Ilisimatusarnikkut sammisat ilaannik

Ilisimatusarnikkut sammisat ilaannik

01.05.2018

Ilisimatusarnikkut sammisat
ilaannik: Tusagassiuutit 2018

Kalaallit Nunaanni tusagassiuutit demokratiimut maani atuuttumut pingaaruteqartorujussuupput.

Tassami tusagassiuutit innuttaasunut siammasillutik inuusunut qilerutaappullusooq – tamannarpiarlu pissutigalugu tusagassiuuteqarneq oqallisaagajuppoq. 

Ilisimatusarnikkut sammisaq ''Tusagassiuutit 2018" oqallinnermut tamatumunnga ilangaaqqutaassaaq.

Nunamut tamarmut tusagassiuutini ulluni aalajangersimasuni nutaarsiassat tamaasa misissoqqissaarnerisigut ilisimasaqalissaagut oqallinnermut iluaqutaaniartussanik.

Taamaalilluta oqaatigisinnaalissavarput soorlu kikkut tusagassiuutini oqaaseqartitaasarnersut kikkullu oqaaseqartitaasannginnersut – suut nutaarsiassaatinneqarnersut suullu nutaarsiassaatinneqannginnersut.

Tusagassiuutit 2018-imi ingerlatat ilaattut Kalaallit Nunaanni tusagassiuutit nalunaarsussavavut: Tusagassiuutit atorneqartut suuppat, qanoq angitigaat, aningaasaqarnerat qanoq ippa, kikkunnit pigineqarpat il.il.

Paasissutissat pissarsiarineqartut tamarmik databankimut katersorneqassapput kingusinnerusukkut misissuinerni atorneqarsinnaasunngorlugit, soorlu kandidatinngorniarumaartussanit ph.d.-nngorniarumaartussanillu. Misissuinerput soorunami aamma Ilisimatusarfimmi tusagassiornermik ilinniarnermi ilisimatusarnermik tunngaveqalersinniarneqartumi ilinniartitsinermi atorneqarumaarpoq. 

Ukioq allortarlugu misissueqqittassaagut – taamalu Kalaallit Nunaanni tusagassiuuteqarnerup aaqqissuussaanerata qanorlu immersorneqarnerata allanngoriartorneri malinnaavigineqarsinnaassapput.

Ilisimatusarnitta inerneri kalaallisut qallunaatullu nalunaarusiarineqartassapput sapinngisamik paasiuminartumik, pilersaarutaavorlu nalunaarusiaq siulleq 2018-mi ukiaaannartoq saqqummissasoq.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk