Ilisimatusarfimmi - ujarlerpoq

Ilinniartitaaneq politikkikkut ukkatarineqartariaqarpoq - Ilisimatusarfik siumut isigivoq

01.04.2021

Ilisimatusarfimmi
siulersuisut aqutsisullu

Ilisimatusarfimmi siulersuisut qinigaaqqammersut aqutsisullu maannakkut qineqqusaarneq pissangallutik malinnaavigaat. Kisiannili ilinniartitaaneq – pingaartumillu qaffasinnerusumik ilinniartitaaneq – maannamut sammineqarpallaanngilaq. Ilinniartitaaneq taamak pingaaruteqartigisoq ukkatarineqanngitsoorsinnaanngilaq – taamaammat Ilisimatusarfimmi siulersuisut aqutsisullu oqallinnermut ugguuna oqariartuuteqarniarput. Ilinniartitaanerup qanoq pingaaruteqassusia erseqqissarniarlugu Ilisimatusarfiup oqaluttuarisaanera angusimasaalu siulliullugit itisililaassavagut.

ANGUNIAKKAT KILLIFFIAT

Ilinniartut ukiukkut naammassisut ph.d.-nngortullu piginnaasaqarluartup iluatsittumik illersuinera februaarimi nalliuttorsiutigereerlugit maanna killiffissiornissamut piffissanngorpoq. Ilisimatusarfiup ukiuni qulikkaani kingullerni ineriartornerujussuaq aqqusaarsimavaa. Bachelorinngorniarluni ilinniarnerit nutaat pingasut aallartinneqarsimapput: Nutserineq Oqaluttaanerlu, Inuussutissarsiornikkut Aningaasaqarneq Inatsisilerinerlu. Ilinniartut marloriaatingajammik amerlisimapput – 400-t missaannit 800-t tungaannut, kandidatitullu nammassisartut amerliartuinnarlutik. Ilinniartut ilinniarnerminnik naammassisut nutaat 43-t ukiuunerani nalliuttorsiutigaagut, taakkunanngalu aqqanillit kandidatinngorput. Aamma nunatsinni ilinniakkat qaffasinnersaat siuariartorfiusorujussuuvoq. Ph.d-tut ilinniartut amerleriarujussuarnikuupput. 2009-miit maannamut 18-it ph.d.-tut ilinniarnertik naammassisimavaat, tulluusimaarutigalugulu oqaatigisinnaavarput maanna ph.d.-tut ilinniartut 30-ummata.
Ilisimatusarfik Illimmarfimmi illorsuarmut nutaamut 2008-mi iserterpoq. Illorsuup nutaap sananeqarnissaa aalajangiinerusimavoq isumaqatigiinngissutaaqisoq, amerlasuullu isumaqarsimapput pisariaqanngitsumik isikkuminarsaatitut sanaartornerusoq pisariaqanngitsoq. Ullumikkulli takuneqarsinnaalluarpoq politikkikkut aalajangiussaq qanoq pitsaatigisimasoq. Ilisimartusarfik aamma Ilimmarfik iluatsittumik ingerlapput. Ima iluatsitsigisumik allaat Ilisimatusarfiup angorusutai eqqarsaatigalugit avatangiisit ullumikkut mikivallaalersimallutik – kiisalu ilinniakkat ilinniartunngortartulluamerlassusaat eqqarsaatigissagaanni.

Ilisimatusarfik piutilluni Kalaallit Nunaanni inuiaqatigiit ineriartorneranni qitiusutut inissisimajuarsimavoq. Ilinniarfiit imminnut napatittut pilersissagaanni innuttaasut ingerlaqqiffiusumik piginnaanngorsarsimasut pigilernissaat najukkani pinngitsoorneqarsinnaanngillat periarfissaqartariaqarlutillu. Peqqissaasunik ilinniartitsinermi Ilimatusarfiup angusai assersuutaalluarput piviusuusut. Angusat ukiut arlaqanngitsut ingerlanerinnaanni pisut nalliussivagut, tassalu peqqinnissaqarfimmi peqqissaasut affai sinnerlugit nammineq ilinniartitaraagut. Inuiaqatigiinni suliassaqarfinni pingaartuni allarpassuarni taamatut ineriartortoqarnera takuneqarsinnaavoq. Meeqqat atuarfianni ilinniartitsisut kalaallit amerlinikuupput. Kommunini aamma Namminersorlutik Oqartussani sulisut AC-tut ilinniarsimasut kalaallit amerlinikuupput. Isumaginninnermi siunnersortit amerlanerit nunatsinni ilinniartinneqarnikuupput – allarpassuillu. Innuttaasut ingerlaqqillutik ilinniarsimasut amerlanerit nunatsinnit aallaaveqarnerulersimapput.

Ilisimatusarfimmi ilinniarnerminnik naammassinnittartut qimerloorutsigit, Ilisimatusarfiup inuiaqatigiinni ingerlatsinera pingaaruteqartorujussuusoq erseqqippoq. Nunani allarpassuarni – tassunga ilanngullugu Danmarkimi – akademikerit ilinniarnerminnik naammasserlaat suliffissaqanngitsut amerlanerat ajornartorsiutaavoq. Suliffissaaleqisussatut ilinniartitsinnginnerput Ilisimatusarfiup tanngassimaarutigisorujussuuaa. Pisariaqartitsineq ima annertutigaaq allaat inuit sivisuumik ilinniarsimasut suliffissaqanngitsut procentip affaannaanik amerlassuseqarlutik.

UNAMMINARTUT

Ilisimatusarfik pillugu oqaluttuat taakku pitsaagaluaqisut, aamma unamminartoqarnera paasisariaqarparput. Unamminartut iliuuseqarfigisariaqakkavut Ilisimatusarfimmi sulinerup pitsanngorsartuarnissaa ingerlatiinnassagutsigu. Unamminartut taakku aaqqiiffigissagaanni polikkikkut tapersersuisoqarnissaa pisariaqarpoq.

CAMPUS ILIMMARFIK

Unamminartut taakku ilagilluinnagaat tassaavoq Ilinniartitsinermik Ilisimatusarfimmi ilinniartitsisunngorniarfimmilu illuutit. Nunatsinni ilinniarfiit pisoqaanersaat ullumikkut Ilinniarfissuarmiippoq Qorsussuullu illutaaniilluni. Ilinniarfissuup illutaa pingaarneq pisoqaq illu kusanartorujussuuvoq, illuli aamma pisoqaasorujussuugami ullutsinnut naleqqukkunnaavissimalluni. Qorsussuup illutai piffissami qaninnermi ingutseriaannanngorsimapput.
Ilimmarfiup allinissaa Ilisimatusarfiup suliniutigaa, ilinniartitsisunngorniarfik taamaalilluni ininut nutaaliaasunut nuussinnaaniassammat. Init Kalaallit Nunaanni atuarfinnut ilinniartitsisunik pitsaanerpaanik piginnaasaqarnerpaanillu ilinniartitsinissamut ajoqutaanatik ikiuutaasinnaasut pisariaqarput. Ilisimatusarfiup Kalaallit Nunaanni inuiaqatigiinni ingerlatsisorpassuit attaveqarfigai, taakkulu Campus Ilimmarfimmi takorloorneqartutut ilisimatusarnermi ilinniartitsinermilu peqataavinnissartik soqutigilluinnagaraat. Ilisimatusarfiup Ilinniartitsisunngorniarnermi tunngaviusussaanerata saniatigut aamma nunami tamarmi ilinniartitsinermi ilisimatusarnermilu suleqatigiinnermik ineriartortitsiviusussamik Ilisimatusarfiliussaagut. Taamaammat politikkikkut tapersersorneqarnissaq pingaaruteqartorujussuuvoq.

ILINNIARTITAANERMIK PITSANNGORSAANISSAQ

Ingerlaqqiffiusumik ilinniartitaanerup tamarmiusup politikkikkut tapersersorneqarnissaa pingaaruteqartorujussuuvoq. Aningaasaqarnermut Siunnersuisoqatigiiit nalunaarusiaanni ukiut tamaasa uparuarneqartarpoq ilinniartitaanermik pitsanngorsaanissaq pisariaqartinneqartoq. Ilinniarfiit politikkikkut ukkatarineqarnissaannik pisariaqartitsisoqarpoq politikkikkullu suliniuteqavinnissaq pisariaqarlunissaaq. Tamatuma akerlianik pisoqarajuttartoq Ilisimatusarfiup ajoraluartumik takusarpaa.

Aningaasaliissutit ikiliartortut takusarpavut tamatumalu ilinniarnernik nutaanik neqerooruteqarnissarput ajornarnerulersippaa. Assersuutigalugu Issittumi Uumassusilerinermik bacheloritut ilinniartitsilernissaq pilersaarutaagaluarpoq ukiuni arlalinni piareersarneqarsimasoq. Ilinniakkamik tassannga aallartitsinerup ingerlaqqiffiusumik pinngortitalerinermik ilinniagaqarnerit nunatsinni ingerlanneqartut siullersarisussaagaluarpaat. Issittumi Uumassusilerinermik bacheloritut ilinniarneq aallartittuuppat Ilisimatusarfiup inuussutissarsiutinik nutaanik sukumiinerusumik ineriartortitsinermi alloriaqqinneq pilersittussaagaluarpaa. Tamatuma saniatigut Ilisimatusarfiup kandidatitut ilinniarnernik amerlanerusunik neqerooruteqarnissaa ilinniartut sulisullu annertuumik kissaatigaat – taakkulu maannamuugallartoq pingasuinnaapput, bacheloritut ilinniarnissamik neqeroorutigut aqqaniliusut sanilliullugit.

Misigaarput ilisimatusarfimmi ilinniartitsisut akissarsiaat ilinniarnertuunngorniarfinni pisortalluunniit suliffeqarfiutaanni allani akissarsianut unammillersinnaanngitsut. Sulisutta piginnaasaqarluartut pikkorissullu sulisoriinnarnissaat tamatuma ajornakusoortittorujussuaa.
Ilinniartitaanerup ataatsimut isigalugu pingaartumillu ingerlaqqiffiusumik ilinniartitsinerup, sipaarniarfigineqarnissai Kalaallit Nunaanni imminut akilersinnaanngilaq. Taamaaliussallunimi pingaaruteqarpallaaqaat. Tamanna ataatsimoorfigalugu anguniagaqarfigisariaqarparput iliuuseqarlutalu. Ilisimatusarfik inuiaqatigiinnik kivitsisussatut sulivoq pitsanngoriartortittuagassaasumik. Tassami iIlisimatusarfik Kalaallit Nunaanni ineriartortitsinermi qaffasinnerusumillu ilinniartitsinerni nutaani qitiujuartariaqarpoq. Politikkerinit tapersersorneqarnissarput suleqatigineqarnissarpullu pisariaqartipparput – Ilisimatusarfimmut inuiaqatigiinnullu iluaqutaasumik.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk