Ilisimatusarfimmi - ujarlerpoq

Apeqqarissaarneq

Kalaallit Nunaat ”atisalersorlugu”

Inuit ilisarnaataat, soorlu ulut, avittat nuilarmiullu atisanik nutaaliornerni annertuumik atorneqarlutik takussaalernikuupput. Soorlu assersuutigalugu Bibi Chemnitz, Isaksen Design, Nuuk Couture nutaalianik aamaattut ilisarnaatinngornikuupput ilisarnaatinngornikuuvoq Kalaallit Nunaannik nunarsuup sinneranut nittarsaassisut ilaattut, tassanilu ilusit nunagisamit aallaaveqartut ilisarnartut atorneqarput. Arlaleriarlutik atisanik ilusilersuisartut kalaallisuut annertuumik aallaavigisarsimavaat, kimmikkaanik kamippaliornerminni, kjole-liornerminni il.il..

Ilusilersuineq nutaaliornerlu Kalaallit Nunaata nunanut allanut nittarsaannerani atorneqaraluttuinnarput, soorlu tuniniaalluni saqqummersitsinerni il.il.., taamak iliorluni Kalaallit Nutaata nutaaliaasup takussutissiarineqarnerani atorneqartarlutik. Kalaallit Nunaannili tamanna tamatigut tigulluarneqarneq ajorpoq. Ilaatigut saqqummersut assut oqallisaalersarput inissikkuminaatsinneqartarluni saqqummersut qunusuisaarluni nutaaliornerunersut imal. pilersitat qanga assassortarnermut nikaginninnermik takutitsissutaanersut.

Innuttaasullu taaneqartutut saqqummersunut qisuariartarnerat tassarpiaavoq Rosannguaq Rossen-ip soqutiginartinnerpaasaa. Rosannguaq Adjunkt-iuvoq Ilisimatusarfimmilu ph.d.-mut atuarluni ilisimasassarsiorfigalugu ”Kalaallit Nunaata atisanik assigisaanillu nutaaliornikkut avataanit isigineqarnera”.

"Inuiaqatigiinni annertunerusunik allannguuteqaraangat innuttaasullu imminut isiginnittaasiat sukkasuumik ineriartuleraangat, taava soorlu pisariaqartinneqalersartoq ilisarnaatigisanik allatullu naleqartitanik oqaluttuarisaanerminngaanneersunik qalluilernissaq. Aamma 1970-ip 1980-illu naajartulernerini inuiattut ilisarnaatinik atuineq malunnarseqqippoq – tassa Namminersornerulluni Oqartussaanermut ikaarsaalernitta nalaani, takutikkumaneqarluni, suut inuiattut immikkuullarissutut nammineertutullu ilaatigut kinaassuseqalersikkaatigut, nassuiaavoq nangillunilu: Maanna inuiaqatigiit nunarsuup ”qumariartorneranik” sunnigaapput, taamallu nunarsuup sinnerani pisartut pissutsillu qanilliartuinnarlutik. Imaassinnaavoq taamatut pisoqarnerata pisariaqarnerulersissagaa erseqqissaaqqinnissaq, suut uagut kalaallisut katersuutsikkaatigut".

Rosannguaq Rossen aamma speciale-mik allataqarnikuuvoq qulequtaqartumik ”Politisk- og samfundssatire som talerør i Grønland”, tassanilu aamma qitiutippaa innuttaasut qisuariaateqartarnerat nutaanik isiginnittaaseqarluni nalinginnaanerusumik ilisarnaatitut isigisarisat qaqilerneqaraangata.

"Tamanna assinguvoq mitalliisutut quianartunngortitsinikkulluunniit inuit imminneq isiginnittaasiat tinnersarneqaraangat nutaaliorlunilu ”namminersorluni saqqummiussinerit” sungiusimasatsinnik nikisitsisut pileraangata, ilisimasassarsiortoq oqarpoq".

Maannamut suliani aqqutigalugit Rosannguaq Rossen ammasumik oqalinnerni peqataasarsimavoq soorlu nutaaliornernik saqqummiussinerit pigaangata, taakkunani inuiattut ilisarnaatigut, soorlu ulo, assigisaalu atorneqartillugit. Tamakkuupput ph.d.-mut ilinniarnerminut atatillugu suliaralugit nuannarisai.:

"Ilaatigut nutaaliornernik ilisimasassarsiorneq kisimiilluni ingerlataralugu kiserliornarsinnaasarpoq, taamaattumik pitsaasuuvoq innuttaasunik soqutiginnittunik ilaatigut pisunut ornigunnikkut oqaloqateqarsinnaasarnera aamma nuannarisarpakka angalallunga sulisarnikka, soorlu København-imi Berlinimilu nutaalianik tuniniaalluni saqqummersitsinerni peqataanikkut, takullugu ilisarititsiniarneq pisartuinni qanoq ingerlanneqartarnersoq".

- Allattoq aaqqissuisorlu Pia C. Bang / Apropos & assiliisoq Ulrik Bang


Attavissat

Assigiinngitsut aqqutigalugit attavigisinnaavatsigut

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk