffiat Ili Ili

Ilisimatusartunut ilaalissaasi taamaattumillu tikilluaqquneqassaasi oqartarnerattut 'ilisimatusartutut assamminneqarlusi'. Tassa taama ilisimatusarnerup silarsuanut tikilluaqqusisoqartarpoq, Ilisimatusarfimmullu tamatsinnit tikilluaqquneqarnissinnut takussutissaavoq. Taamaattumik qinnuigissavassi immikkoortakkuutaarlusi maanngaqqullusi.

Aammaarlunga tamassi tikilluaqqungaarpassi, ukiorlu ilinniarfik nutaaq tamassinnut nuannersuugilitoq."



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk