Ilisimatusarfimmi - ujarlerpoq

Isumaginninnermut siunnersortinngorniat ilisimatusarnerit nutaat aallaavigalugit ilinniartinneqartassapput

06 apriili 2017

Suzanne Møllerimit, Ilisimatusarfimmi rektoriugallartoq

Ulloq apriilip 3-anni partiit siulittaasuisa apersorneqarneranni Naalakkersuisut siulittaasuata, Kim Kielsen-ip, isumaginninnermut siunnersortinngorniarnerup Ilisimatusarfimmiit nuunneqarnissaa oqaatigaa.

Taamatut oqaaseqarneq isumaginninnermut siunnersortinngorniarnerup siunissaanut assigiinngitsutigut eqqarsalersitsivoq. 

Nunatsinni isumaginninnermut siunnersortinngorniarnerup pingaarutilimmik inissisimaneranik qitiutitsineq tusarluarnarpoq. Inuiaqatigiinni innuttaasunik inuuniarnermikkut ajornartorsiuteqartunik sullissinissaannut isumaginninnermut siunnersortinngorniat pitsaanerpaamik ilinniartinneqarnissaat pisariaqaraluarpoq. 

”Pitsaanerpaamik ilinniartitaaneq” apeqqutinik pilersitsivoq: 

Suliassat kivinnissaanut siunissami isumaginninnermut siunnersortinngorniat qanoq ittunik piginnaasaqassappat? 

Taakku isumaginninnermut siunnersortinit anguneqassappata ilinniarfimmit qanoq ikorfartorneqassappat?

Isumaginninnermut siunnersortinngortussat suliassanik akisussaaffimmillu tigusinissaannut Ilinniartitaanerup pitsaasumik ilikkartitsinissaa qanoq ililluni qulakkeerneqassava? 

Akissutissarpassuaqarpoq, kisianni ilisimatusarfimmi ilinniartitaanerup ilinniartitaanernut allanut sanilliullugu allaassutaa tassaavoq, ilisimatusarnermik tunngaveqarneq:

Ilisimatusarnermik tunngaveqarneq isumaqarpoq, ilinniartitaanerit ilisimatusarfimmit neqeroorutigineqartut, ilisimatuutut misissuisartut akornanniinneq – tassungalu ilaavoq isumaginninnermut siunnersortinngorniarneq.

Ilisimatusarneq uninngaannartuunngilaq, taamaattumillu ilinniartitsineq, Ilisimatusarfimmit neqeroorutigineqartoq pinngitsoorani, ilisimatusarnermit paasisat kingulliit aallaavigineqassapput.

Taannaavorlu ilinniartitsineq ullumikkut ilinniartunut neqeroorutigineqartartoq. Ilinniartitaaneq Ilisimatusarfiup ilinniartitaanerinut akuulluinnarpoq, taamaattumik aalajangiusimavara inuiaqatigiit ataatsimut ujartugaata pitsaassutsip qulakkeernissaanut ilinniartitaaneq ilisimatusarneq aallaavigalugu suli ingerlanneqartariaqartoq. Kalaallinut inuiaqatigiinnut tunngasunik ilisimatusarneq pingaaruteqarpoq. Inuiaqatigiit akuuffigisat pillugit ilisimatusarnermit paasisat ilinniartunit ilisimaarineqartariaqarput. Taakkunannga ilisimasaqalernerup isumaginninnermut siunnersortitut ajornartorsiutit imaannaanngitsut naapittarumaakkat pillugit siunnersuinissaminnut iliuuseqarnissaminnullu piginnaaneqalersittarpai. Isumaginninnermut siunnersortinngorniarnermi Ilinniartitsisut piginnaasaasa qulakkeerpaa – ilisimatusarfimmi inuiaqatigiilerinermik ilinniartitaanerni ilinniartitsisut ilisimatuullu allat peqatigalugit – ilisimasat pineqartut tapertaassapput piareersimasut, ilinniartitaanermullu ilaalluinnartut. 

Tassalu ilisimatuutut misissuisartut piginnaasaat. 

Inuuniarnikkut ajornartorsiutit imaannaanngitsut pillugit inuiaqatigiinni assigiinngitsorpassuarnik ilisimatusarnikkut akissutissarsinissaq pisariaqartarpoq Ilisimatusarfimmilu ilinniartitaanerit allat peqatiginerat isumaginninnermut siunnersortinngornianit ilinniartitaanernilu allani ilinniartunit iluaqutigineqartarpoq. 

Suliamut, aningaasatigut allaffissornermullu atatillugu nukiit Ilisimatusarfimmut ataatsimoortinneqarnissaat isumatusaarneruvoq. Allatut oqaatigalugu; neriuppugut isumaginninnermut siunnersortinngorniarneq ilisimatusarfimmi ilinniartitaanertut ingerlaannassasoq. Isumaginninnermut siunnersortinngornianut inunnullu sullitassaannut tamanna pitsaanerpaassaaq. 

Paasissutissanik amerlanerusunik pissarserusukkuit attavigiuk Suzanne Møller, oqarasuaat 38 56 56/55 13 28, sum@uni.gl.


Nutaarsiassat

Ilisimatusarfik pillugu nutaarsiassat

Atuaruk

Pisussat

Ilisimatusarfik pisussat

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk