Ilisimatusarfimmi - ujarlerpoq

Kalaallit jodeqarluartunik nerisaqarnissamut naleqqussarsimarpasissut

01.12.2021

Saqqummersitaq
- download

Paneeraq Noahsen, Karsten Rex, Inge Bülow Pedersen, Gert Mulvad, Hans Christian Florian Sørensen, Michael Lynge Pedersen, Stig Andersen - THYROID Volume 31, Number 12, 2021

Nunatsinni ilisimatusarnermi nassaat malillugit ilimagineqarpoq kalaallit jodimik annertunerusumik pisariaqartitsisut, qinersip torluup saaniittup nappaataat pinaveersaartinniarunikkit. Misissuineq ilisimatusarnikkut atuagassiat nuimanerit ilaanni Thyroidimi oktoberimi saqqummersinneqarpoq.

Qinersip torluup saaniittup nappaataat inuianni misissorneqarsimasuni tamani nassaassaakkajupput, nappaatinullu taakkununnga avatangiisit inuullu sannai peqqutaaqataasarput. Nerisat jodeqassusaat qinersip torluup saaniittup nappaateqalersarneranut pingaarnertut peqqutaasarput. Annikippallaamik joditorneq qinersip torluup saaniittup allisoorneranik (struma) sulivallaalerneranillu (forhøjet stofskifte) kinguneqartarpoq, jodeqanngingajattumillu nerisaqarneq qaratsap ineriartorneranut arriillisitsisinnaalluni. Annertuallaamik joditornermi qinersip torluup saaniittup nappaataat autoimmuniusut takussaalersarput, qinersillu sulinera annikillisinnaasarluni (lavt stofskifte). Taamaammat WHO-p qinersip torluup saaniittup nappaataat pinaveersaartinniarlugit innersuussutigaa ullormut jodi 150 mikrogrammi pineqartassasoq.

Nunatsinni pissutsit allanit allarluinnaapput, jodeqarluartunik nerisaqarneq issittumilu najugaqarneq peqqutaallutik. Taamaakkaluartoq nunatsinni qinersip torluup saaniittup nappaataasa qanoq atugaatiginerinik ilisimasat amigarsimapput.

Taamaammat qinersip torluup saaniittup nappaataasa qanoq atugaatigineri misissorpagut piffinni marlunni, nerisatigut joditornikkullu assigiinngitsuni.

Nuummi Ammassallullu pigisaanni najugallit 50-init 69-it tikillugit ukiullit peqataapput, paasissutissat inooriaatsimut, nerisanut nappaatinullu tunngasut katersorneqarlutik. Quumik katersuisoqarpoq aaviisoqarlunilu. Peqataasut takissusaat oqimaassusaallu uuttorneqarput, qinersillu torluup saaniittup allisoorsimaneranik (struma) misissuisoqarluni. Quup jodeqassusaa misissorneqarpoq, aammiillu qinersip torluup saaniittup sulinera misissorneqarluni.

Paasivarput kalaallit Nuummi najugallit WHO-p innersuussutaata assinganik joditortut, kalaallilli Ammassallup pigisaani najugallit WHO-p innersuussutaanit annertunerulaartumik joditortut. 

Tupaallaatigisatsinnik paasivarput amerlasuut qinersip torluup saaniittup sulivallaalerneranik nappaateqartut (forhøjet stofskifte), ikinnerusullu qinersip annikillisimasumik sulineranik nappaateqartut (lavt stofskifte). Paasisagut tupaallaatigaagut peqqutigalugu taamatut nappaatit agguataarneqarneri inuiaqatigiinni jodimik amigaateqartuni takussaasarmata. Nunatsinnilu kalaallit jodimik naammattumik nerisaqarlutik. 

Taassumap saniatigut paasivarput qinersip torluup saaniittup nappaataannik atugaqartut nassaarisatta 83 procentii peqqinnissaqarfimmit ilisimaneqanngitsut.

Paasisatta isumaliortilerpaatigut kalaallit ukiorpassuarni jodeqarluartumik nerisaqarnermikkut naleqqussarsimasut. Tamanna ilumoorpat isumaqarpoq kalaallit qinersip torluup saaniittup nappaataat pinaveersaartinniarlugit jodimik pisariaqartitsinerat WHO-p innersuussutaaniit annertunerusoq.

Tamaammat ilisimatusarnerput ingerlateqqissavarput, sukumiinerusumik paasisaqarumalluta.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk