Ilisimatusarfimmi - ujarlerpoq

Meeqqat atuarfianni ilisimatuutut misissuineq suliniuteqarfittut

16.10.2020

Anne Merrild Hansen, PhD atuarfimmi pisortaq & Britta Lohmann, Ilinniartitsinermik Ilisimatusarfimmi pisortaq

Kikkut tamarmik isumaqataassagunarput oqarutta meeqqat atuarfiat pingaaruteqarluinnartoq. Meeqqat atuarfiata atuuffia sulineralu inuiaqatigiinni pissutsinut assigiinngitsorpassuarnut pingaaruteqarput. Atuartut nalerisimaarnissaannut ilinniarnerannullu, ilinniakkamut allamut ingerlaqqinnissamut periarfissanut taamalu Nunatsinni ilinniakkat pitsaassusiinut, suliffissatut periarfissanut taamalu aamma atorfinitsitsiortornermut inuussutissarsiornikkullu inuunermik ineriartortitsinermut. Soorunalimilu atuarfinni sulisunuttaaq atuarfeqarfinnullu pingaaruteqangaarput.

Ilisimatusarfimmi aamma meeqqat atuarfiannik pingaartitsivugut. Maanimi meeqqat atuarfianni ilinniartitsisunngortussat kinguaariit tullii Ilinniarfissuarmi ilinniartippavut. Tamanna amerlanersassi nalunngereerunarpaat. Ikittuinnaalli eqqumaffigisagaat tassaavoq maani allamik aamma suliniuteqarfeqarnerput. Suliniuteqarfippullu taanna ukiuni makkunani ineriartulertorpoq. Meeqqammi atuarfiat pillugu nutaanik ilisimasassarsiorneq – ilisimatusarnermik tunngavilimmik ilisimasaqalernissaq – tamakkiilluta suliniuteqarfigilersimavarput.

Miserratiginngilarput nunami maani pissutsit atuuttut aallaavigalugit atuarfimmik misissueqqissaartoqartariaqartoq tamannalu pillugu ilisimasaqarnerulertoqartariaqartoq. Ilinniartitsinermik Ilisimatusarfiup ph.d.-nngorniarfiullu suleqatigiinneratigut rektorillu Gitte Reimerip tapersersuilluarneratigut ilinniartitsisunngorniarfimmi ilinniartitsisorpaaluit ph.d.-nngorniuteqalerput. Suli ilinniartitsisarput, suliitigalutilli ilaatigut ilisimatuutut misissuissapput. Taamaalilluta ilinniartitsineq ilinniartitseriaatsillu pillugit nutaanik atorluarsinnaasunillu ilisimasaqaliinnassanngilagut. Periarfissaqalissaagut ilisimalikkat taakkua ilinniartitsisunngortinniakkatsinnut toqqaannartumik ingerlateqqinnissaannut.

Paasisassarpassuaqarpoq. Atuarfeqarneq ilisimatuutut misissuiffigineqarpiarsimanngeqaaq, misissuinerujartortillutalu paasisaqarnerujartuinnassaagut! Ukiut ingerlanerini Kalaallit Nunaanni meeqqat atuarfiat ilisimatuutut misissuiffigineqangaatsiarsimavoq, konsulentillu nalunaarusiortarsimapput, tamakkualu tamarmik suliarineqartarsimapput ingammik suliffeqarfinnit Danmarkimeersunit. Taamaalilluni ilisimalerneqarsimasut soorunami nuannaarutigisarpavut ullumikkullu atortarlugit. Ilisimasassalli misissuiffigineqarsimanngitsut ima annertutigipput suliniutinik suli amerlanerusunik aallartitsinissamut akissaqarsinnaarusukkaluarluta.

Ilisimatuutut misissuinerit massakkorpiaq ingerlanneqartut Ilisimatusarfiup, Kalaallit Nunaanni ilisimatusarnermut siunnersuisoqatigiiffiup Danmarkimilu universitetit assigiinngitsut suleqatigiinnerisigut aningaasalerneqarlutillu aallarnisarneqarsimapput. Ilinniartitsinermik Ilisimatusarfimmi ph.d.-nngorniat siulliit 2016-imi naammassipput. Matumani suliarineqarput Anders Øgaardip ph.d.-nngorniutaa ”Fjernundervisning i skolen i Grønland” aamma Lars Demant-Poortip allaatigisaa ”Naturfagsdidaktik i den grønlandske folkeskole – et multipelt casestudie om natur, undervisning og sprog”. Taakku ullumikkut Ilinniarfissuarmi ilinniartitsisuupput, meeqqallu atuarfiannut tunngatillugu arlalinnik ilisimatuutut suliniuteqarlutik.

Taamanimiilli suliniutit suli allat sisamat aallartinneqarsimapput arlallillu misissueqqissaarnerminni angusaqarluareersimallutik. Louise Pindstrup Andersenip meeqqat atuarfiata akornutaasunik unamminiartunillu inuusuttut nalaattagaannik aallaaveqarluni meeqqat atuarfiat qanoq pædagogiskiusumik iliuuseqarsinnaasoq inuusuttullu ilinniagaqaqqinnissaannik qanoq qulakkeereqataasoqarsinnaasoq misissuiffigaa. Ivalu Mathiassen atuartunut nukarlernut atuarnermi periutsinik misissueqqissaarpoq kalaallisut atuarnermik ilinniartitsinermik pitsanngorsaanissaq samminerullugu. Kirsten Fønsip silami atuartitsineq atuartitseriaatsitut suliaraa atuartut ilinniarususseqarnerulernissaat piumassuseqarnerunissaallu siuarsarniarlugu, kiisalu Cecilia Pedersenip atualeqqaarnermi meeqqanik attaveqatigiillualersitsiniarnikkut meeqqat atuarfimmi nalerisimaarnerat ilisimatuutut misissuiffigaa. Aamma allanik Ilisimatusarfimmiittoqarpoq meeqqanik meeqqat atuarfianniittunik ilisimatuutut misissuiffiginnittunik.

Soqutiginnittut tamaasa kajumissaarusuppavut ph.d.-nngorniarfiup nittartagaanik alakkaaqqullugit. Ph.d.-nngorniat allattorsimaffianni taakkualu profiiliini allaaserisaannut linkit nanineqarsinnaapput ”publikationer” toorlugu. Taakkua saniatigut ilisimatooqarpoq ph.d.-nngorniaqarlunilu meeqqat atuarfianni ilisimatuutut misissuinertik pillugu qaqugukkulluunniit saaffigineqartarusuttunik.

Tassa torraasunik pingaaruteqartunillu suliniuteqartoqarpoq. Neriuutigaarput suliniutigineqartut uagutsinnut politikkikkullu aalajangiisartunut iluaqutaassasut matumunnga tunngatillugu: peqatigiilluta meeqqat atuarfiannik tapersersuillutalu nukittorsaaqatigiissinnaaniassagatta taamalu meerartatta inuusuttortattalu siunissami ilinniartinneqarnissaannut sapinngisamik pitsaanerpaamik tunngavissiilluta.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk