Kalaallit Nunaanni pilimasut piitsunit angerlarsimaffeqanngitsunillu salliutitaapput

Kalaallit Nunaanni pilimasut piitsunit angerlarsimaffeqanngitsunillu salliutitaapput

01.05.2018

Allattoq:
Steven Arnfjord

Kalaallit Nunaanni isumaginninnikkut politikkimik amigaateqarneq pillugu allaaserisaq nutaaq

Allattoq Steven Arnfjord

Allaaserisami qulequtaqartumi “Kalaallit Nunaanni isumaginninnikkut ammasumik polikkeqarnissamut neokonservatisme qulangiisuuvoq” allaaseraara Kalaallit Nunaanni ikiorneqarnissamik pisariaqartitsinerpaat, tassa piitsut angerlarsimaffeqanngitsullu, naammattumik iliuuseqarfigineqannginnerat. 

Tassami Kalaallit Nunaanni piitsuuneq angerlarsimaffeqannginnerlu erseqqissigaluttuinnarput innuttaasut inersimasut akornanni, ajornartorsiutilli iliuuseqarfiginissaannut pikkorinnerusariaqarluinnarpugut – aap, inoqatitsinnik ajorsartunik ikiuinissamut pikkorluppallaaqaagut.

Allaaserisami tunngavilersukkamik oqaatiginiarpara (immaqa puffassaarerpalulaartumik) piitsunik angerlarsimaffeqanngitsunillu ikiuiniariaaserput inunnik pineqartunik akuutitsinngippallaartoq. Aap, inunnit nuannarineqarnissaq pillugu ikiuiniartarpugut “innuttaaqatigiinni pilimasut atugarissaarnerannik” taaneqartartoq aallaavigalugu.

Tamannarpiaq Kalaallit Nunaanni neokonservatisme tunngavigalugu ukkatarinninnermik allaaserisami taaneqarpoq. 

Peqqarniikujuttumik oqaatigalugu: Kalaallit Nunaanni innuttaaqatigiinni pilimasut eqqarsaatiginerusarpavut inoqatitsinnik piitsunik angerlarsimaffeqanngitsunillu ikiuiniaraangatta.

Allaaserisami aalajangersimasunik siunnersuuteqarpunga taamatut ukkatarinninnerup qanoq allanngortinneqarsinnaaneranik: 

  • Inuk ajornartorsiortoq aallaavigissavarput – inuimmi ajornartorsiortut assigiinngillat, pisariaqartitaallu assigiinngillat
  • Isumaginninnikkut politikkinik nutaalianik siunnerfiliisunillu suliaqassaagut – aamma inunnik ikiorneqarnissaminnik pisariaqartitsinerpaanik akuutitsisunik 
  • Angerlarsimaffeqanngitsut pillugit periusissanik suliaqassaagut

Allatut oqaatigalugu: Neokonservatisme tunngavigalugu ukkatarinninneq maanna atuuttoq qimassavarput – ukkatarinninneq inunnik akuutitsinerungaartoq tungaalissavarput, inuk ajornartorsiortoq aallaavigalugu sulinerulerluta. 

Tassami ukkatarinniffipput allamut nikisinngikkutsigu inuit amerlanerujussuit siunissami ajornartorsiulersinnaapput.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk