Ilisimatusarfimmi - ujarlerpoq

Ilisimatuutut misissuinermut 5 mio. kr.-t

02.12.2019

Sinerissami innuttaaqatigiinnik piujuartitsilluni ineriartortitsinermik ilisimatuutut misissuilluni suliniummut nutaamut atugassanik Ilisimatusarfik koruuninik millioninik 5-nik tunineqarpoq.

Nordisk Ministerråd 15 mio. kr.-nik ukiuni pingasuni atugassanik suliniummut tunniussivoq, taakkunanngalu 5 mio. kr.-t agguagassanut Ilisimatusarfimmit aqunneqartunut tunniunneqarput. Tamatuma saniatigut aningaasat sinneruttut Pinngortitaleriffiup Imarsiornermillu Ilinniarfiup akornanni avinneqassapput.
Inuiaqatigiilerinermut, Aningaasaqarnermut Tusagassiornermullu Ilisimatusarfimmi pisortaq Gestur Hovgaard ilisimatuutut misissuinermik saqqummiussisuuvoq suliniummilu aqutsisuussalluni. Pilersaarutaavorli ilisimatuumik suliarinnittussarpiamik atorfinitsitsisoqarnissaa.

Suliniummi anguniagaq pingasunik immikkoortoqarpoq, taakkunannga siulliulluni aalisarnermi atortussanik nungusaataanngitsumik atorluaanissamik sulissuteqarnissaq – nunani avannarlerni suliniut ataatsimoorussaq Pinngortitaleriffimmit aqunneqartoq.

Tamanna qulakkeerumallugu aalisarneq pillugu ilisimatuutut misissuisoqarnerulernera tunngavigalugu suliniummit pinngortitaq pillugu siunnersuilluartoqarsinnaanerulissaaq, tamannalu tunngaviliissaaq aalisagaqassutsimik nungusaataanngitsumik atuisinnaanissamut.

Anguniakkap immikkoortuisa aappaanni sammineqarpoq nunat avannarliit sineriaanni ’naleqartitanik ataqatigiiaanik’ piujuartitsilluni ineriartortitsineq nalunaarsuinerlu. Tassani pineqarpoq inuiaqatigiit atuuttut aningaasaqarneq, isumaginninneq kulturilu aallaavigalugit isigineqassasut. Suliniut tamanna Ilisimatusarfimmit siulersorneqarpoq nunanilu avannarlerni ilisimatuutut misissuisarfiiit suleqatigalugit suliarineqarluni.

Anguniakkap immikkoortuisa pingajuat imaani ajutoornernik annikillisaaqataassaaq. Tamanna ilaatigut pissaaq ilinniarfimmik pilersitsinikkut meeqqat atuarfiini ilinniartunut 13-iniit ukiulinnut pikkorissartitsissutissanik ineriartortitsilluni pikkorissartitsillunilu umiartornermi ilisimasassanik tunngaviusunik. Imarsiornermik Ilinniarfik suliniutip ilaanik tamatuminnga aqutsisuussaaq – nunani avannarlerni suliniuteqartartut allat peqatigalugit.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk