Inuusuttut FN-imut oqariartuutaat: Oqaatsit SDG-nut ilanngunneqarlik

Inuusuttut FN-imut oqariartuutaat: Oqaatsit SDG-nut ilanngunneqarlik

04.05.2018

Allattoq:
Tina Kûitse
Allattoq: Tina Kûitse

Kalaallit inuusuit pingasut Kuluk R. Lyberth, Tina Kûitse aamma Tukumminnguaq Nykjær Olsen, FN-ip Nunap inoqqaavinut ataavartumik ataatsimeersuartitsinerannut New Yorkimi FN-ip illorsuani pisumi peqataapput.

Studerende Ved United Nations

Inuusuit ICC Greenland aqqutigalugu, ukiuni pingasuni peqataaffigisarsimasartik "Joint Inuit and Saami youth Capacity Building" naggasiullugu, Saamit inuusuit Saamit Siunnersuisoqatigiineersut peqatigalugit, ataatsimeersualiani peqataatinneqarput. Tassanilu siunertarineqarpoq inuusuit namminneq soqutigisatik naapertorlugit siunissami sulianik assingusunik suleqataalernissaat.

United Nations Permanent Forum for Indigenous Issues (UNPFII) ukiut tamaasa ataatsimeersuartitsisarpoq. Tassanilu FN-imi sulisut, Nunap Inoqqaavi, Naalagaaffiit, peqatigiiffippassuillu nunarsuaq tamaneersut peqataapput. Saniatigullu FN-imut attuumassutillik, Inuit oqartussaaffiannut suliallit ilinniarfeqarfiillu aamma tikilluaqqusaallutik.

UNPFII-imi pingaarnertut suliassarineqartarpoq nunap inoqqaavisa nunaminni inuit pisinnaatitaaffiinik pillugit ernumassutit qaqinnissaat, taamaalillutillu FN-imi suliaqartut sulisullu, ajornartorsiutaasut eqqumaffigisinnaalissammassuk.

Inuusuit FN-imut ilaanerminni oqaatsit pigiinnarneqarnissaanut iliuuseqarfigineqannginnera siunnersuuteqarfigaat, tassanilu kalaallit nunaanni oqaatsit assigiinngissitaarneri assersuusiorfigalugit. 

Pisortatigoortumik akuerineqarnissaat qaqissimavaat. Tamanna peqquteqarpoq inuaqatigiit akornanni pisortatigoortumik immikkuullaarissuseqarnerat takuneqarsinnaalernissaanik.

"Pingasuulluta UNPFII-mi siunnersuutigalugulu oqariartuutigisarput tassaavoq oqaatsit FN-ip Sustainable development goals (SDG)-iinut ilanngunneqarnissaat. Tassami tamanut peqataatitsinerusumik naligiinnerusumillu ingerlatsisoqassappaat ikinnerussutillit oqaasii pillugit ilinniarnissaq pisariaqarsoraarput.

Oqariartuutigut kalaallit nunaanni pissutsit tarrarsorfigalugit sanavagut, kalaallit nunaata iluanimi takusinnaasagut tassaapput oqaatsitigut sumiuussutsitigut qinngasaarisarneq piusoq, saniatigullu kalaallit oqaatsiminnik annaasaqarsimasut ajunnginnerusumik ikiorneqarsinnaanissaat pitikkusullugu, siunissamimi kinguaatsinnut oqaatsitsinnik ingerlatitseqqiisinnaasariaqarpugut", Tukumminnguaq Nykjær Olsen taamak oqaaseqarpoq.

"Angalaneq assorsuaq pissarsiaqarfigeqaara, inuttulli nammineq soqutigisimasakka angorusutakkalu timitalerlugit paasigakkit siunertara ersarinnerusutut isikkoqalerpoq". Tina Kûitse angalasimanerminut taamak oqaasertaliivoq.

Kuluk R. Lyberth imak oqaasertaliivoq: "ICC Hjalmar Dahl-lilu qujaffigerusuppakka, namminneq ulluinnarni suliarisartakkaminnik, periarfissamik taamak ittumik, avammut suliaqarnissamik misilittagaqartissinnaallutalu peqataatissinnaammatigut. Neriuppungalu neqeroorutinik assingusunik inuusuit ilinniartut akornanni, tamakkuninnga tunngasunik aamma periarfissaqalerumaartoq, misilittagaqarfigisinnaasaannik sungiusaatigisinnaasaannillu FN-ip Avannaarsuata Siunneruisoqarfianillu suliaannik tunngasinnaasunik, soorlu uagut peqataaffigisatta assinganik. Qujaqqippunga ICC-mut".



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk