Ilisimatusarfimmi - ujarlerpoq

Ilisimatusarfimmi aasaanerani naammassinersiortitsineq

23.06.2020

Oqalugiaat: rektori,
Gitte Adler Reimer

Ulluni makkunani Covid-19-eqarfiusuni pissutsit pisarnernit allaaneroqaat.

Qularutigineqassanngilarli soorunami pisarnitsitut Ilisimatusarfimmi aasaanerani naammassinersiortitsissagatta.

Oqartussalli malittarisassiaannik malinninnissaq (ataatsimuualaarneq, eqqiluisaarneq il.il. pillugit) qulakkeerniarlugu aasaanerani naammassinersiortitsineq pisarnermit allaanerusumik ingerlavoq.

Aasaanerani naammassinersiortitsineq pivoq ullumi marlunngornermi juunip 23-anni nal. 10-11 Ilimmarfiup kantiinaani.

Naammassinersiortitsinerli allagartartaartunuinnaq malunnartinneqarpoq – tassalu ajoraluartumik avataaniit peqataasoqanngilaq.

Taamaattumik ilaqutaasut, ikinngutaasut il.il. angerlarsimaffimminnit malinnaaniassammata naammassinersiortitsineq toqqaannartumik internettikkut aallakaatinneqarpoq.

Naammassinersiortitsinerup kingorna ilinniarfiit tamarmik ataasiakkaarlutik kaffillerput.

 

 

Oqalugiaat: rektori, Gitte Adler Reimer

 

"Asasakka soraarummeerlutik allagartartaartut;

Ilinniakkassinnik naammassinninnissinnik pilluaqqungaarpassi, ilisserpiaammi immikkut pilluaqqusariaqarpusi, pissutsit immikkorluinnaq ittut nalaanni ilinniarnissinnik naammassinnikkassi. 

Coronavirusi nappaallu covid-19 atugaalillarmata Ilisimatusarfik marsip 18-ianni matuvoq, tamannalu pissutigalugu ilinniartitsineq tamarmi internettikkuulerpoq, soorlu aamma soraarummeernerit ilarpassui internettikkoortariaqarsimasut.

Tamassi paasinnilluarlusilu naammagittarlusi pissutsit nutaat atorpasi. Tamanna pillugu tamavissi, Ilisimatusarfimmiullu tamassi, qutsavigingaarpassi. Ilinniartitseriaatsit suleriaatsitsillu ullormiit ullormut allanngorteriataartariaqarsimavagut. Tamannali akornutiginagu ilinniartut sulisullu sulinersi aalajaallusi ingerlatiinnarparsi, tamannalu pillugu uummammit pisumik qutsavigaassi. 

Manna iluatsillugu Naalakkersuisut qutsavigerusuppakka covid-19 akiorniarlugu iliuusaat pillugit. Oqartussaasut ajornartoorfimmi pikkorisaarlutik iliuuseqarnerat iluaqutigalugu Ilisimatusarfik apriilip 27-anni ammaqqissinnaanngorpoq. 

Tamanna pissutigerpiarlugu iluatsitserujussuartutut misigisinnaalluarpugut! Nunarpassuarni ilisimatusarfippassuit suli matoqqapput, ukiarulu aatsaat ammariartulissallutik. Taamaattumik bachelorinngortortavut kandidatinngortortavullu ullumikkut allagartartaartillugit nalliuttorsiutigisinnaagatsigit assut iluanaartutut misigisimavunga, naak pisarnermit ikinnerulluta allaanerulluinnartumillu nalliuttorsioraluartugut.

Asasakka allagartartaartut. 

Corona apeqqutaatinnagu maanna inuunissinni pingaarutilissuarmik alloriarpusi. Inuunissi ilaa pingaarutilik, nutaajullunilu pissanganartoq, aallarnerparsi. 

Ullumi ilissi 56-ullusi soraarummeernissinnut uppernarsaatinik tunineqassaasi.

Bachelorinngortut 54-t: 

Kandidatinngortut 2-t:

Maanna ilinniakkassinnik naammassinnippusi, soraarummeernissinnullu uppernarsaatit ilissinnut tunniunneqartussanngorput. Siunissassinni suli pingaaruteqarnerusunik pissanganarnerusunillu aqqusaagassaqarpusi. Suliffeqarfinnili sulilerussi ilinniarnissinni ilikkakkassinnik tamanik atuiniarnissaq unammillernartuussaaq. Ilisimalersimassassi atornisaat tunuarsimaarfigisariaqanngilarsi. Akuersaaginnarasi apeqqusiisinnaaneq ilinniarparsi. Iluarsiissutissanik nassaarniarneq ilinniarparsi. Maanna piffissanngorpoq ilikkakkassinnik atorluaasinnaanermik sapiissuseqarlusi takutitsinissassinnut. Piginnaasarilikkassinnik nunatsinni suliffeqarfiit pisariaqartitsingaarput.

Naggasiullugu ilaquttasi ilissilu pilluaqqorujussuarpassi - aamma angusarissaarnersi pillugu. Sutigut tamatigut iluatsitsilluarnissassinnik kissaappassi. Taamatuttaaq aamma Kalaallit Nunarput Ilisimatusarfillu pilluaqqorujussuarpakka bachelorinngortut kandidatinngortullu tamaasa pillugit."



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk