Apeqqarissaarneq
Ungasianiit atuartitsineq - asuli eqqunneqanngitsoq
Atuartut atuarfimmut iserput, inimilu assiliivik smartboard-ilu ikillugit aammalu ilinniartitsisoq ungasiinnarsuarmiittoq godmorgen-eerlugu ilassillugu. Ilinniartitsisup ullumikkut sammisassat ilisaritillugit saqqummiuppai, qarasaasiakkut atuartinneqarnissami atugassat agguaallugit skærm-ilu atorlugu, atuartut malinnaanersut, suliassaminnik suliarinninnersut alaatsinaallugit, atuartullu ilinniartitsisuminnut apeqquteqarsinnaapput. Ilinniartitsisup ilinniartullu akornanni asseq atorlugu imminnut takusinnaajuarput, ilinniartitsisorlu nakkutiginnissinnaavoq, akuliussinnaalluni arlaannik pisoqaraluarpat.
Nalinginnaalluinnartumik ingerlaneq, ilinniartitsisumit allattarfikkut ilinniartinneqarluni aqunneqarlunilu, assigiinngissutigaluguli inimi ataatsimiinnginnamik, imminnut ungasikkamik. Taamatut ungasianiit atuartitsineq Kommuneqarfik Sermersooq-mi maanna ukiorpaalunngortuni misilittarneqarlunilu ingerlanneqarpoq, taamatummi iliorneq nunaqarfinni ilinniarsimasunik ilinniartitsisoqanngitsuni atuarfeeqqanik matooqqqaanissamut taartaalluartuuvoq.
Assersuutigalugulu tamanna Kapisilinni annertuumik atorneqarsimavoq. Nunaqarfik taanna Nuumminngaanniit 75 km-isut ungasitsigisumiippoq, tassanilu meeqqat Nuummi atuarfinni ininiit ilinniartitsisunit atuartinneqartarsimapput.
Anders Øgaard Ilisimatusarfiup ataani ilinniartitsisunngorniartunut ilinniartitsisuuvoq. Kapisilinni ingerlanneqartoq ph.d-nngorniarnerminut atatillugu ilisimatuutut allataqarami malittarisimavaa. Akunnatuungassuteqarnanilu oqarpoq ingerlanneqartoq, meeqqat nunaqarfimmi ungasianiit atuartinneqarnerat, pitsaassutsikkut iluatsilluartumik ingerlasimasoq.
"Ingerlalluarpoq, atortui misilittagaalluartuupput, silaannakkut attaveqaatit ajunngillat taamallu ingerlatsisoqarsimanngikkaluarpat meeqqat nunaqarfimmit atuariartortitaallutik aallartinneqanngippata angajoqqaat angerlarsimaffimminni atuartittariqartarsimassagaluarpaat, oqarpoq".
Øgaard-ip ungasianiit atuartitsisarneq akuersaarluinnarpaa ingerlatseriaatsitut nunaqarfinni meeqqat ilinniarsimasumik ilinniartitsisoqarnissaasa isumannaarnissaannut. Aammalu ungasianiit atuartitseriaaseq allatut ajornartumik aaqqiissutaannartut isiginngilaa.
"Isumaqarpunga soqutiginartuusoq ungasianiit atuartitsinerup perorsaanermut periarfissiissutitut aama isigisinnaanera. Suleriaasermi qimerloorlugu perorsaanermut ilinniartitsinermullu atatillugu isiginnittaatsimik allannguivoq, allisitserujussuartumik".
Januar-imi ukioq 2016 ph.d.-tut naggataarutitut allakkani illersorpaa, tassanilu ungasianiit atuartitsineq nutaamik eqqarsarnertut saqqummiullugu. Assersuutigalugu Danmark-imi ungasianiit atuartitsineq malittarisimavaa, tassani atuartut atuarfinni pingasuni tuluttut atuartinneqarnerminnut atatillugu ataatsimoorussamik sulisinneqarnerat malittaralugu. Atuartut atuarfinni pingasuni eqimmattanngorlugit aggulunneqarput, taakkunanilu tamarmik peqatigiiffiliortuusaarnissamik suliakkerneqarlutik. Oqarasuaatikkut skype-ikkullu ataatsimiittarput, allataminnik ataatsimoorussamik toqqorterivimminnut ikioraallutik toqqortuisarlutik il.il taamatullu atuartut peqatigiiffiup sammisassaanik il.il nassuiaasiortorput.
"Atuartitsineq annertuumik allattariarsornertalimmik ingerlanneqarpoq, taamallu iliornikkut atuartitsisut atuartut ilinniakkaminnut qanoq inissisimanerat takulluarsinnaallugu, ingerlatsinerlu atuartunut sungiusaataalluarpoq. Aammali atuartut kiffaanngissuseqarnermik annertunerusumik misigisimatinneqarput, namminnermi qanoq ilineratigut sulerusunnerlutik aqussinnaagamikku. Taamak iliornikkut atuartut kiffaanngissuseqarnerulersitaapput akisussaatitaanerulerlutillu", Anders Øgaard nassuiaavoq.
Nammineq aamma assingusumik minnerusumilli nunatta kujataani nunaqarfinni pingasuni ilinniartitsisut suleqatigalugit misiliilluni ingerlatsigaluarpoq. Kisiannili misiliineq attaveqaatit pitsaanngilluinnarnerannik ajornartorsiortinneqarluni.
"Pingaarluinnarpoq pitsaasumik internet-ikkut attaveqarnissaq. Naammanngilarlu atuarfik kisimi attaveqartuuppat, aammami atuartup angerlarsimaffiani akeqanngitsumik imaluunniit akikitsumik attaveqartitaanissaq pisariaqarpoq. Taamaattoqarpammi atuartitsineq, soorlu silapiluk peqqutigalugu, atuarfillu matoqqatinneqartariaqalissagaluarpat atuarneq angerlarsimaffimmit nanginneqarsinnaassammat. Kisiannili njnaqarfinni avinngarusimanerusunilu sumiiffippassuarni internet-imut attaveqarneq akisoorujussuuvoq, pigissallugu angajoqqaanit akissaqartinneqaraniluunniit, soorlu atuartut ilinniartinneqarnerminnut atatillugu youtube video-nik allanilluunniit isiginnaartariqarpata. Taamaattumik atuartunut akeqanngitsumik akikitsumilluunniit internet-eqarsinnaappat iliunniartitsinermut atatillugu periar fissat pitsaalluinnartut pilersinneqarsinnaassagaluarput aammalu tamanna aatsaat piuppat ungasianiit atuartitsineq iluamik ingerlanneqarsinnaalissalluni", Øgaard nassuiaavoq naggasiillunilu oqarluni:
"Uanga qularinngilluinnarpara ungasianiit atuartitsineq nunatsinni atorneqarluarsinnaasoq, atuarfiit ilinniarsimasunik ilinniartitsisussaqanngitsillugit. Kisianni aamma isumaqarpunga periarfissaq atorluaraanni atuartitsinerinnarmut atornagu allanulli aamma atorluarneqarsinnaasoq, soorlu atuartut namminersorlutik eqqarsarsinnaanerisa isornartorsiuerpalaartumillu isiginnissinnaassuseqarnerisa inerisarnissaannut , tassami ingerlatseriaaseq atuartut akuullutik peqataanissaannut annertunerusumik akisussaassuseqarnissamik piumasaqartitsitsisuummat".