Ilisimatusarfimmi - ujarlerpoq

Qimussertarneq tammariartortoq pillugu filminik takutitseqqaarneq

26.03.2019

Filmit marluk International Wildlife
Film Festival-imut ilanngunneqarput

Ilisimatuut ilisimatusarnermi suliaat QIMMEQ tallimanik filminik pilersitsivoq. Inuusuttut utoqqaallu qimussertartut qimussertarneq pillugu eqqarsaataat filmini saqqummiunneqarput. Filmit marluk International Wildlife Film Festival (IWFF)- imut, Montana-mi USA-miittumut, ilanngunneqarput.

Nunat issittut avannarlerni Kalaallit Nunaat qimminik qimuttuuteqarnerpaapput. Qimussertarneq ileqqutoqaavoq immikkuullarissoq – qimussertarnerli tammariartorpoq, qimuttut ukiut 20-it ingerlaneriinnaani 50%-imik ikileriarsimammata.

Filminik tulleriiaartunik ”Qimmit tammarpata”-nik taaguutilinnik QIMMEQ pilersitsivoq. Filmit tulleriiaartut ilisimatuut suliaanni immikkoortuni ilaanniipput, qimuttullu timaata kingornussaanut misissuinermi, kulturikkut oqaluttuassartaani peqqissutsimullu paasissutissanik ingerlatitseqqittussaalluni.

Filminik assiliisoq, Frederik Teglhus, filmit tunuliaqutai oqaluttuarivai:

Pingaartissimavarput uagut filminik assiliisartuussugut tunuarluta qimussertartut kalaallit nunaanni ullutsinni pissutsit oqaluttuaritinnissaat. Ilisimannillutik qimmit qimuttut 2018-imi kalaallit inuiaqatigiinni inissisimaffiat oqaluttuaanni erserpoq. Atassuteqaatini Facebook Kalaallit Nunaanni pingaarnerpaavoq, tassuunalu inuit amerlanerpaat anguneqarsinnaallutik. Taamaattumik pingaartissimavarput filminik tallimanik qimussertartut oqaluttuai tunngavigalugit pilersitsiniarluta, Facebook-ikkut siammartersinnaasatsinnik."

Filminik pilersitsisoq, Anders Drud, nangippoq:

Allannguutit iluamik paasinarsisarput, oqaluttuartup allannguutit misigereersimappagit. Filmiliorneq atorusussimavarput ilisimatusarnermi paasissutissat erseqqitsinnerulerniarlugit ataqatigiilertinniarlugillu. Neriuutigaarput filmiliani oqaluttuat inuit kulturiannut ullutsinnilu kinaassutsimut oqallinnermi tunniussisinnaalluassasut. Pingaartumik neriuutigaarput filmit qimmit qimuttunik soqutiginnitsitsinerulerumaartut tulluusimaarnermillu pilersitsilerumaartut, qimussertarneq siunissami atatiinnarumallugu.

  • Filminik tallimanik takutitseqqaarneq ingerlanneqassaaq sisamanngorneq martsip 28-ani nal. 18.30-21.30 Qasigiannuit Timersortarfianni

Takutitseqqaarneq Avannaata Qimussersuanut atatillugu pissaaq. Ukioq manna 2019-imi Qasigiannguani ingerlanneqassaaq, tassanilu QIMMEQ najuutissalluni.

Filmit tallimat

Piniartoq – Fangeren

 

23-inik ukiulik, Martin Madsen, tunup avannaata sineriaani suli qimuttut puisinik nannunillu piniarnermi atugarai – tamannalu ilaqutaasa atugariuaannarsimavaat. Kisianni Kaalaallit Nunaanni pissutsit allanngoriartorput, kalaallillu qimuttuat arriitsumik tammariartorpoq. Ittoqqortoormiut nunaqarfiani Martin-ip qimmillu siunissartik apeqquserpaa.

Sukkaniunneq - Væddeløbet

 

Kalaallit Nunaata kitaani angut inuusuttup Avannaata Qimussersuani ajugaanissani sinnattorivaa. Qangarujussuaq assartuinermut atugaasimasoq, massakkullu sukkaniuutinngorsimasoq. Filmimi Sukkaniuunneq -mi 13-inik ukiulik, Nick, aatsaavissuaq sukkaniuunnermi peqataasoq malinnaavigineqarpoq. Oqaluttuassartaa 72-inik ukiullip, qimussillammaap Ville Siegstad-ip, oqaluttuassartaanut ataqatigiisinneqalerpoq. Ville inuusuttunut qimussertartunut maligassiuilluartuuvoq.

Angalatooq – Den rejsende

 

Angut 1992-ip 2006-illu akornanni 20.000 km sinnerlugu qimusserluni inuiaat inuit Canadami Alaskamilu kulturimit kingornussassaat ataqatigiisilerniarlugit angalaarsimavoq. Nuummi angerlasimaffimmini Kalaallit qimuttuata siunissaa eqqarsaatersuutigivaa. Angalaartoq tassaavoq qimussillammaap Ono Fleischer-ip eqqaamasalersaarutai.

Eriagisagut - Pioneren

 

Kalaallini siullerpaalluni sakkutooqatigiinni, Sirius Patrujlen-imi, peqataanikup annaassiniarneq inuunermik allannguisimasoq oqaluttuarivaa. Qimuttunut ataqqinnissutsinni utersaarfigaa, qanorlu qimuttut aniguiniarnissamut pingaaruteqarsimaneri oqaluttuaralugu.

Ingerlatitseqqiineq - Arven

 

Sisimiuni Johannep qimuttuutini atornerorusullugit suliffinni taamaatiinnarsimavaa. Johanne arnat Kalaallit Nunaanni qaqutigoortut ilarivaat - inuussutissarsiutigalugu piniartuuvoq. Tuttunniarneq takornarianillu angallassineq inuussutigivaa. Johanne neriukkaluarpoq ernutaqqiutini aamma tamanna aqqutigiumaaraat, Sisimiunili pissutsit allanngoriartorput. Ingerlatitseqqiineq kinaassutsimut ujartuinermut aammalu qimmit qimuttut, nunat issittut avannarlerniittut, kingulliit siunissaannut tunngavoq.

 

 

Facebook-ikkut paasissutissat kingulliit takusinnaavatit: Facebook.

Attavissaq

  • Professor Morten Meldgaard, pisortaq/leder af QIMMEQ-projektet. Tlf. +299 58 19 55. Email: mome@uni.gl
  • Producer Anders Drud. Tlf. +45 5182 6982. Email: adjordan@snm.ku.dk
  • Assiliisoq/Filmfotograf Frederik Wolff Nisbeth Teglhus. Tlf. +45 4046 7178. Email: fwolff@snm.ku.dk

QIMMEQ pillugu

QIMMEQ – kalaallit qimmiat qimuttoq tassaavoq ilisimatusaatit akimorlugit ilisimatusaatigalugu suliaq, kalaallisut qallunaatullu ingerlanneqartoq. Kalaallit qimmiata qimuttup kulturikkut pingaarutaanik nassuiaasoq timikkullu sananeqaatimigut oqaluttuarisaaneranik erseqqissaaviusoq. Ilisimatusarnermi suliaq immikkoortoq peqqinnissamut tunngaveqarpoq, tassanilu peqqissuseq, nappaatit, napparsimalernermi peqqutit illersuinissarlu misissorneqarlutik.

Paasisaqarnerugit https://qimmeq.ku.dk/om-qimmeq.

The 42nd International Wildlife Film Festival (IWFF), Montana pillugu

Om The 42nd International Wildlife Film Festival (IWFF), Montana 1977-imi Montanap Ilisimatusarfiani festivaali pinngortinneqarpoq, assigiisaanilu siullerpaajuvoq sivisunerpaamillu atasimalluni. IWFF-imi pingaartinneqarput oqaluttuat soqutiginartut, paasissutissartallit aammalu ilisimatusarnermi, uumassusilinnik inunnullu paasisimasaqarnermut nunarsuarmullu ullut tamaasa sunniutaasinnaasunut pingaartitsillutik.

Paasisaqarnerugit: https://wildlifefilms.org/films.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk