Ilisimatusarfimmi - ujarlerpoq

Sooq nunap universitetianut isernissamut piumasaqaateqassava?

29 marsi 2016

Rektors kommentar til indslag på NuukTV d. 21. marts 2016 vedr. adgangskrav på Ilisimatusarfik

 

Sooq nunap universitetianut isernissamut piumasaqaateqassava?

Akissut unaavoq, isernissamut piumasaqaatit qulakkiissavaa, ilinniartut pitsaanerpaamik tunngaveqarlutik ilinniakkamik imaannaanngitsumik naammassinnillutik angusaqarnissaat.

Ilisimatusarfiup ukiuni arlaqalersuni sulissutigisimavaa pitsaassutsip qaffassarnissaa, tamannalumi Ilisimatusarfiup pilersaarutaanit salliutinneqarpoq. Amerlasuunit immaqa ilisimaneqanngilaq, Ilisimatusarfimmi ilinniartitaanerit ilaanut piumasaqaatit ukiuni kingullerni allanngortinneqarnikut. Tamanna pisimavoq maanaannaq atuarunnaartartorpassuit kingunerisaanik. Agguaqatigiissillugu karakteerinik piumasaqaatit aamma oqaatsinik piginnaasat ilai qaffatsinneqarnikuupput politikkikkut tusagassiuutitigullu annerusumik akuliuuffigineqanngitsumik.

Ilisimatusarfiup ilinniartitaanerit ingerlataanut isernissamut piumasaqaatinik sukaterinermut soqutiginninneq annertooq aatsaat pisimavoq, ukioq ataaseq GU-piareersaatitut ingerlanneqartartoq ilisimatusarfiup ilinniartitaanerinut isissutaasinnaajunnaassammat  2017 aallarnerfigalugu. Taamaattumik pingaartuuvoq uani erseqqissaatigissallugu, ukioq ataaseq piareersaatitut ilinniartitaaneq ilinniarnertuunngorniarluni soraarummeernerunngimmat. Aaqqissuussaq unitsinneqarpoq pissutigalugu ingammik tassannga ingerlatsisimasut ilinniakkaminnik artorsartarnerat.

Ilinniartitaaneq ilisimatusarfiup qaffasissusaanut tunngasumut piumasaqaataavoq ilinniagartuutut ittumik qaffasissusilimmik piginnaasaqarneq. Tassa imaappoq, ilinniartut ilisimaarilluagassaat tassaapput fagi pillugu ilisimatusaatitut atuagarsorneq,  ilisimatusaatitut periutsit; ilinniartsinneqassallutik ilisimatusarnermit inernerit tunngavigalugit, tunniussaqarlutillu misilitsissapput suliamik annertuumik paasisimasaminnik ilinniagartuutut piginnaasatik aallaavigalugit.

Isumaqarpunga, pitsaasoq politikerinit qitiutinneqarmat nunatsinni inuusuttut ilinniartitaanikkut periarfissaqarnerat, aamma Ilisimatusarfiup ilinniartut amerlanerpaat tigorusuppai, inissat nukissallu periarfissarititaasut iluanni. 

Kisianni ilinniarneq ingerlalluartoq, bachelor aamma/imaluunniit kandidatitut qaffasissusilimmik misilitsinnermik allagartartaarneq pissappat, qulakkeerneqaqqaartariaqarput siullertut ilinniartut ilinniakkamut piginnaasaannut pisinnaasaannullu tunngasut. 

Ilisimatusarfimmi pitsaasumik ilinniakamik aallussiniaraanni ilinniarnertuunngorniarfimmi ilinniarluaqqaarnissamik piumasaqaatitaqarpoq, ilinniartut ilisimatusarfimmi ilinniakkaminnik naammassinninnissaannik periarfissiisumik.   

Ilinniakkamik aallartinnissamik piumassuseqarluartoqarsinnaavoq, kisianni inuiaqatigiinnut namminerlu inuttut ataasiakkaatut uggornartarpoq, ilinniakkamik naammassinninnissamik piginnaasat pisinnaasallu amigaatigineqartillugit.

Taamaattumik ilinniartitaanerit piareersarfiusut pigineqartariaqarput, ilinniartuutitta ilinniakkanut ingerlaqqiffiusunut pitsaasumik angusaqarluarnissaannik periarfissiilluartunik. 

 

Inussiarnersumik inuulluaqqusillunga,

Tine Pars, rektori 

Oq.toqq.: +299 38 56 02 | e-mail: tipa@uni.gl


Nutaarsiassat

Ilisimatusarfik pillugu nutaarsiassat

Atuaruk

Pisussat

Ilisimatusarfik pisussat

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk