Ilisimatusarfimmi - ujarlerpoq

Evaluering af Grønlands læreruddannelse på Ilinniarfissuaq

08 apriili 2016

Rektorip oqaaseqaataa: "Evaluering af Grønlands læreruddannelse på Ilinniarfissuaq"

 

Meeqqat atuarfiata nalilersorneqarnerata takutippaa ineriartortitsineq pitsaassutikkullu qaffassaanissaq pisariaqartoq, ilinniartitsinermi aqutsinermilu.

Meeqqat atuarfiata pitsanngorsarnissaanut ilinniartitsisunngorniarfik apeqqutaaqataavoq, ilinniartitsisummi amerlanerit tassanngaannertuupput, aamma ilinniaqqinnerit eqqarsaatigalugit.

Tamakku pissutaarpiarput  meeqqat atuarfiat pillugu misissuinerup siorna saqqummiunneqammersup kinguninngua Ilinniarfissuup aamma nalilersorneqarnissaanik aalajangerama. Kissaatigaarami ineriartortitsinissamut paasissutissanik eqqortunik tunngaveqassasugut, meeqqat atuarfianni angusat pillugit pitsanngorsaaqataaniassagutta.

Naliliinermik taamaallaat piumasaqanngilanga. Aammali piffissaq qaninnerusoq ungasinnerusorlu eqqarsaatigalugit pitsanngorsaanissamut siunnersuutinik. Ilinniarfissuaq ilinniarfiuvoq nunatsinni sivisunerpaamik atasimasoq. Sulilu  pingaarnersaalluni, pissutigalugu ilinniarfinnut ingerlaqqiffiusunut tunngaviliisarami.

Nalilersuinerup takutippaa ilinniartitsisunngorniarfimmi pitsaassutsikkut aqutsinikkullu annertuumik aaqqitassaqartoq, inuttulli ataqatigiilluarneq nukittoqutaasoq. Nalunaarusiami oqaatigineqarpoq ilinniarfiup ’mumilluinnarneqarnissaa’ pisariaqartoq. Pisariaqarpoq aaqqitassaqartillugu kinguneqartitsisarnerit malitseqartitsisarnerillu sukateriffiginissaat, linniartut akornanni ataqatigiilluarneq innarlernagu.

Ilinnarfissuarmi aqutsinikkut nukittorsaasoqarnissaa siornali aalajangiunneqarpoq. Instituttimi  pisortaq  immikkoortortani marlunni  aqutsisuliinikkut ikiorfartorneqassaaq, tassalu ilinniartitsisunngorniarfimmi aqutsisumit aamma ilinniaqqiffinnut aqutsisumik. Atorfinitsitsiniarnerit sivisuumik ingerlanneqarsimapput, maajillu aallaqqaataani ilinniartitsisunngorniarfik aqutsisortaassaaq.

Aqutsinikkut aaqqissuussineq nutaaq aqqutigalugu suliassat ajornartorsiutillu nalunaarusiami taakkartorneqartut suliarinissaat isumagineqassaaq.

Rektoritut nuannaarutigaara ilinniartitsisunngorniarfiup ineriartornissaanut sakkussaqaleratta, nuannaarutigaaralu aqutsisut sulisullu peqatigalugit anguniakkanik ineriartortitsiffissanillu nutaanik aalajangersaasinnaaleratta, pitsaassutsimik pisariaqartumik angusaqarsinnaaniarluta.

Naliliinerup saqqummiunneqarnerata malitsigisaanik april-ip 27-ani isumasioqatigiisitsiniarpugu qulequtalimmik: ”Siunissaq pillugu ilinniartitsisunngorniarfik”, tassungalu soqutigisaqaqatigiit pingaarutillit qaaqquneqarput.

Mumisitsineq aallartipparput!

 

Inussiarnersumik inuulluaqqusillunga,

Tine Pars, rektori 

Oq.toqq.: +299 38 56 02 | e-mail: tipa@uni.gl


Nutaarsiassat

Ilisimatusarfik pillugu nutaarsiassat

Atuaruk

Pisussat

Ilisimatusarfik pisussat

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk