Telemedicin Kalaallit Nunaanni – innuttaasunit isigalugu

Telemedicin Kalaallit Nunaanni – innuttaasunit isigalugu

01.05.2018

Allattut: Lasse O. Nielsen
& Lise Hounsgaard

Allattut Lasse Overballe Nielsen & Lise Hounsgaard

Kalaallit Nunaanni peqqinnissaqarfimmi siunertaavoq kikkunnut tamanut assigiimmik peqqinnissakkut sullissisinnaanissaq. 

Nunani issittuni allanisulli tamanna suliassaavoq imaannaanngitsoq nunarujussuaq inukitsuinnaammat (56.000 miss.) inuillu siamasillutik najugaqarmata. Siornatigut ilisimatusartarnertigut paasinarsisimavoq kulturimik paasinninnissaq sumiiffinnilu atortussanik sulisussanillu ineriartortitsinissaq aalajangiisuulluinnartartut nunani issittuni peqqinnissaqarfinni teknikkikkut atortorissaarutit nutaat atulersinneqassagaangata. Telemedicin Kalaallit Nunaanni 1990-ikkut aallartinnerannili atorneqarsimavoq, 2011-milu peqqinnissaqarfimmi iluarsaaqqinnerup kingornatigut teknikkikkut atortorissaaruteqarnissaq suli sammineqarnerulersimavoq nunap immikkoortuini tamani sullissisinnaanissaq qulakkeerumallugu.

Telemedicinimi aaqqissuussineq ”Pipaluk”

2008-mi telemedicinimi qarasaasiatigut attaveqaatitigut aaqqissuussineq “Pipaluk” ikkussuunneqarpoq Kalaallit Nunaanni illoqarfinni nunaqarfinnilu 70-ini. “Pipaluk”-mi siunertarineqarpoq videokonferencikkut nakorsiarnissamut peqqinnissakkullu isumagineqarnissamut periarfissarissaarnerulernissaq, Kalaallit Nunaanni nakorsiartarfiit napparsimmaviillu siamaseqimmata.

”Pipaluk” atorlugu misissugassat pingaaruteqartut assigiinngitsut, soorlu EKG, aap naqitsinera, ilteqassuseq aamma oqimaassuseq misissorneqarsinnaapput. Aammattaaq “Pipaluk” assiliissuteqarpoq soorlu otoskopimut atorneqarsinnaasumik, taamattaarlu puaat sulinerata misissorneqarnerani aamma stetoskopimi atorneqarsinnaasumik. Taamaalilluni ”Pipaluk” napparsimasut peqqissutsikkut nappaatitigullu ungasianiit naliliiffigineqartarneranni ikiuutissaavoq.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk