Ilisimatusarfimmi - ujarlerpoq

Kalaallit qimmiata siunissaa

15.05.2020

Allattut Manumina Lund Jensen, Pipaluk Lykke, Ulunnguaq Markussen aamma Morten Meldgaard, Qimmeq pillugu suliniut, Ilisimatusarfik

Piffissami aggersumi Inatsisartuni kalaallit qimmiinik qimuttunik qimmeqarneq illersuinerlu pillugit Inatsisartut inatsisissaattut siunnersuut suliarineqassaaq. Inatsisissami ilaatigut kalaallit qimmiinik eqqussineq annissinerlu, nerukkaasarneq, akiuussusersuineq, qimmit sungiusaaviinik ingerlatsineq sukkaniutitsisarnerlu sammineqarput.

Ilisimatusarfimmi Qimmeq pillugu Suliniut, peqatigiiffiit oqartussallu allat peqatigalugit, inatsisissamik suliaqarnerup nalaani tusarniaasitsinermi peqataavoq. 3. februar Namminersorlutik Oqartussanut ilaatigut ima allappugut:

"Qimmeqarnermi kulturimut qimmerlu pillugu naleqartitat attanneqarluarnerpaaffissaat angutserlugu oqimaaqatigiissaarisoqassaaq. Inatsit ingasattajaartumik mikisualunnik samminnittoq nakkutilliivallaartorlu, ulluinnarni qimmeqarnermut ajornakusoortitsinerulissaaq kulturillu tamassuma ingerlaannarnissaanut ikiuutaassanani".

Neriuppugut politikerit oqimaaqatigiissitsinermik aqqutissiuussiumaartut.

Qimmilli qimuttut attanneqaannarnissaannut inatsisimmik akuersineq naammassava?

Soorunami naamik!

Qimmeq qimusseqarnerlu pillugit annertuunik iliuuseqartoqartariaqarpoq.

Pipaluk Lykke Sisimiuni decembarimi 2016-imi kiisalu Nuummi decembarimi 2019-mi isumasioqatigiisitsinernik pilersitsisuusimavoq. Isumasioqatigiinnerni qimussertartut, takornarialerisut inuillu Qaanaameersut, Tasiilameersut, Sisimiuneersut Kalaallit Nunaannilu allaneersut, kiisalu Chukotkameersut, Alaskameersut aamma Nunavummeersut peqataapput. Taakkualu qimmeqarnerup attanneqaannarnissaanut ineriartortitsinissamut politikerinut oqartussanullu inassuteqaatinik apuussaqarput.

Inassuteqaatit ataatsimut imatut eqikkarneqarsinnaapput:

  • Kinguaariit tulliini qimussertarnermik ilinniartitsinissaq. Kalaallit Nunaanni meerarpassuit inuusuttorpassuillu qimmeqarnermik qimussertarnermillu ilinniarnissamut periarfissaqaratik peroriartortarput. Kalaallit Nunaanni immikkut ikorfartortarialinnik efterskoleqarpoq, sannaveqarpoq allanillu pitsaasunik ingerlatsisoqartarpoq.
  • Qimussit snescooterinit unammillerneqarnerannit illersorneqarnissaat. Qimussimik tammajuitsussatut piniariartitsinerit, qimussinik qaleralinnik assartuisarnerit allallu snescoorterinit inangerneqariartuaarput. Tassani qimussit iluaquserneqartarnissaat anguniarlugu aalajangiisarnerit pisariaqarput.
  • Qimussertarnermi kulturip pingaartortaanut politikerinut allanullu siunnersuisuusinnaasunik qimmit pillugit siunnersuisoqatigiinnik pilersitsinissaq.
  • Kalaallit Nunaanni uumasut nakorsaatigut amigaateqarneq, kiisalu nunaqarfinni illoqarfinnilu qimminut nakorsaatinik amigaateqarnerit iluarsiniarneqassapput, assersuutigalugu telemedicin kiisalu nakorsaatinik agguaassisarfiit pigineqareersut atorlugit.
  • Qimmip ataqqinaatissaatut, ilisimasanik katersuiveqarnissaq ilisimasanillu ingerlateqqiiveqarnissaq anguniarlugit qimussinut centeriliornissaq imaluunniit højskoleliornissaq.

Qimussinut centereqarnissaq 1. maj KNR-ikkut radioavisimi eqqaaneqareerpoq. Naalakkersuisoq siunnersuuteqarpoq Ilulissat kangerluani takornarianut sullissivissamut atatillugu qimussinut centeri pilersinneqarsinnaasoq:

"Tassani ilinniartitsisarneq, ilisimasanik paarlaasseqatigiittarnerit ilisimatusarnerlu sammineqartassapput, paasissutissallu tassanngaanneersut atuarfiit aqqutigalugit meeqqanut atuartunut, katersugaasivinni aaqqissuussinissanut ilinniarfinnullu allanut siammarterneqassapput, tassani siunertariaqarluni naleqartitsinissaq aammalu kalaallit qimmiata qimuttup piujuaannarnissaa".

Centeri pingaaruteqarpoq. Qangatuulli qimussertarnermut kulturip atassuserneqarnissaa pingaaruteqarpoq. Taamaattumillu Ilulissat kangerluani takornarianut sullissivissamut inissinneqarnissaa eqqortuunersoq apeqqutaavoq ammasoq.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk