Ilisimatusarfimmi - ujarlerpoq

Upperisaq inuiaqatigiillu Hans Egedep tikinneranit ukiut 300-t qaangiunneranni

01.09.2021

Juunip qeqqani Ilisimatusarfik ilasseqatigiissitsivoq atuakkap Hans Egedep Kalaallit Nunaannut tikinneranit ukiut 300-nngornerannik malunnartitsiviusup matuma saqqummersinneqarneranik nalliuttorsiutiginiarlugu: "Upperisaq inuiaqatigiillu Hans Egedep tikinneranit ukiut 300-t qaangiunneranni".

 

Atuagaq pillugu

Norgemiu palasi Hans Egede 1721-mi Kalaallit Nunaannut aallarami eqqortumik oqaatigissagaanni aalajangersimasumik anguniagaqarluni taamaaliorpoq Kalaallit Nunaanni innuttaasut kristumiunngortinniarpai, iluatsippaalu inuunermini suliassatut misigisimasaminut Frederik 4-annit tapersersorneqarnissani. Egede aamma ilaqutai Nuup eqqaani najugaqalerput, tamaani eqqaani najugaqartut inuit kristumiunngortinniarlugit ilungersuutigalugu. Kisianni Egedep Kalaallit Nunaat 1736-mi qimakkammagu ilagiit amerlanerpaartaat, aamma Egedep nulia Gertrud Rask, nappaalallutik toqusimapput, imminullu assortortorujussuuvoq ilumut Guutip suliassaritaa suliarisimanerlugu.

Kalaallit Nunaanni upperisaq inuiaqatigiillu Egedep ajoqersuiartorneranik nutaamik paasissutissiivoq, suliaata ullumikkut akerleriissutaanera pillugu. Ilaasa Danmark sinnerlugu nunasiaatilittut nunap inoqqaavinik, immikkuullarissumik kulturilinnik, naqisimannittutut peqqarniitsutut isigaat. Allat aniguisitsisutut inuppalaartutut isiginiarpaat, Kalaallit Nunaannik siuarsaasutut ataqatigiissitsisutullu taamalu ukiut 300-t qaangiunneranni inuiaqatigiit atugartuunngorsakkat nutaaliaasut aqqutissiuisuattut.

 

"Upperisaq inuiaqatigiillu Hans Egedep tikinneranit ukiut 300-t qaangiunneranni" Aarhus Universitetsforlagimit saqqummersinneqarpoq Dronning Margrethes og Prins Henriks Fondimit, Namminersorlutik Oqartussanit aamma Ilisimatusarfimmi atuakkanik saqqummersitsinissamut aningaasaateqarfimmit aningaasaliiffigineqarluni.

Atuakkamik aaqqissuisuupput Aage Rydstrøm-PoulsenGitte Adler Reimer aamma Annemette Nyborg Lauritsen.



Kommunikationskontor

Kom nemt i kontakt med vores kommunikationskontor

Læs mere

Pisussat

Ilisimatusarfik pisussat

Atuaruk

Tusagassiuutit

Ilisimatusarfik tusagassiuutini

Atuaruk