Ilisimatusarfimmi - ujarlerpoq

Issittumi Covid-19-ip sunniutigisinnaasai pillugit ph.d.-mi pikkorissarneq iluatsilluartoq

01.11.2022

Allattoq Julie Flyger Holflod

University of the Arcticimit aningaasaliiffigineqarnikkut Kalaallit Nunaanni Peqqissusermik Ilisimatusarfik Peqqissusermik Pinngortitamillu Ilisimatusarfimmiittoq aamma Center for Folkesundhed i Grønland (Statens Institut for Folkesundhed, Syddansk Universitet) peqatigiillutik ulluni marlunni ph.d.-mi pikkorissartitsinissamik pilersaarusiorput issittumi Covid-19-ip inuiaqatigiinnut sunniutigisinnaasai Issittumilu ilisimatusarnermi periaatsit qitiutinneqarlutik.

Pikkorissarnermi inuiaqatigiinni issittumiittuni nappaalanersuaqarneranik assigiinngitsutigut iliuuseqarfiginninnerit sammineqarput, ilisimatusarnermi suliniutit periutsillu assigiinngitsut saqqummiunneqarlutik, aamma suleqatigiinnissamut aamma atortussanik ilisimasanillu avitseqatigiinnissamut periarfissat assigiinngitsut issittumilu nunat assigiinngitsut akornanni inuiaqatigiinnik peqataatitsinissaq oqallisigineqarput.

Ukiualunni Covid-19-eqareerneratigut internetikkut ornigullunilu katersuuffiusinnaasumik iluatsilluartumik ineriartortitsisimavugut - ukiunulli marlunnut kingullernut naleqqiutissagaanni ilinniartut amerlanerpaartaat Nuummi Pikialaarfimmi auditoriamut ornigullutik peqataasinnaasimapput.

Peqataasut nunanit ukunanngaanneersuupput: Kalaallit Nunaat, Tuluit Nunaat, Danmarki, Norge, Canada Alaskalu (USA). NunaMed 2022-mi Nuummi ataatsimeersuartitsinermut atatillugu pikkorissartitsisoqarpoq. NunaMed tassaavoq ilisimatusartunik peqqissutsimillu sulialinnik Kalaallit Nunaanni Issittumilu peqqissusermik ilisimatusarnermik soqutigisalinnik ataatsimeersuartitsineq – Nuummilu pikkorissaqataasut tamarmik NunaMedimittaaq ataatsimeersuaqataapput.

Ph.d.-mi pikkorissartitsineq UArctic Thematic Network on Health and Wellbeing in the Arcticip sulissuteqarneratigut pivoq. Sammisaq aalajangersimasoq pillugu attaveqatigiiffik pillugu paasisaqarnerorusukkuit Gert Mulvad attavigiuk uunga allallutit: gm@peqqik.gl. Kalaallit Nunaanni Peqqissusermik Ilisimatusarfimmi sulissutigineqartut pillugit paasisaqarnerorusukkuit attavigiuk: healthresearch@uni.gl.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk