Ilisimatusarfimmi - ujarlerpoq

Taamaattumik ilinniartitsissutigisagut nunarsuup sinnerani qaffasissutsinut naapertuutissapput

11 juuni 2016

Piffissami kngulliunerusumi assigiinngitsutigut Kalaallit Nunaanni ilinniartitaaneq ilisimasassarsiornerlu qitiutillugit sammineqarsimapput.

Ilinniartitsisunngorniartunik ilinniartitsineq pillugu avataanit nalilersuisunit pitsaassutsikkut naammanngitsutut appasippallaartutullu uparuartorneqarpoq. Siammasissumimmi isigalugu amerlavallaat ilinniarnerminnik unitsitsiinnartarput. Universitet-imi ilinniartitsisut ilaata ilinniartut oqaatsitigut ilisimasatigullu amigaateqarpallaarnerat isorivaa. Ilinniagaqartut oqallinnermi peqataasut arlaqartut isumaqarput piumaffigineqanngippallaartarlutik.  Inatsisartuni ilaasortat ilaat isummersorput oqarlutik Ilisimatusarfik  soraarummeernerni piumasaqaatimigut inissaqartitsinerullunilu akiliutitsinerusariaqartoq. Ilinniagaqartut kalaallisut piginnaaneqarnerusariaqarput. Ilinniartitaanermut ilisimatusarnermullu Naalakkersuisoq kaammattuuteqaqqusivoq ilinniagaqartut sukkanerusumik naammasisarnissaannik.

Taaneqartut tamarmik tassaapput ilinniarnerup iluani unammilligassat apeqqutillu nunarsuarni allani aamma ilisimaneqartuusut. Aamma nunarsuup sinneranitulli apeqqutit oqaluttuarfigivaatigut, suliassaqartoq ilinniartitsinerit ilinniarneqartullu iluini aqutsinerit pitsaanngorsarneqartariaqarnerannik. Kalaallit Nunaanni unammiornartut inuiaqatigiit ilusilersugaanerat peqqutigalugu suli sakkortunerulersitaapput, tamatumali allanngortinngilaa akileraartartutut akiliutigisartakkagut aallaavigalugit pissarsiaqarluarnerunissamik piumasaqaratta, pitsaassutsit annertussutsillunniit iluini. Isumaqarpungalu tamanna oqallinnerusoq peqqinnartoq aammalu inuiaqatigiinnut iluaqutaasoq, qaffasissutsip uppernarsarneqarsinnaasumik angummaffineqarneranik apersuillaqqinnerullutalu ujartuinerulernerput.

Universitet-imut inatsisit naapertorlugu ”Ilisimatusarfiup suliassarivaa ilisimasassarsiornermik ingerlatsinissaq tamannalu tunngavigalugu ilinniartitsinissaq ilinniartitsissutigineqartut iluini nunarsuup sinnerani piumasarineqartut qaffasinnerpaat angummaffigalugit”.

Qaffasissutsikkulli angummanissamik oqalunneq qanoq isumaqarpa – tamannalu qanoq iliornikkut angussavarput?

Siullermik isumaqarpoq ilinniartuutigut atorfeqartitagullu  nunani allani assingusumik inissisimasunut ilisimasatigut sanilliunneqarsinnaanissaannik. Ilisimatusarfimmi oqallinnermi kingullermi politikereq oqarpoq Ilisimatusarfimmi ilinniagaasut B-tut taallugit inorsartuusut. Taamatullu oqarneq soorunami uanga akuersaarumanngilara, akuersaarsinnaavarali ilinniartitsinitsinnut atatillugu ilisimasassarsiornertaasunullu atatillugu peqartuartussaammat pitsanngorsarneqarsinnaasunik. 

Tamanna aamma isumaqarpoq nunani allani Univeritet-inik suleqassasugut. Ilisimatusarfimmi ilinniartorisagut ilinniagassarpassuarnik saaffissaqarput aammalu nunani allani universitet-ini atuarnissaminnut periarfissaqartitaallutik, Universitet-ini akuersaagaallutik tusaamalluarneqartuni, periarfissarlu atorlugu allanut atuariartortartut amelriartorput. Taamaattumik Ilisimatusarfik avataanit akuerineqartussanngortinniarneqassaaq.  Akuerineqarnissamulli atatillugu uuttortarneqartussat amerlapput. Uuttuutaasut ilaat tassaavoq nunarsuup sinnerani suleqateqarnerit paarlaasseqatigiissitsisarnerillu qanoq ittuunerat. Unammiugassatta annerpaat ilagivaat ilinniartukittuunerput taamaammallu katersuutsitsilluni avatangiisiliisinnaanerit ilinniarneqartutut sammineqartut qaffasissusiat aallaavigalugit. Taamaattumik Universitet-inik allanik suleqateqarnerput pingaartorujussuuvoq. Nunani allani ilisimasassarsiortunik/ilisimatusar-tunik suleqateqarnissaq ujartussavarput, tamakkulu uatsinnut aggersarniarsarissallugit, kisianni amma saniatigut anguniagarissavarput ilinniagaqartuutitta suleqatigiinnerit aqqutigalugit iluaqusernissaat. Tamanna ingerlanneqarsinnaavoq nunanit allanit ilisimasassarsiorlutik orniguttut atuartitsisinnerisigut siunnersuisittarnerisigullu imaluunniit tamanna anguniarneqarsinnaavoq tikeraarlutik ilisimatusartut suliniutiminni uagut ilinniartuutitsinnik suleqasiussisarnissaannik kammattuuteqartarnikkut. Soorunalimi siunnerfik aamma anguniarneqassaaq ilinniagaqartut akornanni attaveqartitsinikkut. Tassani ilinniartut ingerlatseqatigiiffiat ”ili-ili” sulilluarpoq nunani allani ilinniagaqartunut attaveqarniarneq tamaviaarutigalugu, soorluli aamma ilinniartuutitta ilaat nunani allani universitet-inut atuariartortartut. Aamma iliuuseqarniarnerusinnaavagut nunani allani ilinniagaqartut Ilisimatusarfimmukarnissamut sorutiginnitsilerniarsarnissaat. Tamakku tamarmik nunarsuup sinneranut angummassinnaalerluni ingerlaniarnermut qaffasaataassapput.

Aamma nunatut imminut imaattumik aperisoqarsinnaavoq: Naalagaaffittut namminersulernissaq anguniagarigutsigu suleqatitaartorusulluta nunarsuullu sinneranit akuersaarneqarluta ataqqineqarnissarput kissaatigalugu, taava inuiaqatigiinni ingerlatsivigisagut piumasaqarfigalugit ilusilersorsimanerpagut, nunarsuup sinneranut angummassinnaasunngorsarlugit? Aammalu nunarsuup sinneranitut ingerlaniarneq qanoq ikorfartorparput? Kalaalinngorsaaneq aatsaat iluamik inississava (tassani eqqarsaatigalugit assigiinngitsuni immikkuullarissumillu inissisimavinni pisortatut inissittut kalaalunissaat), tamakkunani aamma nunarsuup sinneranisut ingerlaniarneq inissinneqartariaqarpa? Inuiattullu nunarsuup sinneranisuulli pitsaatigisumik peqqissaasunit, tulluuttumik piginnaaneqartunik ilinnartitsisoqarlutik ilinniarsimasunik, passutarineqartassaagut aammalu nunarsuup sinneranisulli qaffasissuseqartumik ilinniarsimasunik sullinneqassaagut?

Maqaasivara politikerit anguniagassanik tikkuussinissaat ilinniartitsinerni eqqortumik kalaallisut oqaaseqarnissamik eqqartuinerit salliutikkunnaarlugit. Iluarivara tunngaviusumik atuarfimmi tuluit oqaasiinik ilinniartitsinerup nukittorsarnissaanik tikkuussilluni oqariartuuteqarneq aammalu qilanaaralugu ilinniartitsinermik ingerlatsivitsinni pingaaruteqartuni allanni aamma nunarsuup sinneranut sammisutigut nukittorsaanissamik oqallisilernissaq tusassallugu.

 

Inussiarnersumik inuulluaqqusillunga,

Tine Pars, rektori 

Oq.toqq.: +299 38 56 02 | e-mail: tipa@uni.gl


Nutaarsiassat

Ilisimatusarfik pillugu nutaarsiassat

Atuaruk

Pisussat

Ilisimatusarfik pisussat

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk