Kalaallit Nunaat & Finland

Kalaallit Nunaat & Finland

03.12.2018

Atuakkiortoq
Ivaaq Kriegel

Ilinniartut marluk Ane Sofie Løvstrøm aamma Navarana Kristensen aamma Ivalo Abelsen aamma Ivaaq Kriegel Ilinniartitsinermik Ilisimatusarfimmi fagimi Eqqumiitsuliornermi Illuliortaatsimilu ilinniartitsisut marluk Finlandiliarput universitetimik meeqqallu atuarfianni alakkaaniarlutik

1

Saamerlerniit: David Yoken, Ivalo Abelsen, Ivaaq Kriegel, Antonella Storti, Ane Sofie Løvstrøm aamma Navarana Kristensen 

Finlandimi Turku University of Applied Sciences (TUAS) aamma Ilisimatusarfimmi Ilinniartitsinermik Ilisimatusarfik Nordplus-imik suleqateqarluarput – tamatumunngalu tunngatillugu Ilinniartitsinermik Ilisimatusarfik Finlandimiissimavoq TUAS-imi nipilersornermi lektorimit seniorimit David Yokenimit aaqqissugaasumik. Tamanna pivoq 2018-imi novembarip 5-ianniit 10-annut illoqarfimmi Turkumi Finlandimiittumi, ilinniagaqarnerup silarsuaani ilisimasanik paarlaateqatigiinnissaq sammineqarnerulluni, pingaartumik fagini eqqumiitsuliornermut tunngasuni.

Siullermilli Danmarkikkoorluta angalavugut Professionshøjskole Absalon-imi ilinniartitsisunngorniarfiup alakkarnissaanut periarfissaqarluta – lektorimit Peter Herstedimit aaqqissugaasumik. Absalonip Roskildemi Vordingborgimilu campusii alakkarpavut. Ilinniartuutivut marluk ilinniartut nunanit tamalaaneersut fagimi Æstetikkimi ilinniartinneqarneranni najuupput. Danmarkimi angalanermi aamma Køgemi meeqqat atuarfiat Askov Skolen alakkarneqarpoq, taqqavani ilinniartitsisoq Lise Bencard naapisimaarneqarluni: Taassuma oqaluttuaraa meeqqat atuarfiat Askov Skolen qanoq ingerlanneqarnersoq – aamma takutippaatigut atuarfik qanoq aaqqissugaanersoq.

Alakkakkatta ilagaat eqqumiitsulianik nutaaliaasunik katersugaasivik, Arken, tassanilu takuavut Van Goghip eqqumiitsuliai aamma Ugo Rondinonep takorluugaa quiasaarisartunik inunnut ilumoortunut assingulluinnartunik 45-nik ’inuttalersugaq’.

Finlandimi tikeraarnitsinni Turku University of Applied Sciences aamma meeqqat atuarfiat Pääskyvuoren koulu alakkarpavut – aamma Turku - Art academy-mi ilinniartitsineq malinnaavigaarput. Alakkaanitsinni paasivarput ilinniartitseriaasiat qanoq isumassarsiorfigisinnaanerlugu ilisimasallu nutaat Ilinniartitsinermik Ilisimatusarfimmi ilinniartitsinitsinnik ineriartortitsinermut qanoq atorsinnaagivut.

Ilaatigut Art akademimi unnussiuaarneq ilinniartut aaqqissugaat isumassarsiffigaarput. Eqqumiitsulianik qitinnermillu takutitsisoqarpoq isiginnaartitsisoqarlunilu kikkunnit tamanit alakkarneqarsinnaasunik. Tamanna maani Nunatsinni isumassarsiorfigilluarsinnaavarput – uagut nammineq ilinniartuutivut ilinniarnerminni naammassisimasaminnik takutitsisinnaallutik.

2

Tamanik alakkaatitsineq / unnussiuaarneq

3

Unnussiuaarnermi qitinnermik takutitsineq

Meeqqat atuarfiannik Pääskyvuoren koulu-mik alakkaaneq

Meeqqat atuarfiannik Pääskyvuoren koulu-mik alakkaanerput atuarfimmi pisortami Erkki Rötkönenimit aaqqissugaavoq. Alakkaanitsinni ilinniartuutivut marluk ilinniartut 4. klassemi atuartunut Kalaallit Nunaat pillugu saqqummiussipput – ilaatigut imermik sermersuarmeersumik nassataqarpugut ilinniartut sermersuarmit tusaamasaasumit imermik ussiilaarniassammata. Aamma meeqqat atuarfiannik Pääskyvuoren koulu-mik alakkaagatta ilinniartitsineq atuartut Finlandimeersut atuartullu Bangladeshimeersut VR (virtuel realitet) atorlugu ilinniartinneqarnerminni suleqatigiiffigisaat malinnaavigaarput. Atuarfeqarnerup silarsuaani tamatuminnga atuineq nutaajuvoq – VR-ip atorneratigut kulturinik assigiinngitsunik marlunnik qanoq suleqatigiilluarnerulersitsisoqarsinnaanera takullugu. Taakkua oqarnerattut, atuartunut Finlandimiunut Bangladeshimiunullu tunngatillugu misileraanermut siunertaavoq ilinniariaatsinik nutaanik atuinissaq – aamma siunissami piginnaasat, nunarsuarmioqataassuseq, oqaatsit matematikkilu pillugit ilinniarnissaq.

4

Virtual Reality meeqqat atuarfianni Pääskyvuoren koulu-mi ilinniartitsinermi 

5

Ilinniartitsisut Ilisimatusarfimmeersut, Turku University of Applied Sciences-imeersut meeqqallu atuarfiannit Pääskyvuoren koulu-meersut atuartut Finlandimeersut atuartullu Bangladeshimeersut Virtual Reality-mik suliaqartut malinnaavigaat

Kalaallit Nunaat pillugu Kalaallillu Nunaanni eqqumiitsuliornerup oqaluttuarisaanera pillugu saqqummiussineq

Sisamanngornikkut ilinniartuutivut marluk ilinniartitsisorlu Ivalo Abelsen Kalaallit Nunaat, Kalaallit Nunaanni eqqumiitsuliornerup oqaluttuarisaanera eqqumiitsuliortullu peqatigiiffiat KIMIK pillugit saqqummiussipput. Saqqummiussineq Art Akademimi pivoq ilinniartut ilinniartitsisullu najuutsillugit. Oqalugiaat aallarnerneqarpoq ilinniartut Ane Sofie Løvstrømip aamma Navarana Kristensenip Kalaallit Nunaat pillugu oqaluttuarnerannik, ilinniartitsisorlu Ivalo Abelsenip oqalugiaat naggaserlugu Nunatsinni eqqumiitsuliornerup oqaluttuarisaanera pillugu saqqumiivoq.

6

Ilinniartut Ane Sofie Løvstrøm aamma Navarana Kristensen Kalaallit Nunaat pillugu saqqummiussisut

Siunissami Finlandip Kalaallillu Nunaata attaveqatigiilluarnerulersinnaanerat

Finlandimut angalanitsinni Turkumi universitetimut meeqqallu atuarfiannut Pääskyvuoren koulu-mut alakkaavugut – alakkaanitsinnilu Finlandimi atuarfeqarnerup silarsuaa qanoq ingerlanersoq paasisaqarfigaarput. Angalanitsinni eqqumiitsuliornermik isumassarsiullaqqissusermillu assigiinngitsutigut qanoq pitsaanerulersitsisoqarsinnaaneranik paasisarpassuaqarpugut – aamma angalanitsinni allanut attaveqarluarnerulernissamut ilisimasanillu Ilinniartitsinermik Ilisimatusarfimmi qanoq ilinniartitsilluarnerulersinnaanitsinnut tunngasunik paarlaateqateqarnissamut periarfissaqarluarpugut.



Kommunikationskontor

Kom nemt i kontakt med vores kommunikationskontor

Læs mere

Nutaarsiassat

Ilisimatusarfik pillugu nutaarsiassat

Atuaruk

Tusagassiuutit

Ilisimatusarfik tusagassiuutini

Atuaruk